Read Wano 1 KORINDUT 4 Bible Online

1 KORINDUT 4 - Wano bible

1 KORINDUT 4

¹Togop me, Ala wone kote kumaarak mendek unde eeppinaneegerak me, nit at Keritut ayeloman abet aret ninombako logonip o.

²Inogobamini nen inayeloman eeriyak unde eeppiinok, eerit nogwe iigak, ”An yoragarak liippunuk, eekwi iyaamun ilik lek a?” yinuk, inigen wogonako mengga kwak, Ala nen togop aret enegen wo'ninake wonage me, liippunuk aret eerit nogo logowok o.

³Togop me, kit inom, it aakumi inawone amburu mbanogo yorogo menggaarak mendek inom, an eeke liippaninuk, yo'nugwi iinok, an konenigin lek aret o. Ndi, an eeke kunduk, liippakeelik mban o.

⁴An eerit mban nage logonet, maluk eekirak ambi niniki aberak wonage lek kwe, ambi wonage kagak, ”Obeelom mban eeke minggirak,” yukwak, nagabiti nen puk wonage me, at nowe endagembogut nen mban liippaninuk, yo'nirigin o.

⁵Ti kenok, it aakumi inawone amburu mbanogo inowak looniyak eyom awo panggoni waga'lek kagak, kit nen aakumi maluk ugun-ugun inoba lenggenogo piigo logorak mage o. Ata, ninowe Yetut wage logominggirik perak, wone kote kumaarak wonage nogo kin paga pege, ndi, ninikime mbabok koonggwi nogo nggwok paga paganogo yo'nirage, eeke kenok, Ala nen ninalitik-ninalitak eeko logomonggoorak nogo ndak-ndak ale'nggen ninoba pinanigin me, waga'lek kagak aakumi ugun-ugun maluk inoba lenggenogo piigo logogup o.

⁶Togop me noreewi o. An wone yokkiragi ti, kit nen, ”At ambi iya, at ambi meek,” yogo logonet, Ala yereegerak wone liiru mbanak nogo taganogo punuk, alik eekwi kiyo, an Apolot nimbirak eeko monggoorak kit mamunggolaabagip nduk, nit nineebe paga wakkagak yokkiragi o.

⁷Nit aakumi tiyak-tebek logowak nduk, ta nen koonogo pinanege menggerak mbakop? At nen wokkiraga'lek kit nen mban kologogutak ambi ngge porogo ogotik? At nen mban wokkiragagerak kagak, nonggop nduk, kinalik nen kologogutak negen eekko'nok iya-piya eekkologo ogotik?

⁸Nit awo eeppinanega'lek kagak kit nduk obeelom aret eeppinagage, kit nduk kineenggi warak agago pinagage, kit aa'nduk kinendage nggwok agago tiyappinagage, eereegerak kenok op aret o. Kit abet aret kinendage nggwok logonetak en, nit ninom ndak-ndak ninendage tiyanak logonetak kwe, lek me, ”Ao,” mbako ogoorik o.

⁹It Ala yonggo mbogut paga nugu menggaarak inom, aakumi nggween paga mendek inom, abok aret inigen iigak, eeppinanugwi me, aap kambuwak nduk, inooko logonet, inendage tebenak lombok kenok irip paga lombok mbigimbiinok, inooko mengga kwak, nit Ala nen yi awi ndi awi nappinaneegerak nogo, mondok irip paga lombok mippinaneegerak kagi o obak!

¹⁰Kit ti, Keritut kinom kunik me, kiniki warak wonogwe, ndi, nit perak, Keritut wone yoranet nugwi paga wi negen aret ninombako agaarik o. Kit kinomaawi ambik kwe, nit perak, ninomaawi lek lebenak aret o. Kit tiyanak aret wonogwe kwe, nit perak, meek ninombako agaarik o.

¹¹O maan nen yogondak kuli nit nggween paga ya'i wonogo logonet, ninagi-ninambi abu ee'ninake, ninayum nibi-nibi aago kagak nugwi, yawi ninookwi, ninawi wuri lek me ugun ambime nogo yegak eerit nugwi, eerit nugu ogoorik o.

¹²Ti eerit nogo logonet, nineenggi paga nen mban nggik-palek eekko'net nugu monggoorak. Mbe'nirogwe iigak ninale'nggen inoba piigwi, piyak-payak eerogo pinanugwi iigak niniki yanggo yinuk, puk wonogwe,

¹³miyuk-meya eerogo pinanugwi iigak, nit nen wone onggo obeelom mban yorogwe, eekwi niigak, aakumi nggween paga mendek inambeebuk laaguret muunogo mbo nagako mengga kwak, o maan nen yogondak kuli paga togop aret eeppinanogo agaarik o.

¹⁴An wone liiru mbanggiragi yi ti, kinenggali wappinagakit nduk, mbanggiragi lek o. Ata, kit an napuri niniki kunik me, we kinaruk wake agarik o.

¹⁵Kinarum logonet, Keritut eeke nagagerak wone mamunggirogo logorak nogo ineebe apit 10,000 negen logorak op aret kwe, abok kinogobamini lek o. Keritut Yetut nen nappaneegerak kinenggela'me logonet, obeelom wone iyaalok yokkirage nagagirak nalik aret me, kinogoba an nalik aret o.

¹⁶Togop me, an eeke minggirak kit ndak-ndak eeko logobagip nduk, yokkiragi o.

¹⁷An eeke minggirak kit ndak-ndak eeko logobagip nduk, an naput niniki kunik mondok liippunuk, ninogoba wone mugurok nage menggerak Timotiyut nogo aret kinowagam nappi wagarak kinenggela'me logonet, an Keritut nimbirak kunik logonet eeke, ndi, Ala apuri yi awi ndi awi komaarak wonogwe nogo yoranet nage, eeke minggirak wone nogo yokkirage logogin o.

¹⁸Kit ando nen, ”At niya woraagin lek o,” yinuk, wogoppakwi kwe,

¹⁹ninowe endagembogut nen iniki koongge kenok, an mbet-mbet kiya woraakit mbake agarik o. Kiya wage logominggirik, it aakumi nen, ”An togop eekirak o,” yinuk, wogoppakwi nogo, ”It abet aret eeko logonet yokwe ilik, we inoone paga mban agan nugwi a?” yinuk, liippiya woraagin o.

²⁰Aakumi inoone ugun agan nugwi nogo konembunuk, Ala abu'me unggwi nogo logogun lek o. Ata, Ala omaawi inikime eeppiige kagak, inobaabut koonak logonet, yorogwe nogo konembunuk, waganggwi iinok perak, unggwi nogo logogun aret o.

²¹Togop me, an kiya wage logonet, yawi wonok kiya woraagin ilik, niniki yanggonak kinabuwa mbake logonet, kiya woraagin a? Kit kiniki mban koonggo logonip o.