Read Wano OROMA 11 Bible Online

OROMA 11 - Wano bible

OROMA 11

¹Togop me, an wone ambi kin wakkiya o. Ala nen apuri maan miirinabeegerak nogo, mondok-mondok mbo piyareegerak mbakop? Abu lek o. An togon Iterali mendek aret agarik. An nombo Abarakam aret me, nanebunu ti, Mbeniyamin mendek aret o.

²O maan togon at Ala nen apuri miirinabeegerak me, mondok mbo piyareegerak lek o. Aakumi Iterali mendek maluk eeko mbareegwa, inooruwak nduk, at Eliya nen Ala yoreegerak nogo liiru mbanak kineenggo'lek a?

³Eliya nen ari logonet, ”Kat koone yorogo menggaarak mendek inookwi, kat kake pogo menggam ogobakkigirik yinik-minik eerogo pugwi, eeko logonet kwe, an nalik aret teppanegaarak me, yogondak abu nooriyak nduk, eeko agaarik o, nogoba.”

⁴Yoge mbareegi, at Ala nen nonggop yoreegerak mbakop? Lek o. Ala nen yoge logonet, ”Aap ineebe ambik 7000 aret kugi Mba'at wogoppega'lek mbaka, inili nen piirogo agarik o,” yinuk, yoreegerak.

⁵Ti eereegerak pogom yogondak Ala inabuwa mbake menggerak me, ando mbuuluk aret miirinabeegerak wonogwe o.

⁶Ala nen it miirinabeegerak nogo ti, it obeelom eekwi iinok, miirinabeegerak lek o. Ata, inabuwa mbake nagagirik, miirinabeegerak. At Ala nen miirinabeegerak nogo ti, it obeelom eereegwaarak paga miirinabenetak en, inabuwa mbake logonet, miirinabeegerak nogo pilit aret mba'netak.

⁷Ti kenok, it Iterali obeelom eeppiyareegerak nogo, nonggop mbakop? It Iterali mendek ambik nogo nen, ”Nit obeelom agago pinaniyak nduk, nonggop eeruwi o?” yinuk, eekaatak mendek, eeppiiga'lek aret wonagagerak kwe, it ando mbuuluk miirinabeegerak nogo mban obeelom eeppiige nagagirik, it ando apit aret iniki omaawi agago piyareegerak.

⁸At Ndawut nen ari logonet, ”Pagi waruwak nduk, ta'na pogo mengga kwak, inoone yanggik-yanggok agago lappunuk, inooko logowak nduk eeppiige, aaninggin-paaninggin inoba luurik-maarak eerogo piinok, yigeebu wuppiige, yi mendek ndi mendek inigen kogwe iyo, inigen mbuk eerogo piige, eeru o,” yinuk, Ala yoge mbareegi, ti'nuk, aap alik ambi ari logonet, ”Ala nen iniki miin ugun logowak nduk, wogorage, inigen mbuk inaruk logu negen eerogo piige, eereegerak kuli paga nen, nok, yogondak togop aret wonogwe o,” yinuk, yereegerak liiru mbanak nogo ndak-ndak Ala nen togop aret iniki omaawi agago piyareegerak wonogwe o.

⁹

¹⁰

¹¹Ti kenok, it Iterali mendek nen iniyogobit lik togon eegirage mbareegi, Ala nen nonggop eeginabeegerak mbakop? Mondok ambokan mbo piyareegerak mbakop? Ti lek o. It Iterali mendek Ala wone taganeegwaarak paga Ala nen it endekem konenggulik mendek inagap ndake kenok, it nen, ”Nit togon togop aret woorak mendek eereegurak, ao!” mbaruwak nduk, eeginabeegerak.

¹²It Iterali mendek maluk eereegwaarak paga, yi aakumi ndi aakumi alik mendek abok aret obeelom eerogo piige, ndi, Ala wone taganggo mbareegwa, Ala nen mbo piyareegerak paga, it endekem konenggulik mendek obeelom eerogo piige, eereegerak ti paga, yogondak mbuuluk obeelom eeppinanege kwe, peebi it ninom lambumbinaninuk ee'ninaburak nogo perak, nggwok lombok ee'ninabigin o.

¹³Ndi, yogondak kit endekem konenggulik mendek wone ambi yokkira o. An kit endekem konenggulik mendek kinake aret nappani wagagerak me, an neyabu tiyanak lombok nogoba nen unde eeppaneegerak me, niniki ale'nggen mbake logonet, eeke agarik o.

¹⁴Kit an wone yokkirage nogo waganggwi kiinok, it an nowe-nawot Iterali mendek nogo nen, ”Nit nonggop nduk teppinaninuk, it mban yorage mba'nuk, iniki abet mbako mbarumengga, Ala nen inagap ndaruwak nduk, kit aret yokkirage agarik o.

¹⁵At Ala nen Iterali mendek mbo piige nagagirik, yi aakumi ndi aakumi endekem konenggulik mendek abok aret lambunogo wogonabeegerak me, mbo piyareegerak nogo wogonake kenok perak, nonggop eerogo wogonaburak mbako ogotik? Lek o. Aakumi kanggaatak negen kobak agaatak me, kwaarinako nagaatik, iniki ale'nggen paga keyage ndonggorogon wogonako mengga kwak, peebi it togop aret eerogo wogonabigin o.

¹⁶Mbi Ala ake pugwi kenok, ero inom apit kunik aret ake puurak o. Ndi, woromo mbanogo Ala ake pugwi kenok, ero inom enaani aret Ala ake puurak o.

¹⁷Nggilipe abe aakumi nen yarak nogo mendek eno'mbak pendenogo mbo nappunuk, obaane'me endekem penaame mendek ero paga kumbi wogwe iinok, amburu inikime nage logonet, mondok kwit agan lagangge minggi kwak, kit endekem konenggulik mendek kwe, togop aret logobagip nduk, kumbinagi wagagerak.

¹⁸Togop me, ”Eno'mbak pendenak obaane'me nit endekem mendek kumbinaneegerak me, nit iya o,” yinuk, wogoppatugup o. ”Nit ero aret me, eno'mbak pendenogo kumbinani wagagerak,” mbarugup o. Ata, ”Nit eno'mbak me, ero paga kumbinani wagagerak,” yinuk, mbako logonip o.

¹⁹Ti aret yokkirage kwe, kit nen yogo logonet, ”Togop aret kwe, obaane'me nit aret kunogo pinanuwak nduk, eno'mbak pendenogo nappereegerak o.” Togop mbakwi kiigirak me, wologwe!

²⁰Kit mbakwi ti abet aret kwe, it abet mbaka'lek iinok, pendenogo nappiyareegerak kwe, kit perak, abet mbakwi paga kumbinagareegerak logonet, kiniki wogoppatugup. Wogoppatumonggotak paga pendenogo nappinanu-kwak, mondok kinagabiti mbako logonip o.

²¹Eno'mbak aa'nduk wundeegerak pogom it Yakuri mendek aret kwe, Ala inabuwa lek pendenogo nappiyareegerak me, kit togon pendenogo nappinagagin lek me nduk yogo ogotik?

²²Lek o. At Ala iniki yanggonak paga eeppiige, anini paga eeppiige, eeke menggerak nogo liippinip o. Aakumi maluk eekwi iinok, anini inoba piige menggerak kwe, kiniki yanggonak paga eerit nogwe kiinok perak, at yanggorogon aret eeppinagage logogin o. Ndi, kit kinogogumbuk mban logonet eerit nogwe kiinok, kit togon Ala nen pendenogo nappinagagin aret.

²³It Iterali mendek abet mbaka'lek iinok, mbo piyareegerak kwe, ti'nuk, abet mbakwi iinok, inobaane'me kumbiya woraagin lek mbakop? Kumbiya woraagin aret o.

²⁴Kit endekem mendek nogo ti, nggilipe penaame mendek eno'mbak pendenak pogom aret kwe, aakumi nen yarak nogo endekem mendek imbirak kumbuurak meek negen kwe, kagak, kumbinagareegerak. Ndi, it Yakuri ti, aakumi nen yarak kokwak aret me, eno'mbak pendenogo nappiyareegerak nogo at mendek aret me, obaane'me kumbiya woroorak ti aaninggin me nduk yogo ogotik? Teeluk aret kumbiya woraagin mbako logowok o.

²⁵Nowe-nawot o. Wone ambi kote kumaarak wonage nogo kineenu arubagip nduk, yokkira o. At Ala nen Iterali mendek inogogumbuk eeppiyareegerak nogo ti, mondok-mondok eeppiyareegerak lek o. It aakumi endekem mendek, ”Aap ndogop ineenggi nabu'me piyaagin o,” yinuk, linggineegerak nogo kuli ari nage kenok, it Iterali inogogumbuk wonogwe nogo yanggonogo piyaagin o. Wone kote kumaarak nogo ti aret me, ”An iya,” yinuk, wogoppako logogup o, noreewi.

²⁶At Ala nen ari logonet, ”It Iterali inomaluk lek eerogo pikit nduk wage logonet, it ninom wone mbani woroorak nogo ti, peebi kinagap ndaka o Tiyon mendek inenggela'me nen wundi wage logominggirik, it inanebunu Yakup mendek abok aret inomaluk lek eerogo piyaagin o,” yinuk, liiru mbanak ndak-ndak it Iterali mendek abot aret inagap ndari woraagin o.

²⁷

²⁸It aakumi Iterali nogo nen ”Obeelom wone woorak, nineebi o,” yinuk, mbo pereegwaarak me, Ala inom ogoorak wonage paga kit endekem konenggulik mendek obeelom wone aret waganggo ogotik kwe, Ala nen Iterali miirinake nagagirik, it aap Abarakam inom, Itak inom, Yakup inom, eeppiyoorak wone abok yoragagerak nogo paga nen perak, inom iniki kunik wonage agaarik o.

²⁹At Ala nen miirogo obeelom eeppiyoorak koonggetak nogo ti, peebi iniki alik ambi koonggak eekeelik o.

³⁰Kit endekem konenggulik mendek togon aa'nduk Ala oone yugu kagak alik eeko nogogutak kwe, it aakumi Yakuri mendek Ala wone taganogo mbo pereegwaarak paga nen kit kinabuwa mbareegerak.

³¹Ndi, yogondak it Yakuri mendek Ala wone taganogo punuk alik eekwi kwe, Ala nen kit endekem mendek kinabuwa mbareegerak ti paga it kunduk inabuwa mbarigin kogo o.

³²Nit Ala wone taganggo monggoorak abok aret maluk eeppinanuwak nduk aap keele maarogo piigo mengga kwak, nit togop aret eerogo pinaneegerak lek o. Ata, ninabuwa mbake menggerak nineenu aruwak nduk, eerogo pinaneegerak.

³³Ala iniki warak lombok nen yi wone ndi wone eenu menggerak me, oba ngginik kagak obeelom eeppinanit wundi wage menggerak me, iya! At iniki koombunuk eeke menggerak nit nen piiniyak op mbakop? Ndi, at eeke menggerak nit nineenu ariyak op mbakop?

³⁴Lek o. Ala yoge kagak aap ambi nen ari logonet, ”Ninogoba Ala iniki mbake nogo nineenu me nduk yogo ogotik? Ndi, nit niniki mbakwi nogo eeruwak nduk, Yogop eeru, ndogop eeru, yinuk, Ala yoriyak op mbakop?

³⁵O maan nen, yogondak kuli paga kit ambi nen Ala onggo ndak-ndak wo'niruwak mba'nuk, yi mendek ndi mendek wogoge menggerak, ta o?” yinuk, liiru mbanak ndak-ndak at iniki mba'nuk eeke menggerak nogo nit nineenggo'lek aret ogoorik o.

³⁶”Yi mendek ndi mendek at nen mban wakkagagerak me, abok aret unde wonage kenok, Wi! yinuk, pi wako logowak nduk, wonage me, mondok at mban tiyappogo logowok o,” yinuk, amin.