Read Wano 2 KORINDUT 7 Bible Online

2 KORINDUT 7 - Wano bible

2 KORINDUT 7

¹Togop me, noreewi wae. Kit an niniki kunik me, Ala nen wone yereegerak ti, nit niinok aret yo'niragagerak me, ninikime nen maluk eeriyak koonggwi eebe aret eekwi, eeko monggoorak nogo abok aret mbo punuk, Ala ninagabiti mbako logonet, maluk eeka'lek obeelom mban eekwi niyaawak nduk, eeko logowok o.

²Nit kunduk, nineebe wo'ninabubagip nduk, yokkirogo o. Alom lek kagak ninoone kinoba pinagagwi, maluk eeppinagagwi, wi-wi eekkinakwi, nit togop eeppinaga'lek aret ogoorik o.

³”Kit ninom niniki abu kunik me, ninom kanggwi, ninom nineenik logonet eerit nugwi, ti op mban o,” yinuk, muk yokkirogogurak me, wone yokkirogoorak ti, we nineebe wo'ninaka'lek kiinok, yokkirogwe ti lek o. Ata, we aret yokkirogo o.

⁴Kit ninom kunik me, abet aret wo'ninabumunggup mba'nuk, wogoppinagage minggirak. Aaninggin-paaninggin ninoba agagerak tit kagak kwe, kit abet mba'nuk, eerit nugwi paga niniki eyak wappaneegutak me, niniki ale'nggen abu alik negen ee'nake agaarik o.

⁵Nit o Makendoniya unggwi wogo nogogurik, aaninggin mondok alik negen ninoba kwi'nage mbareegi, niniki ale'nggen mondok lek aret wonogogurak. Niniki aaninggin age, nineebe piyak-payak eerogo pinanugwi, eeppinaneegwaarak kwe,

⁶it aakumi iniki wakkologwe iinok, iniki eyak wappiige menggerak at Ala nogo nen, nit niniki eyak wappinanuwak nduk, aap Titut nappi wagaarak.

⁷At eebe niya wagaarak ti paga mban lek o. Ata, wage nagaarik, kit pe'niya woroorak, ”Ao,” mbakwi nogo inom, eereegutak paga kiniki wakkologwe nogo inom, ndi, an nabok mbanggwi iinok, kinoone omaawi paga an naana'le mbanggwi nogo inom, abok aret mbininogo yo'niragaarak ti paga, niniki eyak wappinanegerak me, yogondak niniki ale'nggen ambik mbake agarik o.

⁸An liiru mbanogo nappinagi wagagirak nogo pekkogo nogogutik, ”Ao,” yinuk, kiniki wakkologogutak nogo konengge nagagirik, ”Mbanogo nappiyoorak lek mendek eekirak ao,” yinuk, an togon niniki wakkolagagirak kwe, ti'nuk, ”Mondok-mondok ti lek o. We ne ambit iluk aret iniki wakkolaga o,” konembunuk, an togon, ”E. Ti kenok, op aret mbanogo nappiyareegirak kagi,” yinuk, mbake agarik o.

⁹Ndi, yogondak perak, keyage ambik wake agarik o. Kit kiniki wakkolaabagip nduk, eereegirak mba'nuk keyage wake lek o. Ata, an liiru mbaneegirak nogo pekkogo nogogutik, ”Abet aret yo'nirage kagi,” yinuk, kiniki wakkologo logonet, maluk mbo pereegutak ti paga, an keyage ambik wake agarik o. At Ala nen, ”Iniki abet aret wakkologwe iinok, an nen inomaluk lek eerogo piyaagin o,” mbake menggerak ndak-ndak kit abet aret kiniki wakkologogutak me, liiru mbaneegurak ti paga nit maluk eeppinagulik aret mbako.

¹⁰It iniki abet mbaka'lek mendek nen inamendek ambi lek age kenok, iniki wakko'net nogo nagaatik, irip paga kambit nogo menggaarak kwe, nit perak, Ala nen iniki wakkolaawak mba'nuk eeppinanege nogo ti, nit maluk eekwi nogo niniki koombunuk, mbo pugwi niinok, Ala nen ninagap ndarogo nineenik logowak nduk, eeppinanege menggerak me, ”Iniki wakkolaawak nduk, mbo piigibok eekirak ao,” yinuk, yigin lek aret o.

¹¹Kit kiniki wakkologo mbareegup, Ala nen eeppinagareegerak nogo abeko logonip o. Kit eereegutak nogo ti, kiniki wakkologo logonet, maluk kinenggela'me wonage nogo mbet-mbet koonggwi, ”Maluk nabenggolagaarak,” kinombarukwak, mbet-mbet kinaana'le mbanggologwe, ”Ala nen ninoorukwak ninagabiti,” mbako logonet, at maluk eereegerak nogo mondok kineebi mbakwi, ”Wone yi agaarak nogo ninogoba Pawulut ninom koonuwok lak ao,” mbakwi, maluk eerak mbet-mbet aganggen kerek togon owak loonggwi, eereegutak nogo mbininggo logonet, kit maluk ambi eerulik obeelom aret owak loonggotak kiigo o.

¹²Togop me, an liiru mbanogo nappinagi wagagirak nogo ti, at maluk eereegerak nogo inom, ndi, it maluk eeppiyareegerak nogo inom, it inake mban ti, liiru mbanulik o. Ata, kit nen kiniki kunik ninombako logonet, yokkirogwe nogo mbet-mbet aret liippunuk eekwi Ala nen kiyaawak nduk, liiru ti, mbanogo nappinagi wagagirak.

¹³Liiru mbaneegurak nogo, ”Pekkogo nagaarik, mbet-mbet koonggaarak,” ninaruk konembunuk, niniki ale'nggen ambik mbako ogoorik o. Ti awo mbakwi niigak, Titut iniki eyak wappogotak me, ale'nggen ambik mbake logonet, nit yo'nira wage mbaki, nit togon abunuk niniki ale'nggen ambik mbako o.

¹⁴Nit abet kenok mban yokkirogo nogogurak me, tiyappinagago logonet, kit eerit nugwi abok aret Titut mbininogo yogo mbareegu, kiya nage nagagirik, yoreegurak nogo ndak-ndak eekwi enegen kiyareegerak me, mbininogo yo'nira wage mbaki, ninenggali aga'lek niniki ale'nggen ambik aret mbako ogoorik.

¹⁵At Titut aa'nduk kinabuwa mbake nagagerak kwe, kiya nage mbareegi, kinagabiti nen kinaganak nuk-nuk yogo logonet, keyage warogo eebe waganggo nogogutik, kooniyak yokkirogogurak nogo, ”E o,” yinuk, mbet-mbet koonggwi kiyareegerak nogo, aberak logonet, yogondak abunuk kinabuwa nggwok lombok mbake agaarik o.

¹⁶Kit eerit nugwi abok aret obeelom mban eerit nugu logomunggup aret kinombake logonet, an niniki ale'nggen mbake agarik o.