Read Wano 1 KORINDUT 6 Bible Online

1 KORINDUT 6 - Wano bible

1 KORINDUT 6

¹Aap kit mendek ambi nen ore imbirak wone wakwi iinok, it abet mbakwi Ala apuri nen alom kwaaruwak nduk, wogoren inowagam naga'lek logonet, nok-nok it Ala wone wagangga'lek mendek kagak, kinagabiti mbaka'lek inowagam piya nogo ogotik?

²Nit abet mbakwi Ala apuri nogo nen it aakumi nggween paga mendek peebi inowak looninaburak nogo kit kobak ogotik? Ndi, peebi inowak looninaburak nit aret unde eeppinaneegerak kagak, yogondak yime logonet, wone mbuuluk age kenok, kooniyak meek me nduk, eeko ogotik?

³It mbogut paga Ala yonggo nugu menggaarak melaikat nogo, nit nen aret inawone amburu mbanogo inowak looniyak nogo kit kobak logonet, yogo ogotik? Togop kenok, nit Ala apuri nen nggween paga yime yi wone ndi wone koonggo logorak meek mbakop? Lek o.

⁴Wone ambi age kenok, nit op aret koonggo logorak kagak kit nonggop nduk it Ala apuri kinom kuwak eekulik mendek nen koonuwak nduk, yorogo monggotak?

⁵Kit kinenggali arubagip nduk, abet aret yokkiragi o, noreewi. Aap iniki warak ambi nen oreewi maluk eekwi iinok, inawone amburu mbanogo yoroorak kinenggela'me wonage lek kenok, eeko ogotik ya?

⁶Wonage kagak kwe, kit nonggop nduk it Ala wone wagangga'lek nogo mendek nen koonuwak nduk, kinoreewi wogoren piya nogo monggotak?

⁷It aap abet mbaka'lek mendek nen koonuwak nduk, kit kinoreewi aret kwe, wogoren nogo monggotak ti paga kit Ala apuri mendek kinayuk lek eekkologwe kiigi o. Kit maluk eerogo pinagagwi, kinamendek ineengginabut waganggwi, eekwi iigak, kinendage op logorak nduk, onggo yoraga'lek puk logorak meek mbakop?

⁸Puk logorak op aret kwe, kit kinoreewi kinom aret maluk eekkologo logonet, at ambi amendek at ambi kolagak eeko ogotik o.

⁹Ndi, it maluk eeko menggaarak kenok, Ala abu'me piige minggim piyaagin lek nogo kit kineenggo'lek a? It aap kumi paga mban iniki luunik logonet, eeginabit nega inom, kuguwak amuli kungga inom, mbabi eeka inom, aap-aap wut-wut yaga inom, yogoot iyagalo inom, uugwe-ugwe mbaka inom, amburu ndonggorogon nonggo nagaatik, kumili negen agan nega inom, aakumi inabok mbangga inom, inageerok nggwok aruwak nduk, aakumi inambokan lagangga inom, aakumi ti mendek ti, Ala abu'me piige minggim piyaagin mondok lek me, aakumi nen kinambokan laganggo logonet, alik yokkirogwe iinok, inoone koneniyak mondok mage o.

¹¹Kit maan nen aap togop aret wonogogutak kwe, ninowe Yetut Keritut eereegerak paga Ala Aberiniki nogo nen kinomaluk koorogo pinagage, Ala ake leenogo pinagage, ndi, kiniki obeelom agago pinagage, eereegerak o.

¹²Yi mendek ndi mendek eeriyak mage lek abok ugun eeriyak op mban aret kwe, eerit nogo logonet perak, abok obeelom eekkoloorak nduk eekwi lek o. Ando nit maluk ee'ninaburak kagak we aanom warogo aret eerit nogo monggoorak. Ndi, yi mendek ndi mendek ugun eeriyak op kwe, ti mban eeriyak ee'ninake kenok, eerit nogwe paga ti ayeloman negen eerogo pinanege menggerak me, an togop logorak mondok neebi o.

¹³Togop me, ninambi ti, ninanogun ake, ndi, ninanogum ti, ninambi ake aret kwe, peebi at Ala nen ti imbirak lek eerogo pigin o. Nineebe nogo ti, kumi ugun eeginabit nugu logorak nduk ake ti lek o. Nineebe ti, ninowe endagembogut ake aret, ndi, ninowe endagembogut ti, nineebe ake aret wonage o.

¹⁴Ala nen ninowe endagembogut eenik agago mippereegerak me, nit kunduk, peebi at omaawi paga nineenik agago mippinanigin o.

¹⁵Kit kineebe Keritut eenggi-iyok li'luk agago kumbinagareegerak nogo kineenggo'lek a? Kit Keritut eenggi-iyok ambit eerogo kumbinagareegerak nogo, werenogo kwe ya wukak oba nabenogo patiyak op mbakop? Abu mage o.

¹⁶At Ala nen ari logonet, ”Kimbirak kineebe ambit aret a'nuk logonip o,” yinuk, yereegerak liiru mbanak wonage me, ti kenok, aap ambi kwe ya wukak imbirak lambungge kenok, imbirak ineebe ambit aret arugun o.

¹⁷Aap ambit-ambi ninowe endagembogut imbirak kunik wonage kenok perak, iniki imbirak ambit aago wonogwe o.

¹⁸Ti kenok, kumi ugun eeginaburak eekkinake kenok, kineebe kole mbaganggo logonip o. Yi maluk ndi maluk ando kiniki abe'nage kenok, kinagabolo paga nen ugun eeko monggotak kwe, kumi eeginabit nugu logonet, maluk eekwi ti perak, kinikime nen mondok aberogo punuk, eekwi me, kineebe mondok maluk eekkologo monggotak aret o.

¹⁹Kit kineebe ti, Aberiniki awi wurik wonage nogo kineenggo'lek a? At Ala nen onggo nggwok paga kinonggo mbangge nagagirik, Aberiniki wokkiragagerak kinikime wonage me, kit kineebe ti, kit unde lek o. At Ala aret unde me, at endage tiyak yuwak nduk, kineebe paga obeelom mban eeko logonip o.