Read Wano OROMA 6 Bible Online

OROMA 6 - Wano bible

OROMA 6

¹Ti kenok, ngge negen yuwok? Lek o. Ala iniki kunik nen nggwok togon obeelom eeppinanege kaawok nduk, niniki nen maluk eeriyak koombunuk, maluk mban eerit nogo logowak mbakop?

²Mondok lek o. Nit maluk eeko nogogurak nogo ambinom eeriyak mban ee'ninake kero, aakumi kanggwi kokwak lek agagerak kagak, nonggop togon maluk mban eerit nogo logorak mbakop?

³Keritut Yetut kinom kunik logonet, niyoome wambeegutak ti kwak, at kambeegerak nogo, ”Ninom kunik me, ninom aret kambeegurak kagi,” yinuk, mbaka'lek logonet yogo ogotik? Lek o.

⁴Keritut kangge mbareegi, ndoome pi nogogwaarak nogo ti, at ninom ambit kunik me, ninom kanggo mbareegu, ndoome pinani nogogwaarak kwe, nineenik ngget mendek aruwak nduk, at ogoba Ala omaawi ambik menggerak nogo paga, kanggo menggam nen eenik agago mippege logonet, at ninom kunik me, ninom aret mippinaneegerak.

⁵At ninom nineebe ambit kunik logonet kambeegurak me, at eenik eerogo mippereegerak nogo kokwak, nineebe at ninom kunik me, nineenik eerogo mippinanigin lek mbakop? Lek o. Mippinanigin aret o.

⁶Aap ninowe ambit nen awuri yorage kenok eeko mengga kwak, niniki maan mendek nen maluk mban eeriyak ee'ninake nogo, ambinom eerit noorak ee'ninake kero, omaawi lek eerogo puwak nduk, Keritut ninom eyo karo-karo paga ninooreegwaarak nineenu me, yokkirogo ogoorik o. Aap ambi eenik kagak, iniki maan mendek nen maluk eerikit nduk koongge menggerak kwe, kangge kenok perak, iniki togop koonggeelik o. At Keritut aakumi kanggo menggam nen eenik agagerak me, peebi kambigin mondok lek o. At kangge logonet, kanggwi alom nogo lek eerogo pereegerak nogo paga, peebi kambigin lek nineenu me, nit Keritut ninom abet aret kambeegurak mbakwi kenok, peebi at ninom nineenik logogun abet aret mbako logowok o.

¹⁰At Keritut kambeegerak nogo ti, nit maluk eeriyak mban ee'ninake nogo, ne ambit aret kangge logonet omaawi lek eerogo pereegerak me, peebi kambigin lek o. Ndi, yogondak eenik agagerak nogo ti, Ala yoge kenok mban eeke logokit nduk, eenik agagerak.

¹¹Ti eereegerak ndak-ndak, nit kunduk maluk eeriyak mban ee'ninake nogo, ee'ninakak eeke kero nduk, kambeegurak me, Ala yo'nirage kenok mban eeko logowok nduk, Keritut ninom kunik logonet, nineenik ogogurak mbako logowok o.

¹²Ti kenok, kinagabolo lek ariyak mendek kagak kiniki nen nengge nogo mugurok nogo logonet, maluk eeriyak mban eekkinake kero, tebenogo mbo pogo logonip.

¹³”Maluk eeriyak ee'ninake nogo, nineenggi-niniyok paga eeriyak op aret o,” yinuk, wondet agago mbo pugup o. Ata, aakumi kanggaatak ineenik agago mippiigo mengga kwak, obeelom mban eerit nogo logobagip nduk, kineebe apit aret, Ala mban wogo'nuk logonip o.

¹⁴Ala nen Muta yoreegerak wone nogo, yogondak kit eeko logorak kinombarulik o. Ata ninabuwa nen eeppinanege kagak eeko monggoorak me, maluk eeriyak eekkinake tit kagak tebenogo mbo pogo logonip o.

¹⁵Togop me, nonggop eeruwok o? Ala nen Muta yoreegerak wone nogo nit eekwi lek o. Ata, nit Ala ninabuwa nen obeelom eepinanege kagak eeko monggoorak me, nit maluk eeko logorak op mbakop? Ti mondok lek o.

¹⁶Wulaga ambi nen, ”Nogoba nen yo'nege kenok, eeke logokit,” mbake nagaatik, oone yanggonak eerit nage paga, ”Wulaga ti, aap nogo ayeloman aret kogo,” yinuk, yogo menggaarak kineenggo'lek me, yogo ogotik? Nogo, ndak-ndak maluk eeriyak eekkinake kenok, tebenogo pega'lek, ”Eerikit aret,” mba'nuk, eerit nogotak-nogotak irip paga kineebe aret kambit nogo monggotak kwe, Ala nen ari kenok, eerikit mba'nuk eerit nogwe kiinok perak, obeelom aret agago pinagage menggerak.

¹⁷Aap ambi nen ayeloman yoge kenok eeke minggi kwak, kit aa'nduk maluk eeriyak eekkinake kenok mban eeko nogogutak kwe, yogondak perak, wone mamunggirogogwaarak nogo kiniki paga mondok li'luk eerogo wappunuk, eerit nogwe me, Ala mondok, ”Wa,” yinuk, keyage wake agarik o.

¹⁸Maluk eeriyak eekkinake kenok, eerit nogo monggotak nogo tebenogo punuk, wondet eerogo pinagareegerak me, obeelom mban eeko logobagip nduk, Ala ayeloman eerogo pinagareegerak.

¹⁹An wone yi yokkirage ti, nit aakumi aret me, aap nen yogo mengga kwak aret yokkiragi o. Aap ambi nen ayeloman yoge kenok, eeke minggi kwak, Ala wone taganogo punuk, kiniki nen uugwe mba'nuk maluk eerit nogo logorak eekkinake kenok, kineebe ili yikkolaga'lek, ”Eeruwok aret,” mbako monggotak nogo kokwak, yogondak Ala ayeloman logonet, maluk eeka'lek obeelom mban eeko logobagip nduk, kineebe apit aret Ala mban wogo'nuk logonip o.

²⁰Kit aa'nduk maluk eeriyak eekkinake kenok eeko logonet, obeelom eeriyak ti mbaka'lek we ugun kobak aret wonogogutak.

²¹”Nit maluk eeko nogogurak me, ninagabiti o,” yinuk, yogwe nogo, ti eerit nogo logonet, irip paga obeelom ambi eekkologo nogogutak me nduk, yogo ogotik? Lek o. Ti eeko logonet, kanggwi aret wonogogutak.

²²Ndi, yogondak perak, maluk eeriyak eekkinake nogo tebenogo punuk, wondet eerogo pinagage nagagirik, Ala ayeloman logobagip nduk, eerogo pinagareegerak me, at ake leenogo pinagamenggerak logonet, kineenik mondok logorak mendek kologo logomunggup o.

²³Maluk eekwi onggo ti, kanggwi aret kwe, at Ala nen onggo lek we wo'niragagerak ti perak, ninowe Keritut Yetut ninom kunik logonet, nineenik mondok-mondok aret logogun o.