Read Wano OROMA 2 Bible Online

OROMA 2 - Wano bible

OROMA 2

¹Noreewi o. It ando kenok mban maluk agago piigo ogotik? Kit togon maluk eekulik ti lek o. Eeko monggotak aret me, kit ambi nen it eekwi togop eeko logonet aret kwe, it mban maluk agago piigwi kenok ti, kit aret maluk eekkologwe yi kogo ogotik?

²At Ala nen ti, aakumi maluk togop eekwi iinok, liirogombo aret maluk onggo wogorage menggerak nineenu aret o.

³Nineenu aret me, wologwe! Kit togon togop aret eeko logonet kwe, it ambi eekwi iinok mban maluk agago piigwi kiinok ti, kit kunduk onggo maluk eekkinabigin lek nduk yogo ogotik ya?

⁴At Ala nen onggo mbet-mbet maluk eeppinagaga'lek kinabuwa nen iniki yanggoppunuk, puk aret wonage me, at oone ti meek eerogo puurak nduk yogo ogotik? Kit maluk eekwi kiniki koombunuk, mbo pubagip nduk, kinabuwa nen tokkiige yi kogo ogotik?

⁵Ala iniki togop mbake kwe, kiniki omaawi kinogogumbuk wonogwe kiinok, Ala anini nen onggo maluk liirogombo aganake ti eyom paga abunuk nggwok togon eekkinaburak nduk eekkologwe kiigi o.

⁶At Ala nen eerumenggaarak ndak-ndak aret onggo wogoraagin o.

⁷Ndi, it aakumi ando nen mbako logonet, ”Ala nen tiyappinanege logonet, ninayuk warak agago nabelan-kabelan wo'niraagin o,” yinuk, iniki mondok kwippunuk, obeelom mban eerit nogwe iinok ti, Ala nen ineenik mondok logorak mendek wogoraagin o.

⁸Ndi, it ando inobalombok mban eekkoloorak koombunuk eerit nogo logonet, Ala wone yereegerak nogo mugurok naga'lek, maluk mban eekwi iinok perak, Ala nen, ”Aap yi abu maluk aret o,” yinuk, anini nen maluk eeginabigin.

⁹It yi aakumi ndi aakumi maluk eeko menggaarak abok aret andi-pandi aganake, aaninggin-paaninggin agago piige, eerigin ti Yakuri mendek eepiige logonet, aakumi endekem konenggulik mendek inom ndak-ndak eeppiyaagin kwe,

¹⁰it aakumi obeelom eeko menggaarak kenok perak, Ala nen tiyappiige logonet, inayuk warak agago iniki ugun obeelom logowak nduk, it Yakuri mendek eeppiige logonet, aakumi endekem konenggulik mendek inom abok aret ndak-ndak eeppiyaagin o.

¹¹At Ala ti, aakumi ineebe obeelom kero mban maleninakeelik me, togop aret eeginabigin o.

¹²It aakumi endekem konenggulik mendek ti, at Ala nen Muta lengganogo yoreegerak wone ineenggo'lek logonet, maluk eeko logomenggaarak paga ineebe kobak arugun kwe, it Yakuri mendek perak, at Muta yoreegerak wone ineenu logonet kwe, maluk eeko logomenggaarak me, at Ala nen wone yoreegerak ti paga iniki panggombunuk iniki kwaake logominggirik, owak looninabigin.

¹³At Ala nen Muta yoreegerak wone nogo ti, we inaruk mban konenggwi paga lek o. Ata, inikime nen liirogon wappunuk eebe aret eerit nogwe paga Ala nen, ”Aap ti obeelom aret kagi o,” yinuk, mbake menggerak.

¹⁴It aakumi endekem konenggulik mendek nogo nen, at Muta yoreegerak wone nogo kobak logonet kwe, it iniki nen at yereegerak wone nogo ndak-ndak aret eekwi kenok ti, kobak logonet kwe, at yereegerak nogo aret eekwi me,

¹⁵Muta yoreegerak wone ti, muk inikime wonage negen logonet eekwi iigo ogoorik o. It eekwi ti, inikime abe'nage logonet, ambi, ”Maluk eekirak kagi,” ndi, ambi, ”Obeelom eekirak kagi,” yinuk, inikime abe'nage ti paga Ala nen wone lengganogo yoroolik aret kwe, inikime abet aret wonage negen kogo ogoorik o.

¹⁶Ndi, an yorage minggirak ndak-ndak at Ala nen, it aakumi inikime kote koonggwi nogo Keritut Yetut nen owak looninaburak nduk mippereegerak nogo owak looninake eyom paga, ”Ti obeelom eekirak kagi, ti maluk eekirak kagi,” yinuk, inikime nen abe'nage kaagun o.

¹⁷Kit Yakuri mendek perak, nonggop mbako ogotik? Kit Yakuri mendek yi, Ala nen lengganogo yoreegerak wone nogo paga, kiniki panggombunuk, ”Ala ti, nit mban ninogoba aret o,” yinuk, wogoppakwi,

¹⁸”Ala iniki mbake menggerak nogo nineenu o,” yinuk, yogwe, Muta lengganogo yoreegerak wone nogo paga, ”Yi obeelom o. Yi maluk o,” yinuk, yelok kogwe,

¹⁹”Nit yi aakumi inigen mbuk mendek tu pigiren nogwe, o apit paga nogwe nogo eya paga nawak nduk eya aganakwi, eeko monggoorak, nit aret o,” yinuk, yogwe,

²⁰”Ala nen yereegerak wone Muta lengganogo yoreegerak nit aret porogo wonogwe me, nit mban nineenu,” yinuk, mbako logonet, aakumi kobak mendek mamunirogwe, wologwe-aabologwe luunirogwe, eeko logonet kwe,

²¹kit mamunggolaga'lek logonet inambik kenok mban mamunirogwe ti, nonggop nduk eeko monggotak? Kit nen aakumi mamunirogo logonet, ”Yogoot waganggwi ti mage o,” yorogo logonet kwe, nonggop nduk kit nen aret yogoot waganggo monggotak?

²²Kit nen aret, ”Mbabi eeriyak mage o,” yorogo logonet kwe, nonggop nduk kit aret mbabi eeko monggotak? ”Kuguwak ogobakkigirik ogole o,” yinuk, yogo monggotak kwe, kit aret kugi awi wurik me unggunuk, eebe ogobakkigirik nogo kiraakkologo monggotak nogo lek?

²³”At Muta yereegerak wone unde nit aret o,” yinuk, yogo logonet kwe, Ala oone taganogo punuk, eebe meek eerogo pugwi ti, nonggop nduk eeko ogotik?

²⁴”Kit eekwi paga it endekem konenggulik mendek nen Ala endage miyuk-meya eerogo pugwi o,” yinuk, liiru mbanak wonage nogo kit Yakuri nen aret eekwi kiigi o.

²⁵Kinagabolo mbanggwi ti, at Muta yoreegerak wone waganggo logonet mbanogo nappuurak op aret kwe, wone yugu nogo taganogo mbo pogo logonet mbanggwi kenok perak, aanom warogo aret mbanggwi me, kinagabolo mbanak wonage kwe, mbanak lek negen eerogo pakwi kiigi o.

²⁶Ndi, it inagabolo mbanggulik mendek nogo nen Muta yoreegerak wone nogo waganggo nagaatik, ndak-ndak eerit nogo menggaarak kenok, Ala nen, ”It aap yi, inagabolo mbanak lek aret kwe, mbanak negen aret wonogwe o,” yinuk, wogonabigin lek mbakop?

²⁷Togop me, kit Yakuri ti, Muta yoreegerak wone liiru mbanak unde logonet, kinagabolo mbanggo monggotak kwe, eebe eeka'lek taganggo monggotak me, it inagabolo mbangga'lek menggaarak nogo nen wone eebe aret eekwi me, kinenggali wappinagagun lek mbakop?

²⁸It Yakuri ineebe abe nen ndarak inagabolo abe mbanak, taani o? Lek o. Ineebe ndarak we inagabolo mbanak ti paga, ”Yakuri mendek ineebe aret o,” yogwe lek o.

²⁹”It Yakuri mendek aret o,” yogwe nogo ti, Muta yoreegerak wone waganggwi paga lek o. Ata, inagabolo mbanggo mengga kwak, at Ala nen Aberiniki paga iniki amburu mbangge ti perak, abe Yakuri mendek nogo ti aret o. It aakumi iniki togop Ala nen amburu mbangge ti, it aakumi nen wogoppiyoorak lek o. Ala nen mban wogoppiyaagin o.