Read Wano 1 KORINDUT 9 Bible Online

1 KORINDUT 9 - Wano bible

1 KORINDUT 9

¹An nogo, aakumi nen, ”Yogop ee'nu, ndogop ee'nu,” yo'nugwi iigak eeke minggirak mbakop? Ala nen an nappiigak logokit nduk, mippaneegerak lek mbakop? Ndi, an ninowe Yetut nenegen liirogon koolik nomba'nuk, yogo ogotik? Ninowe endagembogut eyabu eeke minggirak nogo anggen yugu negen kit aret wonogwe nogo lek a?

²It aap ando nen, ”Kat nappiigak mendek lek o,” yo'nugwi iigak kwe, kit nen perak, an yokkirage neegak kit Ala apuri ogogutak ti paga liippaninuk nappiigak mendek abet aret wonage nombakwi nogo lek a?

³It aakumi nen an kin wo'neego logonet, ”Kat abet aret nappiigak mendek ilik?” yo'nugwi iinok, an nen wone onggo yorage logonet,

⁴”Lek o. An Ala eyabu eeke nogo onggo nambi-nagi ma'niriyak meek mbakop?

⁵It aap nappiigak mendek ando inom, at ninowe Yetut awurilogwe ambokan ndarak inom, Peterut inom, Ala wone wonok nugu logonet, inakuwi wogoren nugu menggaarak nogo ndak-ndak, an togon togop eeriyak meek mbakop?

⁶Ndi, it ti, eerit nugwi iigak, an Mbaranabat nimbirak mban nit nineebe op logorak nduk, nineenggi paga mban nggik-palek eekko'net nugu logorak op mba'nuk, yogo ogotik?

⁷It yigin unde tentara nogo ineebe op logorak nduk, ineenggi paga mban nggik-palek eerogo nonggo menggaarak mbakop? It aap yabu eeko menggaarak nogo nen mbi eebe ndarogo ando it nunggulik mbakop? Ndi, it aap wam ndomba inelak amburu tooko menggaarak nogo it nen ando noorak meek mbakop? Lek o. It yabu eeko menggaarak abok aret onggo anggen mbanogo nonggo menggaarak aret o,” yinuk, yokkiragi o, noreewi.

⁸An wone yokkirage ti, nit aakumi abok eeko monggoorak nogo mban wakkagak yokkirage ti lek o. Ata, maan Ala nen Muta wone lengganogo, ”Yogop ee'nu, ndogop ee'nu,” yoreegerak nogo togop aret liiru mbanak wonage me nduk, yokkiragi.

⁹”Wam lembu iniyok paga nasi agabolo mbilanit nugwi iigak, ando nunggwi iyo, inambe keele maarugup o,” yinuk, Ala nen wone lengganogo Muta yoreegerak liiru mbanak wonage nogo ti, Ala nen wam lembu abuwa mba'nuk, yereegerak ilik,

¹⁰nit ninabuwa mba'nuk yereegerak a? Lek o. Nit aakumi ninabuwa mba'nuk aret yereegerak me, it aap yabu waganggo menggaarak inom, anggen mbilanak yonggoko menggaarak inom, imbirak nen, ”Peebi nit aret nonggo logogun o,” yinuk, iniki luunik logonet, eeko menggaarak.

¹¹Togop ndak-ndak, nit nen Ala wone nogo kinikime awi yappinagareegurak me, yogondak kit kinamendek ando nit wo'niroorak meek nduk yogo ogotik?

¹²It iyaalok Ala wone kinikime awi yappinagaga'lek mendek nen, ”Inamendek ando wo'niraagun,” mba'nuk, kinoba aberak wonogwe iinok, wogorogo monggotak kwe, nit iyaalok yappinagareegurak nogo nen, ”Wo'niraanip o,” yinuk, yokkiroorak meek mbakop? Yokkiroorak op aret kwe, obeelom wone Keritut yo'niragagerak wone nogo wiganit nage me, non mbambukwak nduk, ”Wo'niraanip o,” yokkiraga'lek nineenggi paga nen mban eekko'net nogo ogoorik o.

¹³It Ala awi wurik me yabu eeko menggaarak nogo yabu eekwi onggo negen mbi Ala ake pugu nogo aret kologwe, ndi, it aap Ala aanggo warogo wogogo menggaarak nogo, warogo wogogo logonet, ando it nunggwi, eeko menggaarak nogo kineenggo'lek me yogo ogotik?

¹⁴Ti ndak-ndak it aap obeelom wone yorogwe nogo, ineebe obeelom logowak nduk, it waganggo menggaarak nogo nen yi mendek ndi mendek wogorogo logowak nduk, ninowe endagembogut nen koonogo pereegerak.

¹⁵Koonogo pereegerak kwe, ”Kinamendek ambi wo'ninip o,” yinuk, an yokkiroolik o. Ndi, yogondak kunduk, kit ambi eeppanubagip nduk, liiru yi mbanggirage lek mban. ”An Ala ake pugu wagin abu lek o,” ari minggirak me, an wagangge neenok, it an noreewi ando nen nabok mbanukwak, wagangga'lek logonet, kambuurak op aret o.

¹⁶An obeelom wone yoranet nege minggirak nogo ti, Ala nen, ”Yoranet nege logot o,” ari kenok, yoranet nege minggirak ti paga an wogoppatiyak abu lek o. An wone obeelom wone yoranet nege lek neenok, maluk eeppaniyak me, nagabiti mba'nuk, yoranet nege minggirak.

¹⁷An niniki mba'nuk yorage logonetak en, onggo wo'niriyak yoroorak op aret kwe, Ala nen aret unde eeppaneegerak me, onggo lek we aret yoranet nege minggirak.

¹⁸Togop me, an onggo koloorak ti, ngge mbakop? Lek o An yabu eeke onggo ti, wone yokkirage nogo paga, ”Onggo wo'ninip o,” yokkiroorak op kagak, tebenogo punuk, obeelom wone onggo lek we aret kineenu eeppinagit nege minggirak nogo ti, an onggo kolage ti aret o.

¹⁹An aakumi inayeloman wonage lek we wonage minggirak kwe, Ala apuri eeginabikit nduk, aakumi abok aret inayeloman eekko'nok nage minggirak.

²⁰An nen it Yakuri mendek Ala apuri eeginabikit nduk, inenggela'me nege logonet, it Yakuri inobaabut ndak-ndak eekkolage, ndi, it Muta wone lengganak eeko menggaarak nogo an togop eekeelik kwe, Ala apuri aganabikit nduk, inenggela'me logonet, Muta wone eeko menggaarak an ndak-ndak eerit nage,

²¹ndi, it aap endekem mendek Ala nen Muta yoreegerak wone eekulik mendek nogo, Ala apuri aganabikit nduk, inenggela'me logonet, it eeko mengga kwak, an ndak-ndak eerit nage, eeke minggirak. Ti eeke minggirak nogo ti, Ala yereegerak wone taganogo punuk eeke ti lek o. Ata, Keritut yereegerak wone eeke logonet, eeke minggirak me nduk, yokkiragi o.

²²Ndi, it aakumi iniki awo kole aga'lek mendek nogo iniki kole aganabikit nduk, it inenggela'me logonet, it eeko menggaarak an ndak-ndak aret eeke minggirak. Togop eerit nage logonet, an yi aap ndi aap abok inenggela'me nege logonet, it ambitak Ala nen inagap ndaruwak nduk, it eeko menggaarak abok aret an ndak-ndak nabenggo'nok eerit nage minggirak.

²³An obeelom wone yoranet nage minggirak nogo it aakumi konembunuk, waganggo logonet, iniki ale'nggen mbakwi kwak, an togon nale'nggen kaakit nduk, yoranet nage minggirak.

²⁴It aakumi onggo koloorak nduk, nggare agan nogo logonet, ineebe apit aret nggare agan nogo menggaarak kwe, ambiret aa'nduk nggare agan wundi nage nogo mban onggo kolage nogo, kit kineenggo'lek a? Togop me, kit onggo kolaabagip nduk, nggare agan togon aret nogo logonip.

²⁵Aap ambi it aakumi nggare agan nogwe nogo inom nggare agan aa'nduk wundi noorak mbake logonet, at yi mendek ndi mendek eeriyak mbake nogo tebenogo pege menggerak. At onggo nggare-nggare mendaarak we luulu lek ariyak mendek kagak yippanuwak mba'nuk, eeke menggerak kwe, nit perak, onggo nggare-nggare negen makoota mondok-mondok logorak mendek yippinanuwak mba'nuk, eekwi me,

²⁶ti paga an mondok nengga lolo nggare agan nage agarik o. Wim namburuwak nduk, ”Inoba op age kaamun ilik, lek a?” yinuk, anggut-nggut wakkogo nagaatik, ando inoba maluk kenok nggiginogo, ”Puk logonip o,” yorogo mengga kwak, an nen it ando Ala wone, ”Ninom yoranet nogo logowok o,” yorage logominggirik, ninom yoranet nogwe niigak, nogoba nen, ”Koba maluk me, ya'i logot o,” yinuk, nggiginogo mbo panege kero, noba abe neenok, ”Kinom yoranet nege logot o,” yo'niruwak nduk, yi mendek ndi mendek eeriyak ee'nake nogo tebenogo punuk, wakkagak mban eeke minggirak.