Read Wano OROMA 8 Bible Online

OROMA 8 - Wano bible

OROMA 8

¹Togop kenok, nit Keritut Yetut ninom kunik monggoorak me, ”Kit maluk o,” yinuk, yo'nirage mondok lek o.

²Keritut Yetut ninom kunik me, ninobaabut ngget mendek eeppinanege menggerak Aberiniki nogo nen aakumi maluk eekwi, kanggwi, eeko menggaarak nogo nit togop ee'ninake kero, ninagap ndareegerak.

³At Ala nen Muta yoreegerak wone nogo ninikime nen eeriyak op mbakwi kwe, nineebe ndeyak me, eeriyak meek kenok, at Ala nen nit maluk eekwi lek eerogo puwak nduk, at aput nappi wagagerak. At aput nappi wagagerak nogo ti, aap pogom logonet, maluk eeriyak eeke kagak kwe, eeka'lek wonagagerak paga, maluk lek eerogo pereegerak.

⁴Ala nen at aput nappi wagagerak nogo ti, nit ninobaabut maan mendek paga eeko logorak lek o. Ata, Aberiniki nen yo'nirage kenok mban eeko logonet, Ala nen, ”Yogop ee'nu, ndogop ee'nu,” yinuk, lengganogo yo'nirage nogo ndak-ndak a'me liirogon eeko logowak nduk Yetut aret nappi wagagerak.

⁵It aakumi inobaabut maan mendek paga logonet, iniki nen nengge kenok eeriyak mban koonit nugu menggaarak kwe, Aberiniki nen yorage kagak, eekwi iinok perak, at mbake mban eeko menggaarak.

⁶Kiniki maan mendek mban koonit nugwi kiinok, kambumunggup are kwe, Aberiniki nen yokkirage kenok mban eerit nugwi kiinok perak, kineenik mondok kiniki tayenak ale'nggen aret logomunggup o.

⁷Ti kenok, it aakumi iniki maan mendek nen eeriyak aganake kenok mban eerit nugwi iinok, Ala inom ogoorak aret wonage o. It Ala wone lengganak abu me tebe yaga'lek me, eebe liirogon eeriyak meek o.

⁸It aakumi iniki maan mendek nen eeriyak aganake kenok mban eerit nugwi nogo, at Ala iniki ale'nggen inoba piyaagin mondok lek aret kwe,

⁹kit yi perak, kiniki maan mendek nen eeriyak eekkinake kenok eekwi lek o. Ata, Aberiniki nen yokkirage kenok mban eekwi me, Aberiniki kinikime wonage kiigi o. Keritut nen Aberiniki nappi wagagerak nogo kinikime wonage lek kenok, kit Keritut apuri lek o.

¹⁰Ndi, Keritut kinikime wonage kenok perak, maluk eeko monggotak paga kinagabolo abet aret kambumunggup kwe, Ala nen obeelom agago pinagamenggerak paga, Aberiniki nen kineenik eekkinake logogin o.

¹¹Aakumi kanggo menggam nen Yetut eenik agago mippereegerak at Ala nogo nen, Aberiniki nappi wagagerak kinikime wonage kenok, at Yetut eenik agago mippereegerak nogo nen Aberiniki kinikime wonage me, kineebe kineenik agago mippinagagin aret o.

¹²Togop kenok, noreewi o. Niniki maan mendek nen eeriyak ee'ninake kenok, mugurok noorak lek o. Ata, Aberiniki nen yo'nirage kenok mban eeko logowok o.

¹³Maluk kinikime lagi wage nogo, Aberiniki nogo paga warogo wuppogo logomonggotak kenok, kineenik aret logomunggup kwe, kiniki maan mendek nen eeriyak eekkinake nogo mban mugurok nogwe kiinok perak, kambumunggup aret o.

¹⁴At Aberiniki nen yokkirage kagak eeko monggotak kenok, kit Ala apuri aret ogotik.

¹⁵Kit Aberiniki waganeegutak ti, at ayeloman abu'me kinagabiti mbakak logobagip nduk, woolik o. Ata, kit Ala apuri agago pinagawak nduk, waganeegutak kinikime wonage me, ”Ala nogoba o. Ala nogoba o,” yinuk, yogo monggotak.

¹⁶Aberiniki ninikime wonage nogo nen, ”Kit Ala apuri aret o,” yinuk, yo'nirage menggerak.

¹⁷Aap ambi kangge logonet, eyate apuri unde eeppiige minggi kwak, at Ala nen apuri unde eeppiyoorak koonogo pereegerak nogo nit at apuri aret me, Keritut ninom ndak-ndak aret unde eeppinanigin o. Ndi, at Keritut piyak-payak eerogo pugwi iigak wagangge nagagerak nogo kokwak, nit ti ndak-ndak waganggwi niinok, at tiyappereegerak nogo kokwak, nit togon togop aret tiyappinanigin o.

¹⁸Yogondak piyak-payak eerogo tebembinanit nugwi ti, peebi tiyappinaniyak imbirak ndak-ndak wakkoorak meek o. Peebi ee'ninaburak ti abu obeelom aret o.

¹⁹Togop me, Ala nen yi mendek ndi mendek wakkagagerak nogo nen aakumi yogo mengga kwak yogo logonet, ”Ala apuri mbet-mbet tena'me eeppiyaawak lak, ao,” yinuk, iniki luunik logonet, tokkogwe wonogwe o.

²⁰Yi mendek ndi mendek ugun mak eerak wonogwe ninigen iigwi yi nogo ti, inaburen ma'nogogwaarak lek o. At Ala nen, ”Yi mendek ndi mendek wakkagarak kwe, mbeyok yegerak me, aanom warogo wakkagarak kagi!” yinuk, iniki nen aret mak eerogo mbo piyareegerak wonogwe o.

²¹Yi mendek ndi mendek, Ala nen wakkagagerak nogo nen, ”Ki logowok lak, ao,” mbakaatak kwe, mbuk age, ”Nineenik logowok lak, ao,” mbakaatak kwe, kanggwi, eeko menggaarak nogo nen aakumi nen yogo mengga kwak yogo logonet, ”Ala apuri nabelan-kabelan eerogo piige logonet, nit togon ki eerogo pinanigin o,” yinuk, iniki mondok luunik aret wonogwe o.

²²Ala nen yi mendek ndi mendek wakkagagerak nogo o maan nen, nok, yogondak kuli paga kumi nen elege enegen paganak yagan wako mengga kwak, ndak-ndak aret yagan wakwi wonogwe yi kogo ogotik?

²³Yi mendek ndi mendek at Ala nen wakkagagerak nogo ti, it inalik mban, ”Ao,” mbakwi lek o. Nit togon Ala onggo lek we aret eeppinaniyak mbake menggerak nogo eebe peebi nen eeppinaniyak nduk, Aberiniki aa'nduk aret wo'niragagerak porogo wonogwe me, peebi nineebe at apuri aret me nduk, wo'ninake logonet, ninagabolo nggonenogo mbo punuk, ngget mendek yippinanigin me, ”Ao,” yinuk, tokkogo ogoorik o.

²⁴Niniki luunik ambi, ”Nenegen kaakit lak, ao,” mbakwi nogo kogo logomonggoorik, ti'nuk, niniki luunik logogun lek o. Niniki luunik nogo muk kogoorak me, nonggop togon koorak nduk niniki luunik logorak mbakop?

²⁵Ninigen kaga'lek mendek kaawok nduk, niniki mondok kwippunuk, tokkogo monggoorak nogo lek a?

²⁶Togop me, nit lebenak wonogwe niinok, Aberiniki wage nagaatik, yeenggwaanirage menggerak me, ”Nit nonggop negen tamban eeruwi?” mbakwi niigak kwe, at Aberiniki perak, ninabuwa nen iniki puru ari logonet, nit ninoone yogolik mendek paga ninake Ala yoge menggerak.

²⁷Aberiniki nogo nen Ala iniki mbake ndak-ndak aret it abet mbakwi Ala apuri inake tamban eeke menggerak me, at aakumi iniki liippiige menggerak Ala nogo nen Aberiniki mbake nogo eenu aret o.

²⁸Nit Ala iniki mbake ndak-ndak eeko logowak nduk, ninayonggo pinaneegerak nogo, at ninom niniki kunik niinok, yi mendek ndi mendek eekwi inom, eeppinanugwi inom, ti abok at Ala nen nit obeelom eeriyak ambi kaawak nduk, eeppinanege menggerak.

²⁹At Ala nogo nen nit at awuri apit ninowe manggu pogom logowak nduk, nineebe nda'naga'lek niigak, at aput obaabut pogom aruwak nduk, mii'ninake nagagirik, leenogo pinaneegerak.

³⁰Nit mii'ninake nagagirik, leenogo pinaneegerak nogo aret ninayonggo pereegerak. Ndi, ninayonggo pege nagagirik, obeelom agago pinaneegerak. Obeelom agago pinanege nagagirik, at ninom tiyanak logowak nduk, koonogo pereegerak.

³¹Ti kenok, wone abok yokkiragarak ti paga, nonggop yuwok mbakop? Ala ninom kunik wonogwe me, ta nen maluk ee'ninabigin mbakop?

³²At Ala aput ambolom aret kwe, ili yuulik nit ninake waruwak nduk wuppi wagagerak. Wuppi wagagerak me, yi mendek ndi mendek ngginu-ngginu eerogo wo'niraagin lek nduk yogo ogotik?

³³Nit mii'ninabeegerak Ala nogo nen, ”Kit maluk lek aret o,” yinuk, yo'nirage me, ta nen, ”Kit maluk o,” yinuk, yo'nirage kero nduk, yogo ogotik?

³⁴Ndi, ”Kit maluk o,” yo'niroorak lek kenok, ta nen maluk ninoba lenggenogo puurak mbakop? Lek o. At Yetut kangge mbareegi, eenik eerogo mippereegerak me, yogondak ninogoba Ala imbirak logonet, ninili ari menggerak ti, Keritut Yetut nogo lek a?

³⁵Keritut ninabuwa nen ninom niniki kunik lombok wonogwe me, ta nen ogoorogo ninalitak ee'ninabigin mbakop? Andi-pandi ninoba wangge, aaninggin-paaninggin ninoba age, piyak-payak eerogo pinanugwi, mbi noogelo ee'ninake, ninageerok ndinggologo logonet, we ninagap mbelanak eerogo pinanugwi, wim kurumbi yo'nirogwe, karugum nen eerogo ninookwi, ti mendek abok aret eeppinanumenggaarak paga nen Keritut ninom ogoorogo pinanugun mbakop? Mondok lek o.

³⁶”Ndomba wam wariyak nduk leenogo pogo mengga kwak, kat kake kulinik-kalinik ninooko agaarik o,” yinuk, liiru mbanak nogo ndak-ndak

³⁷eeppinanit wogwe iigak, Keritut ninabuwa nen iniki kunik wonage me, waka'ngget negen mondok tiyanak aret wonogo ogoorik o.

³⁸Nit ninowe endagembogut Keritut Yetut mondok ninom kunik wonogwe niinok, Ala ninabuwa mbake menggerak me, nineenik wonogwe inom, kanggwi inom, it melaikat mbogut paga yonggo nugu menggaarak inom, yi kugi ndi kugi inomaawi warak menggaarak inom, yogondak wonage inom, peebi eerigin inom, mbogut paga mendek inom, nggween paga yime mendek inom, yi mendek ndi mendek ogobakkigirik abok nen Ala ninom ogoorogo pinanigin mondok lek o, yinuk, abet aret yokkirage agarik o.