Read Wano 1 KORINDUT 2 Bible Online

1 KORINDUT 2 - Wano bible

1 KORINDUT 2

¹Noreewi o. Maan aa'nduk Ala wone kote kumaarak wonagagerak nogo yokkiraakit nduk kinowagam wage nagagirik, kit kiniki ale'nggen mbarubagip nduk, ”An abok neenu,” mbake logonet, noone amburu paga yokkiroolik o.

²An kinenggela'me logonet, yi wone ndi wone ugun yokkiroorak mbarulik. Ata, Yetut Keritut eeke nagagerak wone yokkirage logonet, at eyo karo-karo paga wareegwaarak wone nogo mban aret aberak logonet, yokkirage logokit mbareegirak.

³An neebe lebenak aret me, nagabiti nen naganak wake kagak ninom wonagagirak.

⁴Kit kiniki abet mbakwi nogo, aakumi iniki koombunuk, agan nugwi paga panggombunuk logorak lek o. Ata, Ala omaawi paga eekkinabit nage nogo paga mban panggombunuk logobagip nduk, an kinenggela'me ninom wone mbanggwi, Ala wone mamungginake, eeke logonet, ”Wone abok neenu negen,” mba'nuk, noone amburu ndik-ndik paga yokkirage logolik. Ata, kit abet mbarubagip nduk, Aberiniki omaawi paga eekkinake kagak, yokkirage nagagirak nogo o.

⁶It aap iniki kole kenok perak, wone nit nineenu nogo yorogo monggoorak aret kwe, wone nit nineenu logonet, yorogwe nogo ti, nggween paga wone nogo mendek lek o. Ndi, it aap inayuk warak nggween paga yime menggaarak yogondak lek arit nogwe nogo wone ineenu logonet, yorogwe nogo mendek lek mban.

⁷Ata, nineenu logonet, yogo monggoorak nogo ti, wone o maan mbogut nggween wakkaga'lek logonet, Ala nen nit tiyappinanikit mba'nuk inikime kote koonogo pereegerak nogo mban aret agan nogo monggoorak.

⁸At Ala iniki liippunuk, kooneegerak nogo ti, it aap nggween paga yime inayuk warak wonogwe nogo nen liippulik o. It nen liippenetak nen, at ninowe endagembogut tiyanak menggerak eyo karo-karo paga wareegwaarak nogo wa'netak lek o.

⁹Wone yokkirogo monggoorak nogo ti, ”At Ala nen, Aakumi inigen kaga'lek mendek inom, inaruk konengga'lek mendek inom, yogop eeriyak iniki mbaka'lek mendek inom, ti mendek abok aret, it aap at inom iniki kunik mbako menggaarak nogo inake pipuk-papuk agago piyareegerak wonage o,” yinuk, liiru mbanak nogo ndak-ndak aret agan nogo monggoorak.

¹⁰At Ala nen wone kote kumaarak wonagagerak nogo, it endekem mendek lek o. Ata, nit mban Aberiniki paga paganniragagerak. At Aberiniki nogo nen yi wone ndi wone alom abok aret liippege menggerak me, liippege logonet, Ala nen agote inikime lombok koongge menggerak wone nogo inom aret maloppunuk, yo'nirage menggerak.

¹¹Aap ambi iniki mbake nogo it ando ineenggo'lek iigak, at alik eenu menggerak ti ndak-ndak Ala mbake nogo Aberiniki alik mban eenu menggerak.

¹²Ala nen nit we wo'niragagerak nogo nineenu aruwok nduk, aakumi nggween paga mendek iniki mbakwi nogo mendek koloolik o. Ata, Ala nen Aberiniki nappinani wagagerak nogo aret kologogurak o.

¹³Ti kenok, Ala nen wo'niragagerak yokkirogwe nogo ti, it aakumi nggween paga mendek iniki nen, ”An neenu aret o,” yinuk, yorogo mengga kwak, yokkirogwe lek o. Ata, it aakumi Aberiniki inikime wonogwe iinok mban, Aberiniki ninikime logonet, mamunnirage kagak, Ala agote wone alom nogo liirogon mbininogo yorogo monggoorak.

¹⁴Aberiniki nen koonogo yo'nirage nogo ti, Aberiniki ninikime wonage kenok mban yelok kogo monggoorak me, it aakumi nggween paga mendek nogo Aberiniki inikime wonage lek me, wone ti, konembunuk, ugun kobak logonet, ”Yi wi wone negen aret kogo,” yinuk, mbo pogo menggaarak kwe,

¹⁵Aberiniki ninikime wonage kenok perak, yi mendek ndi mendek eeriyak alom liippunuk, eekwi me, eerit nogwe niigak, aakumi nen, ”Maluk eerit nogwe kiigo,” yinuk, yo'niraagun lek aret o.

¹⁶”Ala mbake menggerak aap ta nen eenu me, at mamuniriyak op mbakop? Mondok lek o,” yinuk, liiru mbanak aret wonage kwe, Keritut iniki mbake nogo unde monggoorak nit aret o.