Read Wano 1 KORINDUT 1 Bible Online

1 KORINDUT 1 - Wano bible

1 KORINDUT 1

¹Kit Ala apuri o Korindut kuwak eeko monggotak nogo, nit wone ambi yokkiraawi o. Kit Ala apuri logobagip nduk, kinayonggo pinaganuk, Keritut Yetut eebe paga kumbinagage nagagirik, leenogo pinagareegerak inom, it yi awi ndi awi, ”Ninowe Yetut Keritut aret o,” yinuk, yogo menggaarak kinom abok aret Ala iniki mbareegerak paga an Pawulut Yetut Keritut ayonggo nappiigak mendek agago paneegerak me, ninore Totenet nimbirak nen yokkirogo o. Yetut Keritut ti, nit inom, it inom, abok ninowe aret me,

³at ninogoba Ala imbirak iniki kunik nen wokkirogwe, kiniki ugun obeelom aret logobagip nduk, eeppinagagwi, eeko logogun o.

⁴Keritut Yetut eereegerak paga Ala iniki kunik en obeelom mban eeppinagage me, an nen ko'lu-kii'me, ”Ala wa,” yinuk, keyage wake minggirak.

⁵Kit Keritut kinom kunik logonet, yi wone ndi wone yuurak inom, yi eekwi ndi eekwi kineenu eeriyak inom, abok aret unde eeppinagareegerak me, Ala, ”Wa,” yinuk, yoge minggirak.

⁶Keritut nit ninake eereegerak wone yokkirogwe ndak-ndak, Ala nen eeppinagage kagak, at ninowe Yetut Keritut wage kero tokkogwe me, Ala nen obeelom mban eeppinanege menggerak nogo, eeppinagage logonet, ambi yoboppega'lek mondok ndak-ndak eeppinagage me, an nen, ”Ala wa,” yinuk, yoge minggirak.

⁸At ninowe Yetut Keritut aakumi inowak looniyak nduk wage logonet, kit maluk eekwi me wage kero, yogondak nen nok, peebi at woroorak kuli paga kiniki mondok nu'lek logobagip nduk, eeppinagage logogin o.

⁹At aput ninowe Yetut Keritut ninom kunik logowak nduk, yonggo pinaneegerak Ala nogo nen, at eeriyak mbake nogo, alik ambi eekeelik mondok liirogon aret eeke menggerak me, niniki at oba panggombunuk, mondok nu'lek logowok o.

¹⁰Noreewi o. Kit ogoorik-ogoorak eekkologwe nogo mbo punuk, kiniki-kinoone ambit eeppunuk, lambunik logonet, eerit nogo logobagip nduk, at ninowe Yetut Keritut nen yereegerak kenok yokkira o.

¹¹At kwe Kelowe ogoni-aagi mendek nen, ”It iniki ogoorik-ogoorak yogwe o,” yinuk, yo'niri wagaarak kenok, yokkiragi o.

¹²Kit nen yogo logonet, ”An nogoba Pawulut. An nogoba Apolot. An nogoba Kepat, An nogoba Keritut,” yinuk, kinalitak mogonggologwe konengge nagagirik, yokkiragi o.

¹³Kit togop yogwe ti, at Keritut eebe mbere-kenagan wonage me nduk, yogo ogotik? An Pawulut kinake eyo karo-karo paga nooreegwaarak mbakop? Kit an nendage paga niyome wambeegutak mbakop? Mondok lek o.

¹⁴Kit ando nen yogo logonet, ”Nit Pawulut endage paga yiime wambeegurak o,” yinuk, yogwe kiyo, an nen kit abok yiime wuppinagagulik o. Ata, it aap Keriput Nggayut imbirak nogo mban yiime wuppiyareegirak me, ”Ala wa,” yinuk, keyage wake minggirak.

¹⁶Ndi, at Tepanut apurilogwe inom ti, an abet aret niyome wuppiyareegirak kwe, it ando yogwe nogo perak an kobak o.

¹⁷At Keritut nen aakumi niyome wuppiinet nege logowak nduk, an nappani woroolik o. Ata, wone obeelom wone mamuninabit nege logowak nduk nappani wagagerak me, Keritut eyo karo-karo paga wareegwaarak nogo, we aanom warogo kambeegerak mbakwi iyo, it aap iniki ngget paga inoone amburu ndik-ndik yogo mengga kwak, an togop yokkira woroolik o.

¹⁸It aakumi kanggo menggaarak nogo nen Yetut eyo karo-karo paga kembeegerak wone nogo konembunuk, ”Yi wi inoone negen agan nugwi o,” yinuk, i'ndok kanggo menggaarak kwe, nit ninagap nda'ninake nogo nen perak, wone ti, waganggwi paga, Ala ninagap nda'ninake me, ”Wone ti Ala omaawi aret kogo o,” yinuk, mbako monggoorak,

¹⁹At Ala nen ari logonet, ”It aakumi, An abok neenu, mba'nuk, koonggwi nogo, an nen it koonggwi nogo lek eerogo piige, ndi, it aap iniki ngget me, mbet-mbet yelok kogwe nogo, an nen iniki kobak eerogo piige, eerigin o,” yinuk, yereegerak liiru mbanak wonage me,

²⁰it aakumi iniki warak nogo ti, taani mbakop? It Ala wone unde ti, taani iigo ogotik? Nggween paga yime wone amburu mbanggo menggaarak ambi wonage nduk, yogo ogotik? Abu lek aret o. It nggween paga mendek nen, ”Niniki warak logonet, koonggo o,” yinuk, yogo menggaarak nogo, at Ala nen, ”It wi negen koombunuk, eekwi,” inombake kagak yogo menggaarak.

²¹At Ala iniki warak nen ari logonet, ”It aakumi nggween paga mendek iniki koonit nugwi paga, an yelok neyaagun lek o. Ata, it an noone yorogo menggaarak nogo aakumi nen, Ti aap wi inoone negen aret o, yinuk, mbakwi iigak kwe, wone nogo abet mbakwi iinok inagap ndarigin o,” yinuk, kooneegerak me, ti kenok, kiniki koonggwi paga Ala liippuurak lek o. Ata, abet mbakwi paga mban liippuurak aret o.

²²It aap Yakuri mendek nen iniki liippatuwok nduk, ”Ninagabiti warak mendek ambi kaawok nduk, eeru o,” yinuk, yogwe, it Yunani mendek nogo nen, ”It aakumi iniki warak mendek inoone konenuwok o,” yinuk, yogwe, eeko menggaarak kwe,

²³nit perak, Keritut eyo karo-karo paga wareegwaarak wone nogo mban paganogo yokkirogo monggoorak. Wone ti, it Yakuri nen konembunuk, ”Nit eeriyak non mbanogo pinanege me, woorak nineebi o,” yinuk, yogwe, ndi, it endekem konenggulik mendek nen konembunuk, ”Ti wi wone negen aret kogo,” yinuk, yogwe, eeko menggaarak kwe,

²⁴nit Ala yonggo pinaneegerak Yakuri mendek inom, Yunani mendek inom, nogo nen perak, wone ti konembunuk, ”Ala iniki warak logonet at omaawi paga ninagap ndariyak kooneegerak nogo ti, Keritut ninake kambeegerak paga aret ee'ninabigin o,” mba'nuk, yorogo monggoorak.

²⁵Aakumi nen wone aaninggin ambik me, iniki mondok kwippunuk togon kooniyak mbakwi nogo ti, Ala nen kooniyak teeluk aret kage, ndi, aakumi nen, ”Aaninggin ambik me, nit apit ninomaawi paga eeriyak op,” mbakwi nogo ti, at Ala nen eeriyak teeluk aret mbake, eeke menggerak.

²⁶Noreewi o. Ala nen awo yonggo pinagaga'lek kagak aa'nduk wonogogutak nogo kiniki abe'nip o. It aap iniki warak menggaarak inom, inayuk warak menggaarak inom, aap nagowan inendage tiyanak menggaarak inom, it aap nggween paga mendek nen, ”Iya!” inombako menggaarak nogo abok aret kit aap togoti mendek kiinok, kinayonggo pinagagulik o.

²⁷It aap, ”An neenu,” mbakwi nogo inenggali aruwak nduk, at Ala nen it aakumi iniki yunduurak mendek nogo miirinake, ndi, it inayuk warak tiyanak menggaarak nogo inenggali aruwak nduk, it aakumi tebenak mendek aret miirinake, eeke menggerak.

²⁸It aakumi nen Ala enggaanom paga wogoppakwi iyo, it o nggween paga yime menggaarak nogo mondok iya mbakwi nogo lek eerogo puwak nduk, Ala nen inendage lek mendek inom, ineebe meek inombakwi mendek inom, meek mba'nuk mbo piigwi mendek inom, aap ti mendek kenok mban miirinake menggerak.

³⁰Ti kenok, at Ala nen Keritut Yetut ninom kunogo pinaneegerak me, ninom kunik logonet, at Keritut eereegerak paga yi wone ndi wone nineenu eeppinanege agaarik o. Niniki obeelom eerogo pinanege, Ala apuri at ake logowak nduk, leenogo pinanege, ndi, keele maarak negen wonogogurak nogo wondet agago pinanege, eereegerak nogo ti, Keritut aret o.

³¹Togop me, ”Kit wogoppatiyak eekkinake kenok, ninogoba eeppinagareegerak nogo mban wogoppogo logonip o,” yinuk, yereegerak liiru mbanak ndak-ndak at mban wogoppogo logonip o.