Read Wano OROMA 16 Bible Online

OROMA 16 - Wano bible

OROMA 16

¹Nit niniri kwe Pebe nogo nen Ala apuri kuwak eeppunuk tamban eeko menggam o Kenggeriyak time mondok iya negen yeenggwaarage menggerak me, kinom logobagip nduk, nappi wagi ti o.

²At kwe ti nen aakumi ambik yeenggwaarage logonet, an togon yeenggwanege nagaarak me, at nen, ”Yogop eeppaniyak o,” ari kenok, yeenggwaagwi, ndi, it Ala apuri nen inoreewi abet mbakwi nogo keyage warogo waganako mengga kwak, ”Kwe ti ninowe endagembogut abet mbareegerak me, nit mendek aret o,” yinuk, waganggwi, eeko logonip o.

³Kat Akwila kakweeluk Peritikila kimbirak an ninom ndak-ndak Keritut Yetut ake eeko nogoorak nogo paga keyage wappinagagi o.

⁴Nit nen ninom ninooriyak mbaka'lek logonet, nagap ndareegutak me, ”Wa,” yinuk, keyage wappinagage agarik o. An nalik nen mban yokkirage lek o. Ata, it endekem konenggulik mendek nen abet mba'nuk kuwak eerit nogo menggaarak nogo abok aret an ninom nen, ”Wa,” yinuk, keyage wappinagago ogoorik o.

⁵Ndi, it Ala apuri kit kiname kuwak eeko menggaarak nogo inom keyage wappiigi o. Kat Epanetut perak, o Akiya yi awi ndi awi time Keritut wone awo abet mbaka'lek iigak, kat kaa'nduk abet mbareegindak me, an niniki kunik kenok, keyage wappagagi o, nore.

⁶Kwe Mariya togon aaninggin kagak kit kinake nggwiirit-nggwaarit eeke nagaarak me, keyage wappigi o.

⁷Kit Anderonikut Yuniyat kimbirak an awo abet mbaka'lek neegak, kit aa'nduk abet mbakwi, Yetut nen nappinagage mbareegi, nappiigak inenggela'me inoweewi negen tiyanak aret wonogwe, ndi, kit an ninom keele maarogo mambinaneegwaarak wonogwe, eereegurak nogo paga, kit an noreewi lombok aret me, keyage wappinagagi o.

⁸Kat Ambeliyatut ti, nimbirak ninowe Yetut ninom kunik menggoorak nogo kenok, niniki kunik logonet, keyage wappagagi o, nore.

⁹Ndi, kat Urabanut ninom Keritut kunik logonet, ninom ndak-ndak ake eeko nogoorak nogo inom, nore Itakit niniki kunik wonage nogo inom, kimbirak keyage wappinagagi o.

¹⁰Kat Apelet ti, Keritut kiniki kunik logonet eeke menggendak kobaabut nineenu me, keyage wappinagage, kit Aritobulut apurilogwe keyage wappinagage,

¹¹kat Keroriyon an noreewi mendek aret me, keyage wappagage, ndi, kat Narakitut it Yetut wone waganeegwaarak kinom monggotak nogo keyage wappinagage, eeki o.

¹²Kit kumi Teripena Teripota kimbirak ninowe Yetut ake yanggonak mban eeko monggotak nogo inom, niriluk Peritit kunduk ninowe Yetut ake nggwiirit-nggwaarit eeke logonet, yanggonak mban eeke menggendak inom, keyage wappinagagi o.

¹³Kat Aruput ti, it aakumi Keritut inom kunik wonogwe nogo nen Ala ake eerok negen eekwi iigak kwe, kat perak, mondok iya negen eeke menggendak me, kat kunduk, ndi, kat kagalo ti an nagalo negen ee'nake menggerak me, at kunduk, kimbirak keyage wappinagagi o.

¹⁴Kit Atinggeritut togon, Pelegon togon, Keremet togon, Paterobat togon, Keramat togon, kit kinoreewi kinom wonogwe Ala apuri nogo kinom abok aret keyage wappinagagi o.

¹⁵Kit Pilologut togon, Yuliya togon, Neriyut togon, at awuluk kolaga Olimbat togon, ndi, it abet mbakwi Ala apuri kinom monggotak nogo abok aret kinom keyage wappinagagi o.

¹⁶Kit nen keyage wat-wat eeko logonet, ”Ala apuri o,” yinuk, kuluk-kambuk yogo logonip o. Ndi, it Yetut endage paga kuwak eeko menggaarak nggereya lombok yime nen abok aret keyage wappinagaga o.

¹⁷Noreewi o. Kit nen liippunuk eeko logobagip nduk, an wone yi yokkira o. Kit wone waganeegutak nogo it aakumi nen woorak ineebi nen mbo punuk, aakumi iniki ogoorogo piinet nugwi, it aakumi abet mbareegwaarak nogo iniki abut laganogo piinet nugwi, eeginabit nugwi iyo, kinigen liippiigo logonip o. It aap ti, kinom lambungga'lek mondok ogoorak aret logonip o.

¹⁸It aap togop eerit nugu menggaarak mendek nogo ti, ninowe Keritut ayeloman logonet, ake eerit nugwi lek o. Ata, ineebe op logowak nduk, inaanogum ake mban kwaarit nogo logonet, ”Yogop eeruwok, ndogop eeruwok,” yinuk, inoone yanggorogon amburu ndik-ndik paga pilit pugunogo it aap iniki ugun mendek nogo inambokan laganit nogo menggaarak me, kinom ogoorak aret logonip o.

¹⁹Kit obeelom wone wappunuk, mondok ndak-ndak eerit nogwe nogo it aakumi abok nen konenggaarak me, niniki ale'nggen ambik ee'nake kwe, kit kiniki warak a'nuk, maluk eeriyak wone nogo kobak eerogo punuk, obeelom eeriyak wone kenok mban eerit nogo logobagip, mba'nuk, yokkirage agarik o.

²⁰Ti eerit nogwe paga nit niniki ugun obeelom logowak nduk, eeppinanege menggerak Ala nogo nen Ibilit kinabu'me tebenak logowak nduk, mbet-mbet mondok aan lebenogo pigin o. Ninowe Yetut Keritut ninabuwa nen obeelom ee'ninake menggerak me, kinarum aret logogin o.

²¹At nimbirak Ala eyabu ndak-ndak eeko monggoorak Timotiyut nogo nen keyage wakkinake, ndi, an noreewi mendek Lukiyut togon, Yaton togon, Totipatet togon, it nen keyage wappinagaga o.

²²At Pawulut nen, ”Togop mbanu o,” yo'nege kagak, liiru yi mbanggirage an Teritiyut nogo nen, ninowe endagembogut ninom niniki kunik me, keyage wappinagagi o.

²³An aap Nggayut ka wagarak nimbirak wonage nogo inom, it Ala apuri at ame inom kuwak eeko menggaarak inom, abok nen aret keyage wappinagaga o. It aakumi o yime menggaarak inake wu kuwak aago porogo menggerak aap Eratut awot Kuwarutut imbirak nen keyage wakkinaka o.

²⁴”Ninowe Yetut Keritut kinabuwa nen obeelom eekkinake menggerak me, kinarum aret logogin o,” yinuk, amin.

²⁵O maan Ala iniki mbareegerak aakumi ineenggo'lek kiraarak wonagagerak kin eeppereegerak wone nogo ti, an nen Yetut Keritut eereegerak obeelom wone yokkiragarak nogo ndak-ndak aret me, ti paga kiniki panggombunuk, abet mbareegutak paga Ala nen kiniki nu'lek agago pinagarak op me, ”Ala wa,” yinuk, alut eeko logonip o.

²⁶Maan wone kiraarak wonagagerak kwe, yogondak at kanggeelik eenik itok menggerak Ala nogo nen ari kenok, Ala wone yorogo nogogwaarak nabi-nabi nogo nen liiru mbanggo nogogwaarak paga, yi aakumi ndi aakumi abok aret iniki abet mba'nuk waganggo logomenggaarik, liirogon eerit nogo logowak nduk, pagak yereegerak me, yokkirage agarik o.

²⁷”At Ala alik iniki warak mondok eenu menggerak me, Yetut Keritut eereegerak paga nit at Ala endage mondok-mondok tiyappogo logowok o,” yinuk, amin.