Read Wano OROMA 5 Bible Online

OROMA 5 - Wano bible

OROMA 5

¹Yogondak niniki at oba panggombunuk abet mbakwi paga at Ala nen obeelom agago pinaneegerak me, ninowe Yetut Keritut eereegerak paga ninikiigun tayenak Ala ninom kunik aret ogoorik o.

²Ala iniki kunik nen onggo lek we aret wo'nirage menggerak nogo ti, nit niniki abet mbakwi paga kolaawak nduk niniki tu paarogo pinaneegerak wonogwe me, Ala tiyanak minggi kwak, nit togop ndak-ndak tiyappinaniyak niniki luunik logonet, ale'nggen mbakak logowok o.

³Ti mban ale'nggen mbako logorak lek o. Ata, piyak-payak eerogo pinanugwi ti, niniki kwi'ndak logonet, waganggo logorak nduk eeppinanugwi nineenu me, eeppinanugwi iigak, ale'nggen aret mbako logowok o.

⁴Ndi, niniki kwi'ndak logonet, waganggwi ti paga at Ala nen, ”Aap yi abut mbanggirak kwe, iniki yanggonak logonet wagangge me, op aret kagi o,” mbake kagak, at aap nogo nen, ”Ti ari paga Ala nen wo'nabigin abet aret kagi,” mba'nuk, iniki abu luunik aret menggerak.

⁵Ndi, niniki luunik togop wonage me, at Ala nen Aberiniki wo'niragagerak ti paga at Ala iniki kunik nen mondok alik ninabuwa mbake menggerak nineenu logonet, niniki luunik wonogwe nogo kolaagun aret me, niniki piirik logorak lek o.

⁶Nit nen ninagap ndakkoloorak abu meek tit niigak, Ala nen, ”Yetut ti eyom paga waruwak o,” yinuk, koonogo pereegerak nogo eyom a'me lik yi nage mbareegi, nit maluk eeko monggoorak ninake aret kambeegerak.

⁷Aap ambi aakumi inabuwa nen obeelom mban eeppiinet nage menggerak nogo, wariyak eekwi kenok, at ore ambi nen ili ari logonet, ”At warukwak, an aret noo'nip o,” yinuk, kambuurak agabiti lek, togop yuurak op aret kwe, aap ambi aakumi inabuwa mbaka'lek we wone yugu kenok mban liirogon eeke menggerak mendek wariyak eekwi iinok perak, ili yuurak meek negen aret kwe,

⁸at Ala nen perak, nit maluk eekwi niigak, Keritut ninake kambeegerak ti paga Ala nen ninabuwa nggwok togon mbake menggerak kogo ogoorik o.

⁹Ndi, yogondak at amiya paga obeelom agago pinaneegerak me, ”Peebi Ala nen ninagap ndarigin lek, anini eeppinanigin o,” yinuk, yogo ogotik? Lek o. Ninagap ndarigin aret mbako logowok o.

¹⁰Ndi, nit Ala ninom ogoorak wonogwe niinok, at aput ninake kambeegerak paga nen, Ala ninom lambunogo pinaneegerak me, yogondak ninom kunik wonogwe nogo, Keritut eebe eenik agagerak aga ninagap ndarigin lek me nduk, yogo ogotik? Lek o. Ninom kunik wonogwe me, ninagap ndarigin aret o.

¹¹Ti eereegerak paga mban ale'nggen mbako logorak lek o. Ata, ambi nit ninowe Yetut Keritut eereegerak nogo paga Ala ninom lambunogo pinaneegerak me, ”Ala wa,” yinuk, ale'nggen mbako logowok o.

¹²Aap Aram maluk eereegerak paga nit yi aakumi ndi aakumi abok maluk eeko nogogurak. Ndi, at maluk eeke nagagirik, kambeegerak nogo kokwak, nit abok aret maluk eeko nogogurak paga, kanggwi alom ninoba wigak yereegerak me, kanggo monggoorak.

¹³Ala nen wone Muta awo yoga'lek kagak, maluk eeko nogogwaarak kwe, wone lengganak awo yoga'lek wonagagerak me, it maluk eekwi nogo, Ala nen eenggi linggingga'lek aret wonagagerak.

¹⁴Eenggi linggingga'lek aret wonagagerak kwe, at Aram wonagagerak kuli nen, nok, Muta wonagagerak kuli paga it aakumi abok at Aram nen Ala oone taganogo punuk, maluk eereegerak ndak-ndak it nen togop eerulik kwe, kagak, it kunduk kanggwi alom inoba wigak yereegerak me, kambit nogo nogogwaarak. At Aram eereegerak nogo ti, at peebi eeri woroorak ogut wakkagak aret eereegerak.

¹⁵At Aram nen Ala oone taganeegerak nogo ti, Ala nen onggo lek we aret wo'niragagerak nogo, imbirak ndak-ndak lek o. At Aram alik nen maluk eereegerak paga, nit aakumi abok aret kanggo monggoorak ti iya negen kwe, at Yetut Keritut alik nina buwa nen ninake eereegerak paga, Ala iniki kunik nen nit yi aakumi ndi aakumi abok aret onggo lek we aret obeelom eeppinanege megerak nogo ti perak, mondok iya o!

¹⁶At Ala nen onggo lek we aret wo'niragagerak paga obeelom eeppinaneegerak inom, ndi, Aram eereegerak paga ninoba wigak yereegerak nogo inom, ti ndak-ndak lek o. Abu alitak aret o. At Aram nogo, ne ambit iluk maluk eereegerak paga, Ala nen owak loonogo maluk onggo eeppereegerak kwe, nit perak, kulinik-kalinik maluk eekwi niigak kwe, ninabuwa nen onggo lek, we aret wo'niragagerak nogo paga, ”Kit obeelom aret kiigi o,” yinuk, yo'nirage menggerak.

¹⁷Aap ambit maluk eereegerak paga kanggwi alom nit abok ninoba wigak yereegerak me, kanggo monggoorak ti, abet aret kwe, aap ambi Yetut Keritut nen eereegerak paga Ala iniki kunik nen ninabuwa nggwok togon mbake logonet, obeelom eerogo pinanikit nduk, onggo lek we aret wo'niragagerak nogo waganggwi niinok, kambugun mbakop? Mondok lek o. Nit mondok-mondok nineenik aret logogun me, at eereegerak perak, iya o.

¹⁸Ti kenok, at Aram nen Ala oone taganeegerak paga, nit aakumi abok maluk agago pinaneegerak ti kokwak, at Yetut nen obeelom eereegerak paga, nit aakumi abok nineenik logowak nduk obeelom eerogo pinaneegerak.

¹⁹At Aram nogo Ala nen yoreegerak ndak-ndak eerulik maluk eereegerak paga nit aakumi abok maluk eeko nogogurak nogo kwak, yogondak togon togop aret at Yetut nen Ala oone liirogon eereegerak paga, nit aakumi abok aret obeelom agago pinanikit nduk eereegerak kogo o.

²⁰It aakumi maluk mban eeko nogogwaarak nogo, ”Maluk eekirak o,” yinuk, iniki aaninggin eeruwak nduk, Muta peebi nen, ”Ala nen, Yogop eerugup, ndogop eerugup,” yinuk, inaruk wareegerak nogo konembunuk, inanini nen, ”Nineebi o,” yinuk, taganogo punuk maluk nggwok eerit nogo nogogwaarak kwe, maluk nggwok eerit nogwe iinok, Ala nen inabuwa nggwok togon mbake nagagirik, iniki kunik nen obeelom eeppiinet nege nagagerak.

²¹Maluk eerit nogo nogogurak paga kanggwi alom ninoba wigak yereegerak nogo pogom, yogondak ninowe Yetut Keritut nen eereegerak paga obeelom agago pinaninuk, mondok nineenik logowok nduk, Ala iniki kunik nen eeppinanege menggerak wone nogo ninoba wigak yereegerak wonage o.