Read Wano NAPPIYAREEGERAK 5 Bible Online

NAPPIYAREEGERAK 5 - Wano bible

NAPPIYAREEGERAK 5

¹At Mbaranabat nogo wu it Yetut nappiyareegerak inowagam pi nagagerak kwe, aap ambi endage Ananiyat, at akweeluk Tapira imbirak nggween ambi unde me, at nen inanggween nogo onggo nggereneegerak.

²At onggo nggereneegerak wu nogo, at akweeluk eenu kagak, ogonggolo nogo nen ando mogonogo at teppake, ndi, ando wonok nappiyareegerak nogo inowagam pi nage, eereegerak.

³Nogo eeke mbareegi, at Peterut nen, ”Ananiyat wae. Nggween onggo wokkegaarak ando mogonogo teppakendak nogo ti, kat nonggop nduk Ibilit kinikime unggwage mbaki, Aberiniki ambokan laganggendak?

⁴Onggo wokkega'lek kagak, kat kamendek aret wonagaarak kwe, ndi, onggo muk wokkegaarak me, kat kawu aret kagak, nonggop nduk kiniki togop eeriyak mbakendak? Nit aakumi ninambokan laganggendak lek o. Ata, Ala aret ambokan laganggendak o,” yinuk,

⁵yoge nogo Ananiyat aruk konembege nagagirik, kweyak togon nggween paga ngginnage nagagirik, kangge mbareegi, it aakumi abok aret inaruk konenggo nogogwaarik, ”Iya!” yinuk, inagabiti mbareegwaarak.

⁶It aap tawe nogo wogo nogogwaarik, aap nogo eebe mbogoyum paga nggerembunuk, wonok wundi nogo nogogwaarik, nggween mbanogo taambi nogogwaarak.

⁷Wonok wundeegwaarak iigak, 3 jam negen wonogogwaarik, akweeluk nogo ogonggolo kambeegerak nogo eenggo'lek logonet, ugun unggwi wagagerak.

⁸Ugun unggwi wage mbareegi, at Peterut nen kwe nogo yoge logonet, ”Tapira wae. Kit kinanggween nogo onggo yogop aret wokkiragaarak ilik? Yu o.” Yoge mbareegi, ”E o. Togop aret wo'niragaarak,” yoreegerak.

⁹Yoge mbareegi, at Peterut nen, ”Kogonggolo kimbirak wone ambit mbambogo nogotik, nonggop nduk Aberiniki ambokan laganggotak? Kimbirak Aberiniki ambokan laganggotak me, it aap kat kogonggolo nggween mbanogo taambi nagaarak nogo nen yogondak kat kunduk wokkeren noorak nduk, tungga'nggi paga unggwi wogwe yi iyet o,” yinuk,

¹⁰awo yoge kagak, kwe nogo Peterut owagam ta'nogo aret kweyak togon ngginnage nagagirik, kambeegerak. Kangge mbareegi, it aap tawe nogo nen unggwi wogo nogogwaarik, kambeegerak nogo, wonok, ogonggolo imbirak nggween tabonogo taambi nogogwaarak.

¹¹It Ala apuri inom, it eekwi koneneegwaarak nogo inom, it abok, ”Iyak!” yinuk, inagabiti ambik ogogwaarak.

¹²It Yetut nappiyareegerak nogo nen aakumi ambik iigak, inagabiti warak inom, eerubok mendek inom, eeko nogogwaarak. Ndi, it abet mbareegwaarak mendek inom Ala awi wurik awe aago endage Talomo yogo nogogwam nogome, kuwak ari nogo logonet, iniki ambit aret wonogogwaarak.

¹³It aakumi ando ugun nogo nen inom lambuniyak inagabiti mbako nogogwaarak kwe, it aakumi abok nen wogoppiigo logonet,

¹⁴it aap inom, kumi inom, it ninogoba endagembogut Yetut abet mbareegwaarak mendek nogo, ambi nabek unggwagak mban eeko logonet, ineebe ambik ogogwaarak.

¹⁵Ndi, Peterut nage logonet, agalu'mok mbaaninabuwak nduk, aakumi andi agaatak nogo ewugeren lit ndoonogo tu nggwok paga piya wagak eeko nogogwaarak.

¹⁶Eekwi wonogwe me, it o Yerutalem enaagan-ambokan o tini lombok time aakumi ambik nogo nen kuwak eeri wogo logonet, it kugi andi agaatak inom, kugi kumili piyaginaketak inom, wogoren piya wagaatak me, abok obeelom ogo nogogwaarak.

¹⁷Eeppogo mbareegwa, it Ala unde inowe endagembogut at awuri aap Taruki mendek abok inom inanini ambik ogo nogogwaarik, wone mbambunuk,

¹⁸it Yetut nappiyareegerak nogo pippiinok, keele maarogo mambiigo menggam mambiyareegwaarak.

¹⁹Mambiyareegwaarak oonikiya nogome wonogwe me, mbogut paga Ala yonggo nappiige menggerak melaikat mendek ambi wage nagagirik, tu paarogo wumbiinok yorage logonet,

²⁰”Kit Ala awi wurik me time nogo logomonggotik, ineenik eeginake menggerak wone abok yoranu o,” yinuk, inaruk wake mbareegi,

²¹it nogo inaruk konembogo nogogwaarik, o kuubondendok Ala awi wurik me unggwogo nogogwaarik, wone mamunirogogwaarak. Mamunirogwe me, it Ala unde inowe endagembogut awuri inom, nogo nen, it Iterali inogobamini wone amburu mbanggo menggaarak abok kuwak ari woraawak nduk, yonggo nappiyareegwaarak wogo mbareegwa, it leenogo nappiyareegerak keele maarogo mambiigo menggam wonogwe nogo woraawak nduk, ”Muguren nanip o,” yorogogwaarak.

²²Yorogo mbareegwa, it aap keele maarinaka nogo nen, keele maarak wonogo menggam pegiya nogogwaarak mendek, ineebe lek mbareegwa, wogo nogogwaarik, yorogo logonet,

²³”Tu omaawirogon narak, ndi, it aap tum menggaarak nogo kunduk wonogwe iigoorok kwe, tu paarogo maniigo nogoorik, ineebe lek iigoorak o,” yinuk, it wone amburu mbanggo menggaarak nogo yorogogwaarak.

²⁴Wone nogo konembogo nogogwaarik, at Ala awi wurik arum menggerak inom, it Ala unde inoweewi inom nogo nen, ”Eenggi-iyok lek nonggop togon aga mbakop?” yinuk, yogwe me,

²⁵aap ambi wage nagagirik, ”Wologo wae! It aap keele maarogo mambiigotak nogo Ala awi wurik me unggwogo nagaarik, wone mamunirogwe iigak, wagi o,” yinuk, it nogo yoragagerak.

²⁶Yorage mbareegi, aap Ala awi wurik arum menggerak awuri inom it Yetut nappiyareegerak nogo waganabi nogo nogogwaarik, aakumi nogo nen yugum paga ninookwi iyo nduk, inagabiti nen inoorulik enaani aret wogoren wogogwaarak.

²⁷Wogoren wone amburu mbangga it inoweewi inowagam piya wogo mbareegwa, at Ala unde inowe endagembogut nogo nen kin wagiige logonet,

²⁸”Aap ti endage kunogo mamuniroorak mage o, yinuk, mbekkirogoorak kagak, kit wone mamunirogotak paga o Yerutalem abok konenit nagaarak ti, aap ti ane'me nit aret ninooruwok nduk yogo ogotik?” yoragagerak.

²⁹Yorage mbareegi, at Peterut inom, nappiyareegerak ando nogo inom, wone onggo yogo logonet, ”Aakumi nen yo'nirogwe ti, nit koneniyak lek o. Ala nen yo'nirage kenok mban koneniyak o.

³⁰Kit Yetut eyo paga nabenogo wakotak me, ninombomini inogoba Ala nogo nen kanggo menggam nen eenik agago mippereegerak nogo ti,

³¹kit kinowe endagembogut logonet, kinagap ndake logowak nduk, at Ala nen imbirak tabonogo mippereegerak Yetut nogo aret o. Kit aap Iterali mendek maluk eeko monggotak kiniki koombunuk mbo pugwi kiinok, kinomaluk lek eerogo pinagawak nduk mippereegerak aret o.

³²Nit Ala oone liirogon eekwi niinok, Aberiniki wo'niragaarak nogo ninom logonet, yi wone ndi wone ti abok aret paganogo yokkirogo ogoorik o,” yinuk, yorogogwaarak.

³³It nogo wone ti konembogo nogogwaarik, inanini wu agan nage mbareegi, ”It nappiyareegerak nogo mondok inooruwok,” mbakwi me,

³⁴aap Pariti mendek ambi Muta wone lengganak mamunirage nagagerak kenok, aakumi abok nen wogoppogo nogogwaarak endage Nggamaliyen nogo nen it aap wone amburu mbanggo menggaarak inenggaanom paga mi'na'nuk, yorage logonet, ”It mbuuluk logonuk unggwi woraawak nduk, wundi nawak o,”

³⁵yorage mbareegi, wundi nogogwaarak iigak, it wone amburu mbanggo menggaarak nogo yorage logonet, ”Kit Iterali mendek yi, wone ambi yokkira o. It aap yi, eeginaburak nogo liirogon aret koonggo logonip o.

³⁶Maan nen aap Teyurat nogo nen mi'na'nuk, An iya me, winiruwak mbake logonet, agan wage mbareegi, aap ineebe 400 at oone wawok nduk mugurok nogogwaarak kwe, at nogo wakwi, at mugurok nogogwaarak nogo maappi'gwi, eeko mbareegwa, oone nogo lek aret agagerak.

³⁷Ti'nuk peebi, aakumi abok inendage liiru mbanuwak nduk eekwi me, aap endage Yurat, Nggalileya mendek ambi wage nagagirik, aap ando at oone konenuwak nduk nomoninabeegerak mendek, wako mbareegwa, at oone waganeegwaarak nogo mbaganit nogogwaarak.

³⁸Togop me, yogondak aap yi teppiyabagip nduk an yokkira o. It iniki koonogo eerit nugwi nogo ti, we aakumi iniki mbakwi mendek eeko menggaarak kenok, ti, mondok lek arigin aret o.

³⁹Ndi, Ala nen mbake menggerak eeko menggaarak kenok perak, it inoone taganiyak meek me, Ala inom ogoorak logonet eekwi kinombakwi iyo, teppiyanip o,” yinuk, yoragagerak. Yorage mbareegi, it wone amburu mbanggo menggaarak nogo nen, ”Abet aret yigi,” yinuk,

⁴⁰it nappiyareegerak nogo wiirogogwaarak wogo mbareegwa, yorogo logonet, ”Yetut endage aakumi yoranet noorak mondok mage o,” yinuk, yawi inoorogo wumbiyareegwaarak.

⁴¹It wone amburu mbanggo menggaarak nogo nen wumbiigo mbareegwa, nogo logonet, ”Nit Yetut aane'le mbanggwi me, ninenggali waka o,” yinuk, iniki ale'nggen ambik mbarit nogogwaarak.

⁴²Ndi, nogo nogogwaarik, Ala awi wurik me nen, oome nen, abok aret ko'lu-kii'me, ”Ala nen leenogo mippereegerak nogo ti, Yetut aret o,” yinuk, wone mamunirogwe, Ala wone yorogwe, eerit nugu nogogwaarak.