Read Wano NGGALATIYA 2 Bible Online

NGGALATIYA 2 - Wano bible

NGGALATIYA 2

¹Ti'nuk, 14 tahun eeppunuk, an ne ambinom o Yerutalem nawak nduk,

²Ala nen lalin negen niniki koonogo panege mbareegi, aap Mbaranabat nimbirak nogo logonet, aap Titut nogo waganggak nogogurak. Nogo nogogurik, obeelom wone it aakumi endekem konenggulik mendek yorage minggirak nogo, it ninoweewi inendage warak Ala apuri o Yerutalem unde menggaarak ketuwa-ketuwa nogo, ”Yorage neenok, it nen, Kat wone alik yorage menggendak keego, yinuk, yo'nugwi iinok, Yoranet nege nagagirak inom, yorage minggirak inom, we aanom warogo eeke nagagirak kagi,” yinuk, mbake neyo, nagabiti mbake logonet, it nogo mban inaa'nduk inalik aret paganogo yoragagirak.

³Nogo yorage nagagirik, at ninore ninom nogogurak Titut nogo, aap Nggerika mendek me, it aap ando we piliret, ”Nit kinoreewi aret o,” yinuk, ninenggela'me unggwi wogogwaarak nogo nen, ”Agabolo mbaniyak,” mbakwi iyareegurak kwe, it ninoweewi ketuwa nogo perak, ”Mbaniyak,” yo'niraga'lek puk mban wonogwe iyareegurak. It aap ti, nit Keritut Yetut ninom kunik logonet, wondet agago pinaneegerak wone kologo logonet, Yakuri wone mbo pereegurak nogo, ambinom eeko logorak yilinogo pinanuwak nduk, unggwi wogogwaarak kwe,

⁵kit Ala abet aret ari menggerak obeelom wone waganeegutak nogo mban enaani porogo logonet, eerit nogo logobagip nduk, nit wone mbo pereegurak ambinom eeriyak yo'niraawak nduk unggwi wogogwaarak nogo, ”E o. Eeruwok o,” yinuk, yoroolik, ”Kinobaalombok o,” yinuk, mbo piyareegurak.

⁶Ndi, it ninoweewi inendage warak ketuwa-ketuwa yagarak nogo ti, Ala nen ninetenggen maloppinaninuk, ambi yi iya, ambi yi meek, ninombakeelik me, an togon inendage ti paga iya mbakeelik kwe, it ninoweewi inendage warak me, ”Inayuk wuke logonet wone eerit nagagirak nogo mbininogo yorage neenok, it nen wone ambi abuk nggaruk togon, Yi eeriyak o, yinuk, yo'nugwi iyaamun ilik?” mbareegirak kwe, it kunduk puk mban wonogwe iyareegirak.

⁷Wone obeelom wone it aakumi inagabolo mbanak mendek yoranet nage logowak nduk, Ala nen aap Peterut unde eeppunuk nappereegerak nogo kokwak, an ndak-ndak obeelom wone it aap endekem konenggulik mendek yoranet nage logowak nduk, unde eeppaninuk, nappaneegerak nogo, kogo nogogwaarik,

⁹it nggereya alom omaawi o Yerutalem unde wonogwe nogo, inendage Yakobut kunduk, Kepat kunduk, Yaya kunduk nogo nen Mbaranabat nimbirak yo'nirogo logonet, ”Ala nen kinabuwa mbake logonet, unde eeppinagareegerak me, op aret o. Kit aakumi endekem mendek yora nogwe, ndi, nit inagabolo mbanak mendek yorogwe, eeko logowok o,” yinuk, keyage warogo nappinaneegwaarak.

¹⁰Nappinani wogo logonet, ”It aakumi ineenggi lek tebenak wonogwe nogo, inabuwa mbako logonip o,” yinuk, ti mban yo'nirogo mbareegwa, an kunduk ti, niniki luunik logonet, eerit nage minggirak me, ”Op aret yo'niraga o,” mba'nuk, wogogurak.

¹¹Ti'nuk, peebi at ninowe Yakobut nen awuri nappiya wagagerak nogo, awo waga'lek iigak, at Kepat endage ambi Peterut nogo nen o Andiyokiya wage nagagirik, aap endekem konenggulik mendek inom mbi ugun nengge nagagerak kwe, Yakobut nen nappiya wagagerak nogo, wogwe iige nagagirik perak, ”It yi inagabolo mbanggo menggaarak me, nonggop yo'nirumengga?” yinuk, agabiti nen ogookkolage mbareegi, an nggwok paga aret enggali wappereegirak.

¹³Ti'nuk, it aap Yakuri mendek ando Ala apuri wonogogwaarak nogo, Peterut iniki mbere eeke kogo nogogwaarik, it ndak-ndak ogookkologo mbareegwa, aap Mbaranabat kunduk, it Yakuri mendek iniki mbere ogwe iige nagagirik, ”Ie! An nonggop eeri?” mbake nagagirik, Peterut inom aret nabennagagerak.

¹⁴Ndi, an togon Ala nen abet aret yereegerak obeelom wone yugu kagak alik eerit nugwi iige nagagirik, it apit inenggaanom paga Peterut yoge logonet, ”Kat aap Yakuri mendek aret kwe, it Yakuri mendek eeko menggaarak kwak eeka'lek logonet, it endekem mendek eeko menggaarak nogo op aret eekendak kwe, yogondak, nonggop nduk it endekem mendek nen it Yakuri mendek eekwi kwak eeko logowak nduk, mamunirage agandik o?” yinuk, enggali wappereegirak.

¹⁵”It aap endekem konenggulik mendek ti maluk mendek o,” yogwe nogo, nit aap togoti mendek lek o. Nit aap Yakuri mendek abet aret nda'nogogurak kwe,

¹⁶Ala nen wone lengganogo Muta yoreegerak nogo ndak-ndak eekwi niinok, obeelom agago pinanigin lek o. Ata, Keritut Yetut abet mba'nuk, niniki at oba panggombugwi nogo paga obeelom eeppinanege menggerak nineenu me, nit togon Keritut Yetut abet mbareegurak o. Wone lengganogo Muta yoreegerak wone nogo eekwi paga aakumi obeelom agago piyaagin lek me, nit Yakuri mendek kunduk, obeelom agago pinanuwak nduk, wone lengganogo Muta yoreegerak nogo eekwi lek o. Nit togon Keritut abet mba'nuk, niniki at oba panggombereegurak aret o.

¹⁷Keritut niniki abet mbakwi paga nit obeelom agago pinanuwak nduk, eeko logonet, ”It aakumi endekem maluk eeko menggaarak ndak-ndak nit eeko monggoorak kogo o,” yinuk, nineebi mbako logonet, ”Keritut abet mbakwi wone nogo paga ninomaluk kenom agagerak me, Keritut ti maluk aret o,” yinuk, yuurak op mbakop? Mondok mage o, noreewi.

¹⁸An mbo pereegirak nogo waganogo obaane'me eeke neenok, it aakumi nen, ”Op eeriyak kagak mbo pereegerak nogo ti, maluk aret eereegerak o,” yinuk, nombarugun lek mbakop? Togop aret nombarugun me,

¹⁹wone lengganogo Muta yoreegerak kagak alik eereegirak paga noorogo paneegerak kambeegirak negen me, yogondak, ”Yogop ee'nu, ndogop ee'nu,” yo'nege nogo, an koneniyak mondok meek o. Ala nen yo'nege kenok mban eeke agarik o.

²⁰An Keritut nimbirak eyo karo-karo paga nabenogo paneegwaarak me, kambeegirak. Ndi, yogondak eerit nage minggirak nogo ti, an nomaawi paga lek o. Keritut omaawi eeppanege kagak eerit nage minggirak me, an nggween paga yime logonet, at Ala aput nabuwa mba'nuk, nake kambeegeerak me, at abet mbake logonet, niniki at oba panggombunuk, eerit nage agarik o.

²¹Wone lengganogo Muta yoreegerak wone nogo, nit eekwi paga obeelom eerogo pinaniyak op mba'netak en, Keritut we aanom warogo ninake kambeegerak mba'netak o. An mbo pereegirak nogo obaane'me eeke paga Ala nabuwa mbake logonet kooneegerak nogo, meek eerogo pukwak, an togop eerigin abu lek o, noreewi.