Read Wano OROMA 15 Bible Online

OROMA 15 - Wano bible

OROMA 15

¹Kit aa'nduk kiniki kole agagerak nogo nen, ”Nit mban obeelom eekko'net nugu logowi o,” yinuk, mbako logogup o. Ata, kinoreewi it iniki awo kole aga'lek mendek nogo aaninggin inoba age kenok, iniki kole aruwak nduk eyak wappiigo logonip o. ”It aakumi kat miyuk-meya eerogo kenggali wappagago logonet, an nimbirak aret nenggali wappinanugo nogogwaarak o.” yinuk, liiru mbanak nogo ndak-ndak, Keritut nggween paga yime logonet, at obalombok mban eekko'net nage logolik o. Ata, aakumi iniki ale'nggen mbaruwak nduk, eeppiinet nage nagagerak me, nit kunduk ninom monggoorak nogo iniki kole aruwak nduk, ndak-ndak eeppiigo logowok o.

⁴Nit Ala wone pekkogo logonet, ”Kit kiniki luunik wonogwe nogo Ala wone yereegerak paga kiniki panggombunuk, kiniki aan aganggenggwi lek kwi'ndak wonogwe kiinok, abet aret kolaamunggup o,” yinuk, nineenu aruwak nduk, Ala wone liiru mbanggo nogogwaarak ti abok aret ninake aret mbaneegwaarak kogo o.

⁵Kit abet mbareegutak nogo, kiniki kwi'ndak logonet porogo logobagip nduk eekkinake, ndi, kiniki eyak wappinagage, eeke menggerak alom unde Ala nogo nen, Keritut eeke nagagerak nogo ndak-ndak kit togop kiniki ambit a'nuk, lambunik logobagip nduk, eekkinabigin o.

⁶Kiniki ambit a'nuk lambunik logonet, kit abok kinoone lambuk togon ninowe Yetut Keritut ogoba Ala wogoppogo logobagip nduk, yokkiragi o.

⁷Nit Ala tiyappogo logowak nduk, Keritut ninabuwa nen wo'ninabeegerak nogo pogom, kit-kit aret niniki-kiniki kunik eeko logonip o.

⁸At Ala nen inombomini Yakuri mendek abok yoragagerak nogo, ”A'me aret aga,” mbaruwak nduk, at Keritut nogo it Yakuri inayeloman a'nuk inake eeke logowak nduk, inenggela'me nen aret nda'nagagerak.

⁹Ndi, it mban inake nduk lek o. Ata, it endekem konenggulik mendek nen, ”Nit kunduk Ala ninabuwa mbake menggerak kogo o,” yinuk, Ala endage tiyappogo logowak nduk, inom aret inake eeke logowak nduk, nda'nagagerak kogo o. Ala nen yoge kagak Ndawut nen ari logonet, ”It aakumi endekem konenggulik mendek inenggela'me logonet kat tiyappagage, kat eeke menggendak ndawi piyangge logonet, kalut eeke, eerigin o,” yinuk, yereegerak nogo liiru mbangge,

¹⁰ti'nuk, ne ambi paga at ambi nen ari logonet, ”Kit aakumi endekem konenggulik mendek yi, Ala apuri miirinabeegerak kinom kiniki ale'nggen mbako logonip o,” yinuk, liiru mbangge,

¹¹ti'nuk, ambi nen ari logonet, ”Kit endekem konenggulik mendek inom, kit yi aakumi ndi aakumi inom, abok aret et endage mban wogoppogo logonip o,” yinuk, liiru mbangge,

¹²ndi, peebi at Yetaya nen yorage logonet, ”Aap Itayi ombowologwe wigannaremenggaarak paga nda'nage kenok, Ala nen it endekem konenggulik mendek abu'me piyaawak nduk, mippigin o. It nogo iniki at oba mban panggombogo logogun o,” yinuk, liiru mbangge, eereegwaarak ti paga aakumi endekem mendek inom inake eeke logowak nduk, nda'nagagerak kogo o.

¹³Aberiniki kinikime logonet, ”Kiniki luunik wonogwe nogo kola namunggup aret o,” yinuk, yokkirage kagak kiniki ale'nggen mondok alik negen logonet, eerit nugu logobagip nduk, at niniki luunik logowak nduk, eeppinanege menggerak alom unde Ala nogo nen, kit abet mbareegutak paga kiniki tayenak ale'nggen mban logobagip nduk eekkinake logogin o.

¹⁴Noreewi o. Kit kiniki mondok obeelom yi mendek ndi mendek abok aret kineenu logonet, kit-kit aret, ”At ambi mamunegak eeko logorak op,” mba'nuk, yokkirage agarik o.

¹⁵An Keritut Yetut ayeloman agagirak nogo nen, it aakumi endekem konenggulik mendek obeelom wone yorage logowak nduk, Ala nabuwa mba'nuk, unde eeppaneegerak me, wone ando yokkiragarak nogo kit abeko logobagip nduk, nagabiti lek logonet, liiru mbanggiragi o, noreewi. Maan aap Ala unde nogo nen wam obeelom kenok leenogo Ala ake warogo wogogwi iinok, wagangge nagagerak nogo kwak, an togop aret it aakumi endekem konenggulik mendek Ala wone yorage neegak, Aberiniki nen leenogo piige kenok, Ala nen wogonabuwak nduk, yorage logorak unde eeppaneegerak.

¹⁷Togop me, Keritut Yetut nimbirak kunik logonet, Ala ake eerit nage neegak, narum wonage nogo paga abe mban arit nage me, niniki ale'nggen mbake agarik o.

¹⁸An alik ambi yokkiraagin lek o. Ata, Keritut omaawi eeppanege kagak, it aap endekem mendek Ala wone abet mba'nuk, wawak nduk, Ala wone yorage, inenggela'me eerit nage,

¹⁹inagabiti warak mendek eeke, eerubok mendek eeke, Aberiniki nen omaawi eeppanege kagak eerit nage, eeke nagagirak nogo mban niniki ale'nggen ambik ee'nake me, ti mban mbininogo yokkirage agarik o. Nogo, eerit nege logonet, o Yerutalem enaagan-ambokan time nen o Ilirikum kuli aret Keritut eeke nagagerak wone abok aret yoranet nege nagagirak o.

²⁰”At eeke nagagerak wone it inenggo'lek kobak wonogwe nogo, ineenu ogwe, ndi, it konenggulik wonogwe nogo inaruk konenggwi, eerugun o,” yinuk, liiru mbanak nogo a'me lik yuwak nduk, aap ambi nen o eyak wuraketak me, aap alik ambi nen o eebe wuke nogo kokwak, an Keritut wone it aap alik nen yorogogwaarak koneneegwam time ambinom yora noorak mbarulik. Ata, Keritut endage mondok ineenggo'lek wonogwe me, time aret yora naakit mbareegirak.

²²An aap awo konengga'lek mendek mban yoranet noorak mbareegirak me, yoranet nage neegak, pekkiya waga'lek wonagagirak kwe,

²³yogondak perak, o yime yoranet noorak mbareegim nogome abu aret yoranet nage, ndi, pekkiya woraakit mbake neegak, tahun ambik eeke, eeke nagarak me, yogondak aret

²⁴o Itapaniyot noorak mbakirak me, nage logonet, pekkiigak wage neenok, time ninom niniki ale'nggen togon logominggirik, nappanubagip nduk, kiya woraagin o.

²⁵It aakumi Yakuri mendek nen obeelom wone mbogut paga mendek unde eeppiyareegerak nogo, it endekem mendek mamunirogwe iinok, it endekem konenggulik mendek nen inageerok nggween paga mendek ando it Yakuri mendek wogoroorak op me, it aakumi Makendoniya mendek inom, Akaya mendek inom, nen it abet mbakwi Ala apuri o Yerutalem inamendek lek iinok, ”Inanomat negen ninoba pinaneegwaarak me, inake kuwak eerogo piigo logowok o,” yinuk, it nen mban iniki koombunuk, ale'nggen paga kuwak eerogo piigaatak nogo, an wonok Yerutalem aa'nduk ira nage logominggirik, kiya woraagin o.

²⁸Ndi, it kuwak eerogo piigaarak nogo wonok inaani aret wogora nage logominggirik, time nen o Itapaniyot nage logonet, kit pekkiigak woraagin o.

²⁹Kiya wage neenok, Keritut ale'nggen nggwok togon noba panege kagak woraagin mbake agarik o.

³⁰Noreewi o. Ala mbareegerak paga kiya wage logominggirik, ninom niniki ale'nggen paga yonggonggolaakit mbakirak me, it aakumi Yureya mendek, ”Ala wone woorak nineebi o,” yinuk, taganogo mbo pogo menggaarak nogo nen nookwi iyo, Ala narum wonage kagak, it abet mbakwi Ala apuri o Yerutalem mendek inake kuwak aago wogora nage nogo iniki ale'nggen paga kolaawak nduk, nit ninowe endagembogut Yetut Keritut abet mba'nuk, Aberiniki nen eeppinanege kagak niniki-kiniki kunik eeko monggoorak me, an nake tamban eekkolage neegak, kit togon nake tamban eeko logonip o obak!

³³Ndi, wone ti abu aret yokkiragarak me, at niniki ugun obeelom logowak nduk, eeppinanege menggerak Ala nogo nen, kit abok aret kinarum logogin o. Amin.