Read Wano 2 KORINDUT 3 Bible Online

2 KORINDUT 3 - Wano bible

2 KORINDUT 3

¹Wone yokkirogoorak ti, nit wogoppatuwok nduk yokkirogwe mbakop? It ando nen ineebe wogonabuwok nduk, eeko menggaarak liiru mbanak wonok wokkirogwe iinok, wogonako monggotak kwak, nit togop aret wokkiroorak mbakop? Ndi, aakumi alik nen nit wo'ninabuwak nduk, kit nen liiru mbanak wo'niroorak op mbakop?

²Nit kinenggela'me logonet, yokkirogwe niigak, Ala nen eekkinabeegerak nogo nit mondok aberak wonogwe me, aakumi abok aret kit liippinaganuk, nit eeko monggoorak ineenu ariyak liiru mbanak kwak, kit kineebe aret o.

³Nit yokkirogwe niigak, kit kiniki abet mba'nuk waganggo nogogutik, Keritut apuri logonet, eerit nugwi aakumi abok aret yelok kiigwi me, kit Keritut aliiru mbanak negen aret ogotik o. Liiru amburu paga mbanak ti lek o. Ata, aakumi ineenik aganaka Ala nogo nen Aberiniki nappi wagagerak nogo paga mbanak o. Ndi, yugum paga mbanak ti lek o. Ata, aakumi inikime aret mbanak wonage o.

⁴”Nit ninomaawi paga ambi eeppinagawok,” mba'nuk, yokkirogwe lek o. Ata, ”Ala nen eeppiyaawak o,” yinuk, niniki at oba panggombunuk, yokkirogwe niigak, Keritut nen eeppinagage menggerak me nduk, yokkirogo o.

⁶Ala nen Muta yoreegerak liiru mbanak nogo pekkogo logonet, ”An maluk eeke minggirak me, kambigin kagi,” yinuk, ninoorogo negen pinanege menggerak kwe, Aberiniki nen perak, nineenik ee'ninake menggerak me, Muta wone liiru mbanak nogo, nit yorogo logowak nduk mippinanulik o. Ata, Aberiniki nen eeppinaniyak wone ngget mendek koonogo yo'niragagerak nogo, at omaawi paga yorogo logowak nduk, mippinaneegerak.

⁷Wone ninoorogo negen pinanege menggerak wone yugum paga ayo wogo Muta unde wonagagerak nogo, we mbuuluk iya me, Muta etenggen we luulu ndelenak-welenak aago logonet, wonok wambi wage mbareegi, aakumi Iterali mendek liirogon pekkoorak meek agagerak kwe,

⁸wone ngget mendek koonogo yo'niragagerak Aberiniki unde logonet, eeppinanege menggerak ti perak, meek mbakop? Lek o. Ti mondok iya lombok aret o.

⁹Muta wone yo'nirage logonet, ”Kat maluk o,” yo'nirage kenok, wone ti iya mbako nogogurak kwe, obeelom wone yo'nirage logonet, ”Kat aap obeelom o,” yinuk, yo'nirage nogo ti meek mbakop? Lek o. Ti abunuk mondok iya lombok aret o.

¹⁰Wone aa'nduk mendek ti iya aret mbako nogogurak kwe, peebi wone mondok alik iya lombok ambi kenom age logonet, aa'nduk mendek nogo meek negen eerogo pereegerak.

¹¹Aa'nduk luulu logorak mendek kagak, wiigu nogogwaarak kenok, yogondak mondok-mondok logorak mendek yi, ”Iya!” yinuk, wiigu logorak lek mbakop? Lek o. Mondok iya me, wiigu logorak aret o.

¹²It aakumi Iterali mendek nen Muta etenggen we luulu ndelenak-welenak aago nogo lek age inigen kogwe iyo, etenggen nobakkolagagerak nogo pogom, nit togop eekulik o. Nit wone unde eeppinaneegerak nogo ti, mondok iya me, lek arigin lek mba'nuk, ninaanirilek logonet, yokkirogo monggoorak.

¹⁴Muta etenggen nobakkolagagerak me, ndelenak-welenak aago kaga'lek wonogogwaarak ti kokwak, it aakumi Iterali mendek iniki apit eerogo piyareegerak nogo, yogondak kuli awo aret wonage me, wone aa'nduk mbanak nogo pekkogo logonet, kenom kaga'lek aret wonogwe kwe, inomaluk mbo punuk, Keritut abet mbakwi iinok perak, iniki eya eerogo piyaagin o.

¹⁵Iniki apit aago yogondak kuli awo aret wonage me, Ala nen Muta yoreegerak liiru mbanak pekkogo menggaarak kwe, wone eebe yelok kaga'lek aret wonogwe o.

¹⁶”Inomaluk mbo punuk, ninogoba Keritut abet mbakwi iinok perak, iniki apit agago piyareegerak nogo, Ala nen lek eerogo piige kenok, kenom aret kogo logogun o,” yinuk, yereegerak liiru mbanak wonage o.

¹⁷Ndi, ”Ninogoba Keritut o,” yinuk, yereegerak liiru mbanak nogo ti, Aberiniki aret me, aap ambi Keritut nen nappiwagagerak Aberiniki nogo inikime wonage kenok ti, ”Muta yereegerak liiru mbanak ndak-ndak eeki ilik, lek a?” yinuk, iniki aaninggin lek ugun tayenak aret wonage o.

¹⁸Togop me, nit ninetenggen nobarak togop ti wonogwe lek o. Ala mondok tiyanak aakumi inigen kogo logonet, ”Wi,” yuwak nduk, Ala awukagi negen nit aret ogoorik o. At ninogoba mondok tiyanak kenok aakumi nen, wiigu nogo, nit togon liippugwi niinok, at etenggen ndak-ndak logowak nduk, at Aberiniki nen ninobaabut koonogo pinanege, ti'nuk, nit Ala awukagi negen me, aakumi nen liippinaninuk, ”Yi Ala etenggen ndak-ndak aret iigo,” yinuk, Ala endage tiyappugwi, eerit wundi nogo logogun o.