Read Wano 1 KORINDUT 16 Bible Online

1 KORINDUT 16 - Wano bible

1 KORINDUT 16

¹An nen it Ala apuri Nggalatiya mendek wone lengganogo yoragagirak nogo pogom yogondak kit nen it abet mbakwi Ala apuri Yerutalem mendek inake wu kuwak eerogo nappiyaabagip nduk, wone ambi yokkira o.

²An wage logominggirik, ”Wu kuwak ee'nip o,” yokkiroorak neebi me, kit kinawu kuwak eeko logonet, tamban ambi eekak eekwi paga kinalitak lombok it inake ambi nabek kuwak eerogo pogo logonip o.

³Ndi, an wage logominggirik, kit wu kuwak eerumonggotak o Yerutalem wonok noorak aap inobaabut abe kenok, mippiyamonggotak nogo wonok nogwe me, Ala apuri o Yerutalem mendek ineenu aruwak nduk, an liiru mbanogo inom nappiyaagin o.

⁴Ndi, an ninom noorak mbakwi kiinok, it ninom noorak op aret o.

⁵An o Makendoniya naakit mbakirak me, nage logominggirik, kiya woraagin o.

⁶Kiya wage logominggirik, o tit kunik eeke kenok, kit ninom time mbuuluk logonuk, nagin a, o tit kunik nogo lek age kenok, nagin a, an mban ambime noorak niniki koombunuk, nage neenok, nappani noorak op aret o.

⁷An we luulu pekkiinok woroorak ti neebi o. Ata, we logonuk negen aret woroorak mbake kwe, ninowe nen iniki koongge kenok mban o.

⁸It ninoone taganiyak ambik wonogwe kwe, Ala wone konengga'lek yime o tenak ambik wonage me, ”Nanonggwan aga o,” yinuk, yorage logikit mbakirak me, laago Pendekota lariyak awo tokkage logonet, Epetut yime logokit mbakirak o.

¹⁰An nowe endagembogut eyabu eeke minggirak pogom, at Timotiyut togon togop aret eeke menggerak me, agabiti mbakak kinowagam wage kero, at eebe liirogon aret waamunggup o.

¹¹At kiya wage kenok, ”Wulaga yi meek kagak, nappi wagaarak,” mbarugup o. Ata, noreewi ando pe'neya woroorak torinake nogo wogo logonet, at inom iniki ale'nggen paga neya woraawak nduk, nappi wa'nu o.

¹²Ndi, at ninore Apolot nogo, at oreewi ando inom kit pekkiya woraawak nduk, an nen nabenak mban yogitak kwe, ”Time woroorak,” mbaka'lek me, peebi pekkiya woroorak ambi age kenok, wage kaamunggup o.

¹³Kit kinagabiti lek kinogogumbuk logonet, Ala abet mbakwi nogo paga kiniki kwippunuk, tum pip-pak wako logonip o.

¹⁴Kit eekwi ti abok aret aakumi inabuwa mbako logonet, kinom kunik eerit nogo logonip o.

¹⁵Ndi, at Tepanut apurilogwe inom o Akaya iyaalok togon Ala apuri ogo nogogwaarik, ”It abet mbakwi Ala apuri yime wonogwe nogo nit yeenggwaarogo logowok o,” yinuk, eeko nogogwaarak kineenu nogo o. It aap ti eeko menggaarak nogo inom, it abok liirit-laarit eeko menggaarak inom, inabu'me logonet, kinom eerit nogo logobagip nduk, yokkirage agarik o, noreewi.

¹⁷Ti kenok, kit waga'lek kiigak, kinobaane'me aap Tepanut kunduk, Porotunatut kunduk, Akayikut kunduk, neya wogo nagaarik, kit kiniki ale'nggen eeppinagagaarak nogo pogom, an togop niniki ale'nggen eeppanegaarak me, an yogondak ale'nggen ambik agarik o. It aap togop mendek kiya wogwe iinok, kiniki kunik aganako logonip o.

¹⁹It Ala apuri Atiya mendek nen kit keyage wappinagaga o. Aap Akwila akweeluk Piritika imbirak inom, it Ala apuri iname kuwak eeko menggaarak inom ti, it kinom iniki kunik lombok me, ”Ninom Ala apuri aret o,” yinuk, keyage ambik wappinagaga o.

²⁰Ndi, it ninoreewi Ala apuri yime abok nen keyage wappinagagwi mban o. Kit-kit aret keyage wako logonet, linggik-kambuk yogo logonip o.

²¹An Pawulut neenggi pekkagak eeko logobagip nduk, age yobok yi paga liiru mbanggirage logonet, keyage wappinagagi o.

²²Aap ambit-ambi ninowe endagembogut inikilom mbake lek kenok, kambuwak nduk, kugi pulinik negen aret logowak o. Maranata o! Ti nit ninoone paga, ”Ninowe endagembogut mbet-mbet woraawak o,” yogwe.

²³Ninowe endagembogut Yetut kinom wonage me, kinarum aret logogin o.

²⁴Keritut Yetut nimbirak niniki kunik minggirak me, kit ninom niniki kunik aret agarik o, yinuk, an Pawulut nen liiru yi abu aret mbanggiragi o. Wa.