Read Wano NAPPIYAREEGERAK 6 Bible Online

NAPPIYAREEGERAK 6 - Wano bible

NAPPIYAREEGERAK 6

¹O ti eyom paga at oone woorak nduk ambi nabek unggwagak mban eeko logonet, it aap Yakuri mendek kwe, Yunani wone yogo menggaarak nogo nen, ”Nit ninagalomini kumi togwe nonggop nduk mbi ndonggorogon wogoraga'lek eeko ogotik?” yinuk, it Yakuri inawarak nogo inom nabok-kabok yereegwaarak.

²Nogo, nabok-kabok yogo mbareegwa, it aap 12 nogo nen, ”Kit Ala wone waganggo monggotak abok aret kuwak ari woraanip o,” yorogogwaarak kuwak ari wogo mbareegwa, yorogo logonet, ”Nit Ala wone mamunggirogwe nogo mbo punuk, mbi wokkirogo logorak meek me,

³noreewi o. Kit nogo nen aap iniki liirak menggaarak inom, Aberiniki inikime wonage inom, iniki warak logonet yogo menggaarak inom, mbi onggo punuk lako logowak nduk, aap ineebe 7 paga leenogo mippiyanip o.

⁴Ndi, nit nogo nen ta, Ala wone mban yorogwe, tamban mban eekwi, eeko logogun o,” yinuk, yorogogwaarak.

⁵It aap ambik kuwak ogogwaarak nogo nen, ”Mippiyoorak op aret o,” yinuk, leenogo mippiigo logonet, aap iniki abet mbareegerak paga yungguppegak eeke logolik me, Aberiniki inikime unggwagagerak Tepanut nogo inom, Piliput inom, Porokorut inom, Nikanot inom, Timon inom, Paremenat inom, aap endekem Andiyokiya mendek Ala wone waganeegerak Nikolawut nogo inom,

⁶it nogo mippiigo nogogwaarik, it nappiyareegerak nogo inowagam piya nogo mbareegwa, inanobak tebenogo tamban eeginabeegwaarak.

⁷Ndi, Ala oone nogo nggwok aret wiganinuk nage mbareegi, it Ala wone waganggo menggaarak o Yerutalem mendek nogo, ambi nabek unggwagak mban eeko logonet, ambik aret ogwe, ndi, it Ala unde nogo kunduk ambik aret, ”Wone wawi o,” yinuk, abet mbakwi, eereegwaarak.

⁸At Tepanut nogo Ala nen ale'nggen oba pege, omaawi ambik wogoge, eeke mbareegi, eerubok mendek eeke, ineenu aruwak nduk inagabiti warak mendek eeke, eerit nage me,

⁹it Yakuri kuwak eeko menggam Piinogo Pinaneegerak tooneegwam nogome, aap Kirene mendek inom, aap Alekanderiya mendek inom wogo nogogwaarik, it Yakuri Kilikiya mendek nen, Atiya mendek nen, inom kuwak eeppogo nogogwaarik, Tepanut inom wone wareegwaarak.

¹⁰Wone wako logonet, at Tepanut Aberiniki nen nggaganogo yege kagak iniki warak logonet, yoragagerak paga, it nen onggo yoriyak meek age mbareegi, puk ogogwaarak.

¹¹Wone onggo yoriyak meek age mbareegi, it aap ando nen, ”At Ala inom, Muta inom, meek eerogo piige kogoorak o,” yinuk, inoone nabenak mban yogo logowak nduk, onggo wogorogogwaarak.

¹²Wogorogo mbareegwa, inoone agan it aakumi inom, it inanggok inom, it Ala wone liiru mbanak unde inom, inikime manabi wogo mbareegwa, inanini nen aap Tepanut nogo piganok, aap wone amburu mbanggo menggaarak inowagam pi nogogwaarak.

¹³Pi nogo mbareegwa, it ando nogo nen pilit karerogo yoraawak nduk mippiigo mbareegwa, yorogo logonet, ”Aap yi ko'lu-kii'me puk ageelik Ala awi wurik magome inom, Muta wone lengganak nogo inom, meek negen agago pege kogoorak o.

¹⁴At aap yi nen, At Yetut Nataret mendek nogo nen Ala awi wurik yi minogo punuk, Muta lengganninabeegerak nit ninitok kunik eeko monggoorak nogo lek eerogo pigin, yinuk, ari kogoorak o,” yorogo mbareegwa,

¹⁵it wone mbanuwok nduk kwi'ndak wonogogwaarak nogo nen, at Tepanut eebe inigen pippak ugu logonet, at enete it mbogut paga Ala yonggo nappiige menggerak melaikat nogo initinggen kwak kumbunuk wonage kogogwaarak.