Read Wano 1 KORINDUT 15 Bible Online

1 KORINDUT 15 - Wano bible

1 KORINDUT 15

¹Noreewi o. Yogondak an wone obeelom wone aa'nduk yokkiragagirak waganeegutak paga kiniki panggombunuk wonogwe nogo an aberogo yokkira o.

²Yokkiragagirak nogo kit nen mondok nu'lek porogo logomonggotak kenok, wone ti paga kinagap ndarigin kwe, abet mbaka'lek logonet we aanom warogo waganeegutak kwa?

³Togop me, an wone waganeegirak kit mondok iya mbarubagip nduk yokkirage nagagirak nogo eebe yi o. Ala wone yereegerak liiru mbanak ndak-ndak, nit maluk eekwi niinok, at Keritut ninake aret kambeegerak.

⁴Kangge mbareegi, at eebe waganogo ndoome mambereegwaarak. Mambogo mbareegwa, Ala wone liiru mbanak ndak-ndak nogo mbere yinuk, eenik agago mippereegerak.

⁵Mippege mbareegi, at Yetut nen Kepat enegen kaawak nduk, nikkage nagagirik, ti'nuk, peebi it 12 nogo inigen kaawak nduk, nigiyareegerak.

⁶Nogo nigiige nagagirik, ti'nuk peebi nen ninoreewi ineebe ambik 500 aret ambit me kuwak eerak wonogome, inigen kaawak nduk, nigiyareegerak. It aakumi ti, nigiyareegerak mendek nogo ando muk kambeegwaarak kwe, ando ambik ti, kangga'lek awo ineenik wonogwe o.

⁷Nogo nigiige nagagirik, ti'nuk, Yakobut nikkage, ti'nuk, apuri ineebe 12 nappiyareegerak nogo abok aret nigiige, eereegerak.

⁸Ti eeke nagagirik, an nogo elege nda'nariyak eyom awo kagak aberak lek me, nda'nogo mengga kwak, an togop aret aberak lek me, nenegen kaawak nduk, age yobok togon an aret ni'neyareegerak.

⁹An o maan nen Ala apuri piyak-payak eeginabit nege nagagirak me, ”Nappigak mendek,” yo'nogo logonetak lek kwe, an nogo, it aap nappiigak mendek inabu'me negen logowak nduk, leenogo paneegerak o obak!

¹⁰Togop me, at Ala nabuwa mba'nuk, eeppaneegerak nogo paga yogondak nobaabut alik eerit nage neego ogotik o. Ala nabuwa mba'nuk, eeppaneegerak nogo ti, we aanom warogo eeppanulik o. It nappiigak ando nogo ti, we mbuuluk iya negen eeko nogogwaarak kwe, an perak, mondok iya lombok eeke nagagirak. Ti eeke nagagirak nogo ti, an nen ta lek o. Ata, Ala nabuwa mba'nuk, eeppanege kagak, niniki aganggen kerok togon eeke nagagirak me yagi o.

¹¹It eeko nogogwaarak paga ilik, an eeke nagagirak paga a, ti iya lek o. Nit abok yorogo monggoorak eebe yokkirogogurak kit abet mbareegutak ti perak, iya o.

¹²At Keritut nogo kambunuk nogo menggam nen eenik eerogo mippereegerak wone nit nen yokkirogwe niigak, abet mbareegutak me, yogondak nonggop nduk kit ando nen yogo logonet, ”Aakumi kanggwi nogo ineenik arugun lek o,” yinuk, yogo ogotik?

¹³”Nit peebi kambunuk, nineenik arugun lek o,” yinuk, yogwe kenok, at Yetut kambunuk, eenik agagerak nonggop togon abet mbariyak mbakop?

¹⁴Ndi, at Keritut kangge nagagirik, eenik a'netak lek nen, nit wone yokkirogo monggoorak nogo ti, we aanom warogo yiluk-yiluk negen yokkirogo logonetak me, kit kunduk kiniki we aanom warogo abet mbareegurak mba'netak.

¹⁵Ndi, it aakumi kanggwi nogo ineenik agago mippiyoorak abet aret logonetak lek nen, Ala nen Keritut mippulik kagak, ”Lek o, eenik agago mippereegerak o,” yinuk, yokkirogo nogogurak me, nit togon pilit aret ninombako logonetak.

¹⁶Ti, it aakumi kambeegwaarak nogo peebi ineenik eerogo mippiyaagin lek kenok, at Keritut kangge nagagirik, eenik agagerak nogo eenik arulik mondok-mondok kambeegerak mbako logonetak.

¹⁷Ndi, at Keritut eenik eerogo mippenetak lek nen, it kiniki abet mbakwi nogo ti, we aanom warogo abet mbako logonet, kinomaluk mondok kinoba luurik aret logonetak.

¹⁸Ndi, at Keritut eenik a'netak lek nen, it Keritut inom kunik logonet kambeegwaarak nogo kunduk, kobak aago aret logonetak.

¹⁹Ndi, nit togon we nggween paga ya'i nen mban Keritut obeelom ee'ninabigin mba'nuk, niniki luunik wonogwe niinok, ”Kit abet mbaka'lek mendek kinabuwa o,” yinuk, yorogo monggoorak kwe, it nen, ”Kit perak, kinabuwa nggwok lombok mbakkologo logonip o,” yinuk, yo'nirogo logonetak.

²⁰At Keritut eenik agago mippulik ti lek o. Mippereegerak aret me, mbi iyaalok tege warak pogom, it kanggo menggam nen iyaalok eenik agago mippereegerak nogo ti at aret o.

²¹Aap Aram nen maluk eereegerak nogo paga nit abok aret kanggo monggoorak kwe, peebi Yetut eereegerak nogo paga nit abok kanggo menggam nen nineenik eerogo mippinanigin o.

²²Nit abok Aram ninom kunik logonet, kanggo monggoorak kwe, yogondak nit aakumi abok Keritut ninom kunik logonet kanggwi kenok perak, mondok nineenik logowak nduk, mippinanigin o.

²³Ti eeke logonet, mondok ndegen-ndegen aret mippinanigin o. At Keritut ti, mbi iyaalok tege warak kokwak aa'nduk eenik eerogo mippereegerak me, at peebi wage logominggirik, at apuri ninom kunik monggoorak nogo, abok aret nineenik eerogo mippinanigin o.

²⁴Ti ee'ninaburak nduk, woraagin nogo ti, o age yobok paga woraagin aret me, at Ala nen, ”It ninom ogoorak wonogwe nogo tebenogo pii'ga'lek kagak, Keritut mban tiyanak logowak o,” yinuk, kooneegerak me, yi kugi ndi kugi inom, aap iyo'nggok aakumi inarum menggaarak inom, inayuk warak menggaarak inom, it Ala inom ogoorak menggaarak mendek abok aret tebenogo piige logominggirik, nit at Ala abu'me logowak nduk, at apuri ee'ninabeegerak nogo mban wo'niren Ala abu'me pinani nagin.

²⁵

²⁶Ala inom ogoorak wonogwe nogo lek eerogo piige logominggirik, irip paga lombok ti, kanggwi alom nogo mondok lek eerogo pigin o.

²⁷Ala nen, ”Yi mendek ndi mendek abok aret tebenogo at Keritut abu'me pereegirak o,” yinuk, yereegerak liiru mbanak nogo ti, at Ala nen, ”An neebe inom aret at Keritut abu'me tebe yinuk, logokit,” mba'nuk, yereegerak mbariyak lek o.

²⁸Ata, yi mendek ndi mendek inom, yi aakumi ndi aakumi inom, abok aret Ala nen tebenogo Keritut abu'me piige mbariminggi, ti'nuk, Ala alik mban tiyanak logonet yi awi ndi awi at oone mban mondok endak warak logowak nduk, aput nen ari logonet, ”Kat nogoba, yi mendek ndi mendek nabu'me paneegindak nogo yogondak an kapuluk kabu'me tebe yinuk, logi o, yinuk, yorikit,” mba'nuk, yereegerak kogo o.

²⁹It aap kanggaatak inobaane'me yiime wuppiigo menggaarak nogo ti, nonggop nduk wuppiigwi mbakop? It kambeegwaarak nogo ineenik agago mippiyaagin lek kenok, nonggop nduk it inowe-inawot kanggwi iinok, ”Inobaane'me yiime wuppinanuwok o,” yinuk, yogo agaarik mbakop?

³⁰Ndi, nit togon nonggop mbakop? Ala nen nineenik agago mippinanigin lek kenok, nit ko'lu-kii'me ninooriyak eekwi iigak, ninogogumbuk puk aret logorak mbakop?

³¹Lek o. An kambuwak nduk, ko'lu-kii'me nooriyak eekwi iigak, nagabiti lek logonet, eeke minggirak kit pilit nombarugup o. Ninowe Keritut kinom kunik logonet, eekwi paga an nale'nggen mbake logonet, Ala wogoppege kit abet aret nombako monggotak nogo kwak, an kambuwak nduk, ko'lu-kii'me nooriyak eeko menggaarak abet aret mbako logobagip nduk, yokkiragi o, noreewi.

³²Aakumi kanggwi ineenik agago mippiyoorak lek kenok, an o Epetut yime logonet, nggeewo anini warak aakumi nibininake minggi kwak, it aakumi ninom ndugwi pereegirak ti paga an nano koloorak nduk eereegirak mbakop? Lek me, ”Nit ko'lu aret kambugun me, yogondak mban amele nanet nogo logowok o,” yinuk, mbako logonetak.

³³”Kit kinobaabut obeelom wonogwe nogo nen aakumi maluk eekwi kinom nugwi kiinok, kinom maluk eekkolaamunggup o,” yinuk, yogo menggaarak nogo ti, abet aret yogwe me, aakumi nen wone alik yokkirogo logonet, kinambokan laganggwi iyo, kiniki liippinip o.

³⁴It ando kinenggela'me Ala wone ineenggo'lek iigak, kit maluk eekwi me, kinagabiti mbako logonip o. Kit maluk eeko monggotak nogo mbo punuk, kiniki warak a'nuk logobagip nduk, yokkiragi o.

³⁵Kit ando nen yogo logonet, ”Nit kanggwi nogo nonggop negen agago mippinanigin mbakop? Nineebe ninetenggen nano ndak-ndak agago mippinanigin o?” yinuk, yogwe kiigirak me, wologwe.

³⁶Kit aap wi negen yogwebok. Mbato awi yakotak nogo agabolo nggonenogo pege nagaatik, eebe mbilangge menggerak nogo kineenggo'lek a?

³⁷Kit yi mendek ndi mendek awi yako monggotak nogo yako logonet, eebe apit nogo awi yakulik o. Ata, mbato a, yi mendek ndi mendek alik mendek awi a, yako logonet, anggen awi ambitak menenogo yako monggotak kwe,

³⁸mbilanikit nduk eeke logonet, eebe-etenggen alitak lombok mbilangge menggerak nogo ti, Ala nen mban iniki koombunuk, eeppege menggerak.

³⁹Yi mendek ndi mendek amiya warak ogobakkigirik nogo ti, inagabolo-enete ambit mban wonage lek o. Aap inagabolo alik, wam nagabolo alik, towe inagabolo alik, ikan inagabolo alik, wonogo menggaarak.

⁴⁰Ndi, mbogut paga yi mendek ndi mendek ogobakkigirik nogo inetenggen alitik-alitak kogwe, ndi, nggween paga kunduk, yi mendek ndi mendek ogobakkigirik nogo inetenggen alitak lombok kogwe, eeko monggoorak.

⁴¹Oonegen abinak alik, tut abinak alik, laaluguragan abinak alik, ndi, laaluguragan ando inabinak alitak lombok aret menggerak.

⁴²It kanggwi ineenik agago mippiyoorak ti, togop aret o. Aakumi nen awi yako mengga kwak, nit ninagabolo pili ariyak mendek yi nggonenogo mbo punuk, obaane'me mondok logorak mendek yippinanege,

⁴³ninagabolo maan maluk mendek nogo, nggonenogo mbo punuk, obaane'me ngget amuni mbanak mendek yirirogo pinanege, ndeyak nogo mendek mbo punuk, obaane'me omaawi mondok logorak mendek wo'nirage,

⁴⁴ndi, nggween paga mendek nogo mbo punuk, obaane'me ngget mendek Ala etenggen ndak-ndak ogobakkigirogo pinanege, eerogo nabelan-kabelan mondok logowak nduk, mippinanigin o. Nit nggween paga yime logowak nduk, ninagabolo nggween paga mendek yippinaneegerak nogo kwak, peebi mbogut paga logowak nduk, ninagabolo mbogut paga mendek yirippinanigin lek mbakop?

⁴⁵Ala nen, ”Aap Aram aa'nduk nggween mendek wakkage nagagirik, eenik eerogo mippereegerak o,” yinuk, liiru mbanak wonage. Ti'nuk, Aram peebi mbogut paga mendek nogo perak, aakumi ineenik aganake logowak nduk, nappi wagagerak.

⁴⁶Ti kenok, mbogut paga mendek aa'nduk woroolik o. Ata, nggween paga mendek aa'nduk wakkage nagagirik, ti'nuk, peebi mbogut paga mendek nappi wagagerak kogo o.

⁴⁷At Aram aa'nduk wakkagagerak nogo ti, nggween mendek aret wakkagagerak. Ndi, Aram peebi mendek nogo ti, at awi alom mbogut paga nen aret wagagerak.

⁴⁸Aap Aram aa'nduk nggween mendek wakkagagerak me, nit at apuri nggween paga mendek aret ogoorik o. Ndi, at mbogut paga nen wagagerak nogo apuri aganabeegerak kenok ti, mbogut paga mendek aret o.

⁴⁹Nit aap nggween mendek wakkagagerak etenggen wonogo monggoorak nogo kokwak, peebi at mbogut paga nen wagagerak etenggen nogo pogom eerogo pinanigin o.

⁵⁰Noreewi o. An wone yokkirage yi, kit liippatubagip nduk, yokkira o. Ninagabolo nggween mendek yi nggonengga'lek kagak Ala abu'me piige minggim unggwi nagun lek o. Ndi, ninagabolo pili ariyak mendek nggonenogo mbo pega'lek kagak, ninagabolo ngget mondok logorak mendek, yippinanigin lek mban o.

⁵¹Noreewi o. Wone kote kumaarak wone ambi yokkira o. Nit abok aret kambugun lek o. Nu'lek me o yabok telanggage kenok, ninogut nage minggi kwak, o irip paga kuli mbuti luu'ngget oone eeke kenok, nit abok nineebe alik negen eerogo pinanigin o. Mbuti luu'ngget oone eeke mbariminggi, it aakumi kambeegwaarak nogo mondok-mondok inabelan waawak nduk, ineenik eerogo mippiige logominggirik, nit abok nineebe alik mendek eerogo pinanigin o.

⁵²

⁵³Ninagabolo pili eeriyak mendek yi nogo ti, nggonenogo mbo punuk, obaane'me mondok logorak mendek yirippinanege, ndi, kanggwi mendek nogo mbo punuk, nineenik mondok logorak mendek eerogo pinanege, eerigin o.

⁵⁴Ndi, ninagabolo pili ariyak mendek yi nggonenogo mbo punuk, mondok logorak mendek yirippinanege logonet, kambuurak mendek nogo mbo punuk, nineenik nabelan-kabelan agago pinanigin o. Ti eeppinanege kenok ti, ”Aakumi kanggwi unde yi wae. Kanggo menggaarak alom nogo lek eerogo punuk, mondok logorak mendek tiyak yegerak me, kat tebenogo pagagerak kagak tiyanak wonage mbakendak ya? Ninagabolo kani noorak ninagabiti mbako nogogurak nogo lek aret agagerak me, kenggali o,” yinuk, yereegerak liiru mbanak nogo a'me lik yigin o.

⁵⁵

⁵⁶”Wone yogop eerugup, ndogop eerugup,” yinuk, yereegerak kagak, taganogo punuk, maluk eeriyak ee'ninake kenok, eeko monggoorak o. Ndi, nit maluk eekwi paga nen kambuurak ninagabiti mbako monggoorak kwe,

⁵⁷at ninowe endagembogut Yetut Keritut eereegerak paga nit maluk eeriyak ee'ninake nogo tebenogo punuk, obeelom mban logowak nduk, omaawi wo'nirage menggerak me, ”Ninogoba Ala wa,” yinuk, at mban alut eeko logowok o.

⁵⁸Ti kenok, noreewi o. Kit an niniki kunik me, kiniki mondok kwi'ndak nu'lek logonet, ninowe endagembogut eyabu aret eekwi kenok ti, we aanom warogo eekwi lek ambi kola noorak nduk eekwi kineenu me, kulinik-kalinik nggwiirit-nggwaarit aret eeko logonip o.