Read Wano 2 KORINDUT 12 Bible Online

2 KORINDUT 12 - Wano bible

2 KORINDUT 12

¹An ee'nabeegerak iya mbareegirak ambi yokkiraakit mbake yi, kit ambi eeppinagarak nduk, yokkirage lek kwe, it ando, ”Nit iya o,” yinuk, agan nugwi iinok, an togon Ala nen nabiinggaanggo paga yo'nireegerak inom, ndi, wone kumaarak wonagagerak nogo paganogo yo'nireegerak inom, mbininogo yokkirage logi o.

²Nabiinggaanggo paga aap ambi Keritut imbirak kunik me, mbogut mbere tap mbanak kagak, ambiret tap mbanak paga pi lagangge nenegen kage nagagirik, wambi wagagirak neegak, 14 tahun eereegirak. Aap wonok laganeegerak nogo ti, eebe apit wonok laganeegerak a, ogoma mban wonok laganeegerak a, nogo ti an neenggo'lek o.

³At aap ti, kambunuk nogo menggam o obeelom nogome wonok laganeegerak wonage logonet, wone aakumi yogolik mendek abok aret yogwe iyareegerak. Aap ti eebe apit wonok laganeegerak a, ogoma mban wonok laganeegerak a, nogo ti, an neenggo'lek me, yagi. Ala perak eenu o.

⁵At aap ti, time pi laganeegerak wonage logonet, enegen kage, aruk konengge, eereegerak nogo ti, wogoppuurak op aret kwe, an eeke minggirak perak, neebe ninggin yinuk-punuk irak logonet eeke minggirak nogo mban mbininogo yokkirage agarik o.

⁶An eerit nage neegwi inom, noone ari konenggwi inom, liippaninuk, wogoppaniyak op aret kwe, ”An iya,” mba'nuk, ”Nenegen kagagirak nogo mbininogo yorage logi o,” yinuk, yokkirage neenok, kit nen, ”Yi kumili nen ari lek o. Yi abet aret enegen kage nagagirik, yo'nirage me, aap iya o,” nomba'nuk, wogoppanugwi kiyo, paganogo yokkiraagin lek o.

⁷Alik tam warak aakumi kogolik mendek nenegen kagagirak nogo paga, ”An iya o,” yinuk, wogoppatit nage neyo, Ala nen andi ambi nagabolo paga alok negen ngguurogo paneegerak ti paga Ibilit awuri ambi wage nagagirik, wogoppake neyo, nenggali wappanegak mban eeke menggerak o.

⁸Andi ti, lek ee'nabuwak nduk, ne kenagan paga Ala yoreegirak kwe,

⁹Ala nen an yo'nege logonet, ”Aaninggin-paaninggin koba age nogo paga an nomaawi kin aruwak nduk age me, aaninggin koba age kenok, Nogoba Ala nabuwa nen omaawi ndak-ndak eeppanege logogin, mbake logot o,” yinuk, yo'nireegerak me, Ala omaawi eeppanege kaakit nduk, andi ee'nake nogo ti, niniki ale'nggen ambik mbake logonet, ”Op eeppanigi,” mbake minggirak.

¹⁰Togop me, an meek ee'nake kenok, Ala omaawi eeppanege kagak, nomaawi ambik logonet eerit nage minggirak me, Keritut eeke nagagerak wone wigak yuwak nduk eeke neegak, an neebe andi-pandi ee'nake, miyuk-meya eerogo panugwi, ambi yo'negak mban eekwi paga niniki taganogo pugwi, piyak-payak eerogo panugwi, aaninggin-paaninggin noba panugwi, ee'nakwi iigak, ”Op mban aret ee'nakwi o,” yinuk, niniki tayenak ale'nggen aret minggirak.

¹¹An kumili negen aret ari kwe, alom kit eekwi paga an wone ti yokkirage agarik o. An aap nggwok me nduk, tiyappaniyak lek kwe, kit nen, ”It aap alik ti, Ala nen nappiya waga o,” yinuk, mondok tiyappiigwi nogo an ninom ndak-ndak wakkogo logonet, ”Pawulut it inabu'me negen lek o. Inom ndak-ndak aret o,” yinuk, ninom wogoppaniyak op aret kwe, wogoppanega'lek kenok, yokkirage agarik o.

¹²Kit nen, ”Pawulut yi Ala nen nappiigak mendek logowak nduk, abet aret leenogo pereegerak,” nombarubagip nduk, an niniki kwi'ndak kinenggela'me logonet, yokkirage neegak, kineenu ariyak mendek inom, eerubok mendek inom, kinagabiti warak mendek inom, abok aret Ala nen eeke nagagerak nogo o.

¹³It nappiigak ando Ala apuri yi awi ndi awi menggaarak nogo nen, ”Aap yi, Ala nen abet aret nappiya wagaarak,” mbaruwak nduk, inenggela'me logonet, eeko nogogwaarak nogo ndak-ndak an eeke minggirak inom wakkage logonet, an kit kinenggela'me ambi ngge eerulik puk agaarak me nduk, yogo ogotik? Kinake eeke nagagirak paga, ”Onggo wo'ninip o,” yinuk, yokkiragibok eekirak nogo perak, maluk eeppinagareegirak me, yogwe kiigi o.

¹⁴Aa'nduk ne mbere paga kiya wagagirak kwe, yogondak ne ambi inom pekkiya woroorak koongge agarik o. An wage ti, aaninggin ambi kinoba pinagakit nduk, woraagin lek o. Wologwe-aabologwe nen inogobamini inarum wonogolik o. Ata, inogobamini nen aret wologwe-aabologwe inarum menggaarak me, an kinogoba kinamendek ambi kolaakit nduk, woraagin lek o. Ata, kit kineebe lombok kinabuwa nen aret woraagin.

¹⁵Togop me, kit kinake eeke logonet, namendek tigippake, neebe nomaawi abu lek age, eeriyak ti, niniki ale'nggen aret mbake minggirak me, an kit kinabuwa ambik mbake neegak kwe, kit nen an nabuwa mbaka'lek negen kiyo nduk, yokkiragi o obak.

¹⁶Pawulut nen aaninggin ambi ninoba pinanulik ti abet aret kwe, eegu nobak logonet, ninambokan laganeegerak mbakwi kiigi o.

¹⁷Kit Ala apuri inake kuwak eerogo piigotak nodo ando mogonogo an kolaakit nduk, wologwe ti nappiya wage minggirak mbakop?

¹⁸At Titut Ala apuri inake pugu kuwak eerit nawak nduk nappege logonet, ore ambi imbirak nappiigirak nogo ti, abet aret nappiigirak kwe, kit kuwak eerogo pogotak nogo, Titut ando waganggerak mbakop? Woolik aret me, nit yeenggwagirogo logonet, niniki ambit koombunuk, eeko monggoorak lek mbakop? Lek o. Niniki ndak-ndak ambit aret koombunuk, eeko monggoorak.

¹⁹Wone yi abok aret yokkirogwe niigak, kit nen, ”Pawulut oreewi inom inaana'le mbanggo'net nogwe,” ninombakwi kiigirak kwe, nit togop lek o, noreewi. Kit lombok niniki kunik me, kiniki kole eekkinabuwok nduk, Keritut nen yo'nirage kagak, Ala enggaanom paga yokkirogo ogoorik o.

²⁰An kit eeko logorak mbake nogo kagak alik eekwi me kiya wage, ndi, kit nen, ”Togop eeruwak,” nombakwi nogo kiigak, alik eeri wage, eerukwak, an nagabiti mbake agarik o, noreewi. An kiya wage logominggirik, noone-koone agan nugwi, nuwa-kuwa yogwe, nanini-kanini mbakwi, an iya kat iya mbakwi, nabok-kabok yogwe, wone kinambe irip paga wonok nugwi, wogoppatit nugwi, ogoorak ka'lek eekkologwe, eekwi me kiya wage neyo, nagabiti ee'nake o.

²¹An kiya wage logominggirik, kit maluk abu alik negen eeko logonet, kumi ugun wurinabit nugwi, kiniki nengge kenok, ugun eekwi, eekwi nogo paga kiniki wakkologo logomonggotik, kinomaluk mbo pega'lek kiinok, an kinabuwa nen le ari Ala aruk konembunuk, kit kinenggaanom paga nenggali wappanege kero, nagabiti o, noreewi.