Read Wano NAPPIYAREEGERAK 7 Bible Online

NAPPIYAREEGERAK 7 - Wano bible

NAPPIYAREEGERAK 7

¹At Ala unde inowe endagembogut nogo nen Tepanut yoge logonet, ”Aap wone yagaarak ti, kat abet aret yagandak ilik?” Yoge mbareegi,

²at Tepanut nogo nen, ”Nogobamini nen, noreewi nen, kinaruk logonip,” yorage nagagirik, ”Ninombo Abarakam o Karan naga'lek logonet, awo o Metopotamiya wonage me, at Ala mondok tiyanak menggerak nogo kawak nduk wage nagagirik, Abarakam yoge logonet,

³An nen o alik kat logorak ambi wokkirigin me, kat menggenom inom, kowe-kawot inom, teppiinok, nak o, yoge mbareegi,

⁴at nogo aap o Katarim iname nogome mbo punuk, o Karan puk ari wagagerak. Puk ari wagagerak wonage me, ogoba kambeegerak. Kangge mbareegi, yogondak nit wonogwe me yime Ala nen aret nappi wagagerak.

⁵Nappi wagagerak wonage me, at Ala nen Abarakam unde logowak nduk nggween ambi mbanege, we mbuuluk ambi yoge, eerulik aret kwe, at apurilogwe lek kagak yoge logonet, Nggween yi kat inom, kat ndaganabemenggendak kombowologwe inom, unde logomunggup o, yinuk, abok mban yoreegerak kwe,

⁶Kat kombowologwe nogo, o aakumi inambik iname time namenggaarak me, it inayeloman negen eeppiinok, inookak mban eekwi iigak, 400 tahun arigin o.

⁷Ndi, it aakumi kat kombowologwe inayeloman negen eeginabemenggaarak nogo, an nen maluk eeginake neenok, kombowologwe nogo teppiigo mbaremengga, wundi wogo logomenggaarik, o yime logonet, an alut ee'nako logogun o, yinuk, Ala nen Abarakam yoreegerak.

⁸Yoge nagagirik, Abarakam Ala imbirak wone abu nggaruk togon mbaneegwaarak wone aberak logowak nduk, agabolo mbanggo logorak wone nogo yoreegerak. Yoreegerak paga Itak aret nda'nage mbareegi, nogo 7 paga yippunuk, agabolo mbaneegerak. Itak nen Yakup ndareegerak. Ndi at Yakup nen nit ninombomini 12 paga ndaganabeegerak.

⁹Nit ninombomini nen inawuluk Yutup nogo ineebi-ineeba eeppogo nogogwaarik, it Metit mendek inayeloman aruwak nduk, onggo nggerenggo mbareegwa, ogoba Ala imbirak o Metit nagagerak wonage me,

¹⁰aaninggin-paaninggin kage nagagerak nogo Ala nen lek eerogo pege, ndi, at Yutup nogo aap o Metit endagembogut Pirawun eyabu ake eeke kagak, Pirawun nen, Wulaga yi iniki warak lombok o, yinuk, ale'nggen mbaruwak nduk, yeenggooge, eeke kenok, at Pirawun inom menggaarak inom, it aap Metit mendek inom, abok aret inowe endagembogut oone konenggo logowak nduk, Pirawun nen Yutup aret mippereegerak.

¹¹Mippereegerak wonage me, o Metit yi awi ndi awi time inom, o Kaanan inom, mbi noogelo nen ineebenuwak ko eerogo piinet nage mbareegi, it aap ninombomini nogo nen mbi kwaareegwaarak mendek, abu lek mbareegi,

¹²at Yakup nogo nen o Metit gandum parum wonage aruk konembege nagagirik, at apuri ninombomini nogo nappiyareegerak.

¹³Ti'nuk, peebi ne ambi paga nappiyareegerak nogo mbareegwa, Yutup nogo nen, Kinawot nogo an aret o, yinuk, owewologwe ineenu eeppiige mbareegi, Pirawun nogo kunduk, At Yutup yi, it yi mendek aret wagagerak kagi, mbareegerak.

¹⁴Ineenu eeppiige nagagirik, at ogoba Yakup inom, akwe apuri inom, abok ineebe 75 aret, Waganabi nanip o, yinuk, nappiya wagagerak.

¹⁵Nappiya wagagerak nogo wogo nogogwaarik, at Yakup apuri inom o Metit wogoren nogogwarak. Wogoren nogogwaarak time logonet, at inom, ninombomini inom, kambit nogogwaarak.

¹⁶Kambit nogogwaarak nogo inuwak wonok, aap Tikem mendek ambi endage Kemot apuri nen ndo nenaareegwaarak me, Abarakam onggo pereegim nogome mambi wogogwaarak.

¹⁷Mambi wogogwaarak nogome logonet, ti'nuk, Ala nen Abarakam abok yoreegerak nogo eeriyak koorok panggo yi wage kagak, nit ninombomini nogo o Metit time logonet, ambik wigannogogwaarak.

¹⁸Wigannarit nogwe iigak, inowe endagembogut alik ambi Yutup eeke nagagerak nogo eenggo'lek kagak, mi'nagagerak.

¹⁹Mi'nage nagagirik, ninombomini inambokan lagangge logonet, ale-pale eeginake, Elege nda'nogwe iinok, kambuwak nduk endekem mbo piyanu o, yinuk, yorage, eeginake nagagerak.

²⁰Nogo, eerit nage eyom paga Muta nda'nage mbareegi, wulaga nogo abu amuni mbanak ndarak kogo nogogwaarik, oome kere'nage kagak tut kenagan penembunuk,

²¹endekem kumaappi nogogwaarak me, kwe ndugum Pirawun apuluk nogo nen kwaakkage nagagirik, An naagaluk aret eekkola o, yinuk, ame pi nage nagagirik, tawe eekkolagagerak o.

²²Wulaga nogo tawe age logonet, it Metit iniki warak logonet eeko menggaarak abok aret mamuneegerak me, oone inom, eeke inom, omaawi mban eerit nage nagagerak.

²³At nda'nagagerak kagak, 40 tahun kuli eeppege nagagirik, Nowenawot Iterali nenegen iya naakit o, mba'nuk,

²⁴iya nage nagagirik, time wonage logonet, aap Metit mendek nen at awot ambi we ugun wake kage nagagirik, ili wagangge logonet, at Metit mendek nogo mondok wareegerak.

²⁵At iniki nen mbake logonet, At Ala nen noreewi inagap ndariyak nduk nappani wagaarak nombarugun ilik? mbareegerak kwe, togop mbaka'lek aret wonogogwaarak.

²⁶Nogo ambi yippunuk ko'lu nen, at awuri mbere yawi pugwi enegen iige nagagirik, ogoorinake logonet, Nawuri o. Kit kimbirak nore-kore aret kwe, nano nduk yawi wat-wat yogo ogotik o? yinuk, yorage mbareegi,

²⁷it yawi pugwi nogo ambi nen at Muta pelenogo nappunuk, yoge logonet, Nit eekwi amburu mbangge logorak, ta nen mippagagerak me, ari agandik o?

²⁸ari nagagirik, Kat kobit aap Metit mendek wakendak nogo kokwak, an noorikit nduk wage nagandik, ari agandik a?

²⁹Yoge nogo aruk konengge nagagirik, o Metit mbo punuk, o Miriyan kole nagagerak. Time logonet, apuri mbere ndaganabeegerak.

³⁰Nogome logonet, 40 tahun aret eereegerak. Eeke nagagirik, ne ambi paga karume put Tinayi nogome wonage me, mbogut paga yonggo nugu menggaarak melaikat mendek ambi nen eyoongga alokwi paga kani moonuk negen wunuk ari me, enegen neyaawak nduk nikka wagagerak.

³¹At Muta nen kani nogo kage nagagirik, Iya! yinuk, Nano nen eeke kaamun? yinuk, pekkaakit nduk panggo yi nage mbareegi, Ala oone ari logonet,

³²Kat kombomini Abarakam inom, Itak inom, Yakup inom, inogoba Ala nogo an aret o, yoge at Muta nogo aruk konengge nagagirik, agabiti nen aganak nuk ari logonet, enegen pekkoorak agabiti nen puk agagerak.

³³Puk age mbareegi, at Ala nen, Kat wonage me taati nggween magome, kiyogogut keele piinogo pu o.

³⁴An napuri o Metit wonogwe nogo inoorit nogwe nenegen iige, yagan warit nugwi naruk konengge, eeke minggirak me, inagap ndarikit nduk wambi wagi o. Kat o Metit nappagakit nduk ya'i omok o, yinuk, yoreegerak o.

³⁵Nit eekwi amburu mbangge logorak, ta nen mippagarak o? yinuk, Nineebi, yogo nogogwaarak nogo ti, at Muta aret. At inowe endagembogut a'nuk, inagap ndaruwak nduk it yonggo mbogut paga melaikat mendek ambi eyoongga alokwi paga kani wunuk ari me yoreegerak paga Ala nen nappi wagagerak nogo, at Muta aret o.

³⁶At nogo, ninombomini o Metit nogome nen wogoren wundi nage logonet, o Metit nen, yi Merah yenggenak ambet paga nen, karume time nen eerubok mendek eeke, inagabiti warak mendek eeke, eeke kagak, 40 tahun agagerak.

³⁷At Ala nen aap kit mendek ambi Ala wone yokkirage logorak nduk an kwak mippigin, yinuk, it Iterali mendek yoragagerak nogo ti Muta mban aret o.

³⁸At mbogut paga yonggo nege menggerak melaikat put Tinayi nogome yoreegerak nogo inom, it aap ninombomini inom, o karume kuwak ari wogogwaarak me inom wonagagerak nogo ti, at Muta aret. Nit yo'nirage logowak nduk Ala wone mondok logorak wone waganeegerak nogo at mban aret o.

³⁹Wone waganeegerak kwe, ninombomini nogo nen, Woorak nineebi o, yinuk, taganogo punuk, iniyok paga o Metit noorak iniki aberak mban logonet,

⁴⁰at Karun yogo logonet, at Muta o Metit nen wo'niren wagaarak nogo, nggeeme nagaarak nineenggo'lek me, nit wo'niren nege logowak nduk, kat kuguwak ambi amili kunniret o, yoreegwaarak.

⁴¹Yogo mbareegwa, sapi wam aagaluk ngguunok kwak ogut ogobakkigirogo punuk, aanggo wako logonet, it ogobakkigireegwaarak nogo mban ale'nggen eereegwaarak.

⁴²Ale'nggen eeko mbareegwa, at Ala iniki koonogo punuk, oonegen inom, tut inom, laaluguragan inom mbogut paga menggerak mendek inik-inik eeko logowak nduk teppiyareegerak. It Ala wone yorogo nogogwaarak nabi-nabi nen yogo logonet, Napuri Iterali mendek yi wae. 40 tahun eeke kagak, kit karume nugu logonet, wam wappunuk mbanogo pogo nogogutak nogo ti, an nake mbanogo pogo nogogutak mbakop? Mondok lek o.

⁴³Kit kugi Molok awi wurik inom, kugi Erepan laaluguragan ogut ogobakkigirik nogo inom, inik-inik eeko logowok nduk wonok nogogutak me, an o Mbabin ambokan time munogo nappinagagin o, yinuk, liiru mbaneegwaarak nogo ndak-ndak aret munogo nappiyareegwaarak.

⁴⁴Ala ninom wonage mbako logowak nduk, Ala awi ooliya wuruwak nduk Ala nen ogut wakkagak kenegen kegandak nogo ndak-ndak wu'nu o, yoreegerak nogo ndak-ndak wuppunuk, ninombomini o karume wonok nugu logonet, ya wukak nda wukak eerit nugu nogogwaarak.

⁴⁵Inogobamini kanggwi iigak, inapuri o wurik nogo ambi unde agak eeko nogogwaarak me, nit ninombomini o wurik nogo unde ogo nogogwaarik, aap Yotuwa inom Ala nen it endekem mendek mugogo wumbiyareegim nogome tebenggo'net unggwi nogo logonet, wonok nugu nogogwaarak. Awo wonok nugwi paga, Ndawut aret mippereegwaarak.

⁴⁶Mippogo mbareegwa, at Ndawut nen ari logonet, An eerit nage paga Ala ale'nggen nombake kagi, yinuk, Yakop ogoba endagembogut Ala logowam o kwaarikit nduk yoreegerak kwe,

⁴⁷at Talomo nen aret Ala awi wureegerak.

⁴⁸Ala awi wureegerak aret kwe, at mondok tiyanak menggerak nogo, aakumi inawi wurik me wonageelik o. At Ala wone yorage nagagerak nabi nogo nen ari logonet,

⁴⁹Ninogoba Ala nen, Mbogut paga ti, an noone lengganogo yorage minggim o. Ndi, nggween paga ti, nabu'me piige minggim aret o. An nawi nonggop negen wuriyak nduk yogo ogotik o? An namborowak koongge logorak, nggeeme o?

⁵⁰Yi mendek ndi mendek ogobakkigirik yi ti, an nen mban ogobakkigireegirak nogo lek a? yinuk, togop yereegerak me, aakumi inawi wurik me wonageelik o.

⁵¹Kit kinogogumbuk kiniki omaawi logonet, Ala wone konengga'lek, kit aret o. Kinombomini Ala oone taganggo nogogwaarak kwak, Aberiniki oone taganggwi, kit aret o.

⁵²Kit kinombomini nen Ala wone yorogo nogogwaarak nogo piyak-payak eeginake logolik ambi ta mbakop? It aa'nduk lombok Ala wone yorogo nogogwaarak nogo nen, At maluk eekeelik obeelom mban eeke menggerak woraagin o, yinuk, abok paganogo yorogo nogogwaarak nogo inooko nogogwaarak. Ndi, yogondak kit nen mban aret at eebe onggo nggerembunuk wakotak o!

⁵³Ala wone lengganak it mbogut paga yonggo nugu menggaarak melaikat nen yokkira wogogwaarak waganeegutak kwe, eeka'lek monggotak kit aret o,” yinuk, yoragagerak.

⁵⁴Yoragagerak it wone amburu mbangga nogo inaruk konembogo nogogwaarik, inanini wu agan nage logonet, inambe mam kambumbunuk wonogwe iigak,

⁵⁵at Tepanut nogo Aberiniki inikime lik ari mbareegi, ena mbogut paga ni'nage nagagirik, Ala tiyanak menggerak Yetut imbirak wonogwe iige nagagirik,

⁵⁶yorage logonet, ”Kinigen nigiyaanip o. Mbogut keyaakerak enggela'me aap aret nda'nagagerak Ala eenggi abee'nggan mi'ndak wonage kagi o,” yoragagerak.

⁵⁷Yorage mbareegi, it nogo nen inoone nggwok aret ya-mba yogo logonet, inaruk nakko'nok, abok aret kok piga nogo nogogwaarik,

⁵⁸endekem o tinime nigogo wumbunuk, yugum paga toguurit wareegwaarak. It inoone at oba lenggeneegwaarak nogo nen inambogoyum endekem mendek nggoorogo aap tawe endage Tawulut nogo wogogo nogogwaarik,

⁵⁹yugum paga toguurit-tagaarit warit unggwogwe iigak, at Tepanut nogo nen, ”Nogoba Yetut o. An niniki wamen o,”

⁶⁰yinuk, endobanggun yindumbunuk logonet, ”It maluk eekwi yi, inoba lenggenogo piyaagun o. Teppiyet o, nogoba!” yinuk, oone nggwok paga yoge nagagirik, kambeegerak.