Read Wano 1 KORINDUT 13 Bible Online

1 KORINDUT 13 - Wano bible

1 KORINDUT 13

¹An aakumi inoone amburu ndik-ndik yogo mengga kwak ari, melaikat mendek inoone ari, eeke minggirak kwe, aakumi inabuwa mbaka'lek logonet ari neenok, an niyowak toolak lek me, oone lobale nggwok mban ari menggerak ndak-ndak aret ari minggirak kagi.

²An Ala wone yorage logowak nduk, unde eeppanege, yi wone ndi wone alom neenu a'nuk, liirogon yorage, wone kote kumaarak mendek abok yelok kage, niniki abet mbake logonet, ”Puut yi keebe tayo yu o,” yinuk, yoge neenok, tayo yi nage, eeke minggirak kwe, aakumi inabuwa mbaka'lek logonet eeke neenok perak, we aanom warogo aret eeke minggirak kagi o.

³An nen nayi mendek ndi mendek abok tumburirage, ndi, Ala wone yorage paga onggo nggwok kolaakit mba'nuk, ”Neebe inom noorogo kani kumbaninip o,” yorage, eeriminggirak kwe, aakumi inabuwa mbaka'lek logonet, eeriminggirak me, onggo an ambi kolaagin mondok lek aret o.

⁴It aakumi inabuwa mbako logonet eekwi nogo ti, wone onggo mbet-mbet yoraga'lek puk wonogwe, inobaabut yanggonak wonogwe, eeko menggaarak. Ti eeko logonet ineebi-ineeba yogwe, iniki wogoppakwi, an iya mbakwi,

⁵inenggali lek eerit nugwi, nit mban obeelom eekkolaawok mbarit nugwi, inanini mbet-mbet wungge, maluk eeppiigwi kwe inikime abekwi, eerit nugwi ti mendek it aakumi inabuwa mbako menggaarak nogo ti, togop eekulik o.

⁶It aakumi inabuwa mbako logonet, eekwi ti, maluk eeriyak inikilom mbakulik o. Ata, Ala ari menggerak eerit noorak mban inikilom mbako menggaarak.

⁷It maluk eeppiigaatak kwe, inabuwa mbakwi, it-it yogo logonet, ambi ari kenok abet mbakak eekwi, iniki luunik nogo mondok eerigin aret mbakwi, eerulik kagak, ”Eekotak o,” yinuk, inoone inoba piigwi iigak, yanggo yinuk, waganggwi, eekwi nogo ti, lek aga'lek mondok kundugu tit aret eeko menggaarak.

⁸Ala nen iniki nggaganogo yorage kagak, yorogwe, inoone lalin wappunuk, yorogwe, yi wone ndi wone alom ineenu ogwe, eekwi ti, lek arigin aret kwe, aakumi inabuwa mba'nuk, eeppiinet nugwi nogo perak, lek arigin lek mondok aret logogin o.

⁹Yogondak Ala nen nit niniki nggaganogo yo'nirage kagak, mbuuluk yelok kogo nogootik, yorogo monggoorak kwe,

¹⁰peebi ee'ninaburak eyom panggoni wage kenok perak, yogondak mbuuluk yelok kenok yorogwe nogo lek age logonet, abok aret nineenu arugun o.

¹¹An elege mbuuluk wonage logonet, it elege-aabologwe inoone yogwe pogom an noone ari, it eeriyak inikilom mbakwi nogo an togop aret mbake, iniki koonggwi nogo ndak-ndak an niniki koongge, eeke nagagirak kwe, an niniki warak age nagagirik perak, it elege-aabologwe inobaabut pogom logonet eeke nagagirak nogo mbo pereegirak o.

¹²Nit yogondak wukagi yumaak me, pekkogo logonet ninetenggen liirogon kogolik nogo pogom, ninogoba etenggen aga'lumok mban kogo monggoorak kwe, peebi at eebe ninom lambumbunuk perak, at etenggen ninigen lik togon aret kaagun o. Yogondak an ando mban neenu minggirak kwe, at nen an eeke minggirak abok aret liippaninuk eenu menggerak nogo ndak-ndak, an peebi at eeke nogo abok neenu arigin o.

¹³Ti kenok, niniki abet mbakwi inom, niniki luunik wonogwe inom, aakumi inabuwa mbakwi inom, wone alom kenagan wonogwe kwe, nabuwa-kabuwa mbakwi ti perak, mondok tiyanak aret wonage o.