Read Wano 2 KORINDUT 1 Bible Online

2 KORINDUT 1 - Wano bible

2 KORINDUT 1

¹An Pawulut Ala iniki mbareegeerak paga Keritut Yetut nen nappiigak agago mippaneegerak ninawot Timotiyut nimbirak nen, kit Ala apuri o Korindut kuwak eeko monggotak inom, it Ala apuri o Akaya menggaarak inom, kinom abok aret wone ambi yokkira o.

²Ninogoba Ala ninowe Yetut Keritut imbirak iniki kunik nen wokkirogwe, kiniki ugun obeelom logobagip nduk eeppinagagwi, eeko logogun o.

³Ninowe Yetut Keritut ogoba Ala nen ninabuwa mba'nuk obeelom eeppinanege, niniki eyak wappinanege, eeke menggerak unde at aret me, nit mondok alut eeko logowok o.

⁴Nit aaninggin-paaninggin ninoba age kenok, Ala nen niniki eyak wappinanege menggerak nogo ndak-ndak, it aakumi togop aaninggin inoba age kenok, iniki eyak wappiigo logowak nduk, Ala nen nit aa'nduk niniki eyak wappinanege menggerak.

⁵Keritut aaninggin-paaninggin eerogo pugwi iinok, Ala nen iniki eyak wappege nagagerak nogo kokwak, yogondak aakumi nen aaninggin iya tit ninoba pinanugwi iinok, Keritut ninom kunik me, ninabuwa nggwok ninombake logonet, niniki eyak wappinanege menggerak.

⁶Aaninggin-paaninggin ninoba age nogo ti, nit nen kiniki eyak wappinagagwi, ndi, obeelom eekkinakwi, eeruwak nduk, eeppinanugwi me, op aret o. Nit aaninggin ninoba pinanugwi iigak, niniki kwi'ndak logonet, waganggo monggoorak nogo, kit ndak-ndak eeppinagagwi iinok, kit togon, kiniki kwi'ndak logonet, waganggo logobagip nduk, nit nen kiniki eyak wappinagawok nduk, aa'nduk Ala nen nit niniki eyak wappinanege menggerak.

⁷Aaninggin nit ninoba age nogo ti, kit ndak-ndak kinoba age kenok, Ala nen niniki eyak wappinanege logonet, kit togon ndak-ndak kiniki eyak wappinagage nineenu me, kit Ala miireegutak nogo mbo pega'lek eeppinagagwi iigak kiniki nu'lek logonet, mondok mugurok nogo logomunggup kinombako ogoorik o.

⁸Nit o Atiya wonogwe me, aaninggin ninoba agagerak nogo kit kineenu arubagip nduk, yokkira o, noreewi. Nit o Atiya wonogome, aaninggin-paaninggin mondok iya lombok ninoba age mbareegi, ”Lek ariyak lek me, kambuurak op aret kogo,” mbareegurak.

⁹Nit kambuwak nduk, Ala nen abet aret ninoba lenggenogo pinanege mbareegurak kwe, ti ninoba agagerak nogo ti, nit ninomaawi paga obeelom wone yoranet noorak lek o. Ata, it kambunuk nogo menggam nen ineenik agago mippiige menggerak Ala nogo niniki at oba panggombunuk, ”At omaawi paga yoranet nogo ogoorik,” mbaruwok nduk, togop aret ninoba agagerak.

¹⁰Ti paga nen mondok kambuurak aret wonogogurak kwe, ninagap ndareegerak me, peebi togon ninagap ndarigin aret o. Ndi, yogondak eeppinanege yi paga at ninagap ndarigin abet aret mbakwi me,

¹¹kit kunduk ninake tamban eekwi nogo, ninogoba aruk konembunuk, ninabuwa nen obeelom eeppinanege nogo, it aakumi apit niigo logomenggaarik, Ala wogoppogo logowak nduk, ninake tamban eeko logonip o.

¹²Nit eerit nogo logonet, liippunuk eerit nogo monggoorak kwe, kit kinenggela'me logonet perak, mondok iya lombok eeko nogogurak nogo, abeko logonet it aakumi nggween paga mendek iniki koombunuk agan nugwi kwak agan nugwi, kinamendek kolaawok nduk, wone eegu nobak yokkirogwe, ti eeko logolik o. Ata, Ala ninabuwa nen omaawi eeppinanege kagak, mondok abet kenok mban kenom paganogo yokkirogo nogogurak nogo mban abe'nage kenok, ”Op eeko,” yinuk, niniki ale'nggen nen, ”Wi!” mban mbako ogoorik o.

¹³Kit nen liiru mbanak kenom koorak kenok mban mbanggirage minggirak. Ninowe Yetut woroorak eyom paga nit nen kit paga tiyappatugun mbakwi nogo ndak-ndak, kit kunduk, ”Pawulut oreewi inom nogo paga nit tiyappatugun o,” yinuk, nit eerit nugwi liippinanugo nogotik, ”Pawulut oreewi inom ti, ti nduk eerit nugwi me, op aret o,” ninombakwi kokwak, nit liiru mbanggirogwe yi ti, ”At Pawulut ti nduk mbannirage o,” yinuk, yelok niigo logomonggotik, neebe wo'ninabubagip nduk, ”Ao,” mbake logonet, yokkirage agarik o.

¹⁵”Kit nen, Pawulut alom yi nduk, liiru mbannirage kogo o, yinuk, neebe liippaninuk, wo'nabugun,” mbake logonet, aa'nduk kiya wage mbareegi, kiniki ale'nggen mbareegutak nogo ndak-ndak ne ambinom ale'nggen mbarubagip nduk, pekkiya woroorak ti abet aret kooneegirak.

¹⁶Pekkiya woroorak kooneegirak nogo ti, kit pekkiinok o Makendoniya wage logominggirik, ti'nuk, o Yureya noorak mbareegirak me, kit nen nappanubagip nduk, niyok paga pekkiigak naakit kooneegirak kwe, a'me arulik me,

¹⁷kit nen, ”Eegu ambime pegak, ambime pegak eekerak,” mba'nuk, yogo ogotik? An niniki nen mban koombunuk, ”Eeke logokit,” mba'nuk, noorak, ”Neebi,” mbake logonet, ”Naakit,” ari, ndi, ”Naakit,” mbake logonet, noorak, ”Neebi,” ari, ari minggirak mbakop?

¹⁸Lek o. An abet aret eeriyak nduk koongge minggirak nogo ti, Ala eenu aret o. Nit woroorak yokkirogogurak nogo ti, ”Nineebi,” mbako logonet, ”Woraawok o,” yokkiroolik. Ata, ”Woroorak aret,” mbako logonet, yokkirogogurak kwe, alom nonggop agagerak nogo ti Ala mban eenu aret o.

¹⁹An togon, Tilat togon, Timotiyut togon, nit kinenggela'me logonet, Ala aput Keritut Yetut eeke nagagerak wone yokkirogo nogogurak nogo ti, at nen, ”Eerikit,” mbake logonet, ”Neebi,” ari, ndi, ”Neebi,” mbake logonet, ”Eerikit,” ari, togop ari logolik. Abet aret, ”Eerikit,” mba'nuk, ari menggerak nogo ndak-ndak, nit kunduk abet aret, ”Woroorak,” mba'nuk, yokkirogogurak tit kwe, nonggop aga o?

²⁰Ndi, Ala nen Yetut Keritut eereegerak paga, ”Eekkinabigin o,” yinuk, yo'nirage menggerak abok aret, ”Abet aret eerigin,” mba'nuk, yo'nirage kenok, at endage tiyappogo logonet, ”Amin” yogo monggoorak me, nit ndak-ndak abet aret, ”Eeruwok,” mbako logonet, yokkirogo monggoorak.

²¹Keritut kunduk, kit kunduk, ninom mondok nu'lek agago kumbinanege, ndi, nit togon Ala ake leenogo pinanege, eereegerak nogo ti, Ala nen aret o.

²²Wam kugi aanggo pugu yelok kogo logowak nduk, aruk nggaganogo pogo mengga kwak, nit Ala apuri leenak yelok niigo logowak nduk, ninaruk nggaganogo negen pinanege, ndi, kwe koloorak nduk aa'nduk yiindi pogo mengga kwak, peebi nineebe aret wo'ninabikit nduk, Aberiniki ninikime yilinogo mambinanege, eereegerak.

²³An nen kit o Korindut pekkiya woroolik nogo ti, mbekkirage paga kiniki wakkolookwak nduk, mbet-mbet pekkiya woroolik ti, Ala eenu o.

²⁴Kit kiniki abet mbakwi nogo ti, mondok nu'lek wonogwe me, nit nen mban, ”Wone yi paga abet mba'nuk, waganggo logonip o,” yinuk, lengganogo yokkiroorak nduk, woroorak mbarulik. Ata, kit abet mba'nuk, kiniki ale'nggen mbuuluk kogwe nogo nggwok lombok kaabagip nduk, eeppinagi woroorak mbareegurak o.