Read Wano NGGALATIYA 3 Bible Online

NGGALATIYA 3 - Wano bible

NGGALATIYA 3

¹Kit Nggalatiya mendek yi wae. Yetut Keritut eyo karo-karo paga kambeegerak wone nogo, kumaarak lek mondok kin paga aret paganogo yokkirage nagagirak konenggo nogogutak kwe, yogondak kugi pulunogo pinagagaarak kiniki lek kumili negen agan nugwi kiigi o.

²Kit wone onggo ambi yo'nirubagip nduk, yokkiraakit mbakirak nogo yi o. Kit Muta wone lengganak nogo, eerit nogo nogogutak paga Aberiniki waganeegutak ilik, obeelom wone konembunuk, abet mbareegutak paga waganeegutak a? Mbet yo'ninip nda!

³Kit kiniki ngget ndakkinabeegerak nogo ti, Aberiniki nen aret kwe, yogondak wone lengganak nogo eerit nogwe paga, ”Niniki kole eekkolaawok o,” yinuk, eeko ogotik ya? Kit kiniki lek wi negen aret eekwi kiigi o.

⁴Kit wone waganeegutak nogo paga mondok alik negen piyak-payak eerogo pinagagwi iigak, kiniki yanggonak logonet, waganggo nogogutak nogo ti, we aanom warogo waganggo nogogutak ya? An togop mbake lek o, noreewi.

⁵At Ala nen Aberiniki wokkirage, ndi, kinenggela'me eerubok mendek eeke, eeke menggerak nogo ti, kit Muta wone lengganak nogo ndak-ndak eekwi paga eeke menggerak ilik, obeelom wone konembunuk abet mba'nuk, waganeegutak nogo paga eeke menggerak a? Kit yinip nda!

⁶”Aap Abarakam nen abet mba'nuk iniki Ala oba panggombereegerak paga obeelom agago pereegerak o,” yinuk, yereegerak liiru mbanak nogo ndak-ndak, nit togon abet mbakwi niinok, obeelom eeppinanege menggerak me nduk, yokkiragi o.

⁷Togop me, it aakumi abet mbakwi nogo mban Abarakam ombowologwe wonogo menggaarak kagi o.

⁸At Ala nen Abarakam yoge logonet, ”Kat eeremenggendak paga yi aakumi ndi aakumi abok nale'nggen inoba piige logogin o,” yinuk, obeelom wone yoreegerak nogo, it aap Ala nen yorage kagak yorogo nogogwaarak nogo nen, ”Wone yi paga peebi at Ala nen aakumi endekem mendek abet mbakwi iinok, obeelom agago piyaagin kogo o,” yinuk, yelok kogo nogogwaarik, liiru mbaneegwaarak.

⁹Togop me, at Abarakam abet mbake mbareegi, Ala ale'nggen at oba pereegerak nogo ndak-ndak, nit togon abet mbakwi niinok, Ala nen ale'nggen ninoba pinanigin aret o.

¹⁰Ala wone mbanak paga nen ari logonet, ”It aakumi Muta wone lengganak nogo tigitogon eeko logonet, ambiriluk ambi eeka'lek taganogo mbo pugwi kenok, Ala nen pulunogo piyamenggerak me, kambugun aret o,” yinuk, yereegerak me, nit obeelom agago pinanuwak nduk, ”Wone lengganak ndak-ndak eeruwok o,” yinuk, eerumonggoorak kwe, ndak-ndak eeriyak meek me, kagak kanggo logogun aret kogo o.

¹¹”Aap ambi iniki abet mbake kenok, Ala nen obeelom agago pemenggerak me, eenik mondok aret logogin o,” yinuk, liiru mbanak ti paga, Muta wone lengganak ndak-ndak eekwi paga Ala nen obeelom eerogo pinanigin lek nineenu kwe,

¹²aap ambi, ”Ala nen obeelom eerogo panuwak nduk, Muta wone lengganak nogo ndak-ndak eerit nage logokit o,” yinuk, mbake kenok ti, at abet mbake paga, ”Eeppaniyak,” mbake lek, eekkolage paga, ”Eeppaniyak,” mbake kagak kwe, Muta wone mondok ndak-ndak eeke me, abet aret eenik aret logogin o.

¹³Ndi, Ala wone mbanak paga nen ari logonet, ”Aap ambit-ambi eyo karo-karo paga nabenogo wakwi iinok, at kugi pulunik aret me, waka o,” yinuk, yogo menggaarak liiru mbanak wonage me, Ala nen lengganogo Muta yoreegerak wone yugu kagak nit alik eeko nogogurak ti paga, nit togon kambuwak nduk, kugi pulunogo piigo mengga kwak, pulunik aret wonogogurak kwe, lek aruwak nduk, Keritut ninobaane'me eyo karo-karo paga nabenogo pereegwaarak ti paga, ninonggo mbambunuk, wondet eerogo pinaneegerak wonogo ogoorik o.

¹⁴Ti eereegerak nogo ti, nit abok aret niniki abet mbakwi paga Ala nen ”Aberiniki wokkiraagin o,” yinuk, abok yo'niragagerak nogo, waawok nduk, Ala nen, ”Nale'nggen koba pagagin o,” yinuk, Abarakam yoreegerak nogo ti, Keritut Yetut eeremenggerak paga it aakumi endekem mendek ninom niniki ale'nggen mbaruwok nduk, eereegerak kogo o.

¹⁵Noreewi o. Nit yogo monggoorak ambi wakkagak yuwok o. Nit aap nggween paga mendek aret kwe, aap ambi ninom wone mbambunuk, ”Mondok ndogop eeruwok o,” yinuk, nineenggi amburu pugwi niinok, aap alik ambi nen wone ti taganogo mbo pege, ndi, at alik ambi nen wone alik ambi inom nabenogo pege, eeriyak mondok meek aret kogo monggoorak nogo ndak-ndak,

¹⁶at Abarakam ombowologwe inom peebi eeriyak wone Ala nen Abarakam yoge logonet, ombowologwe ineebe ambik kenok, ”Kombowologwe o,” yinuk, ti yoroolik. Ata, eebe ambit Keritut aret me, ”Kombooluk o,” yoreegerak.

¹⁷At Ala nen Abarakam imbirak wone mondok abuk nggaruk togon mbaneegwaarak kagak, 430 tahun eeppunuk, Muta wone lengganogo yoreegerak me, peebi lengganogo yoreegerak nogo paga nen, aa'nduk yugu nogo awo eeka'lek kagak, lek eerogo puurak op mbakop? Meek me nduk, yokkiragi o, noreewi.

¹⁸Nit abet mbakwi paga Ala nen eeppinaniyak Abarakam abok yoreegerak nogo, peebi Muta wone lengganogo yoreegerak nogo, eekwi paga eeppinaniyak mba'netak en, aa'nduk at Abarakam ti, yo'netak lek kwe, yoreegerak me, abet mbakwi niinok woorak nduk, yoreegerak kogo o.

¹⁹Togop yoreegerak me, Ala nen wone lengganogo Muta yoreegerak nogo ti, nonggop nduk, yoreegerak mbakop? Lek o. Abet mbakwi paga woorak yoreegerak wone nogo, eebe kin ari waga'lek kagak, maluk aa'nduk kin kogo logowak nduk, Muta wone lengganak ti, inom nabenogo yoreegerak. Wone lengganogo Muta yoreegerak nogo ti, Ala nen nok-nok aakumi Iterali yoroolik. Ata, it melaikat nen waganogo aap nggween paga mendek ambi yogo mbareegwa, at nen wonok aakumi yoragagerak.

²⁰Aap mbere nen, ”E o,” yinuk, eeko logowak nduk ambi yegetak wonok ambi yogak eeko menggaarak kwe, Abarakam yoreegerak nogo perak, Ala eebe ambit aret me, alik en iniki koombunuk nggaruk togon, ”Eerikit,” mbareegerak me, nok-nok Abarakam yoreegerak.

²¹Togop kenok, wone lengganogo Muta yoreegerak inom, ndi, Abarakam abok yoreegerak wone inom, ti alom alitak mbakop? Mondok lek o, noreewi. Nit nineenik logorak nduk, wone lengganak alom alik ambi logonetak en, wone ti wappunuk eekwi paga obeelom eeppinaniyak mbako logonetak kwe,

²²lek me, Ala nen eeppinaniyak yoreegerak nogo, nit yi aakumi ndi aakumi abok aret niniki Yetut Keritut abet mbakwi paga eeppinanuwak nduk, tokkogo logonet, ”Nit abok aret maluk eeko monggoorak me, kambugun kagi,” mbaruwok nduk, wone lengganogo Muta yoreegerak nogo paga wam anggenogona narak negen wonogogurak.

²³Nit abet mbakwi paga woorak yugu nogo, wage kenok, ”Abet mba'nuk, waganggo logowak o,” yinuk, awo kin ari waga'lek kagak, wam anggenogona nappiigo mengga kwak Muta wone lengganak nogo paga narogo pinaninuk wonagagerak.

²⁴Togop me, Yetut wage kenok, ”Kit abet mbakwi paga obeelom agago pinagarak yi o,” yo'niraawak nduk, Muta wone lengganak nogo ti, we luulu abu'me aret pinanogo wonagagerak kwe,

²⁵niniki abet mbakwi paga woorak nogo, muk kin ari wagagerak me, yogondak wone lengganak luulu wonagagerak nogo abu'me wonogwe lek o.

²⁶Kit abok Keritut Yetut abet mba'nuk, kiniki at oba panggombereegutak me, kit Ala apuri aret ogotik o.

²⁷Keritut kinom kunik kenok, yiime wambeegutak me, Keritut obaabut ndak-ndak aret ogogutak o.

²⁸Kinobaabut ambit Keritut mendek ogogutak me, yi Yakuri mendek yi Yunani mendek, yi aap endage warak yi aap endage lek, yi aap yi kwe, togop yuurak mondok lek aret o. Nit abok Keritut Yetut ninom kunik me, nineebe ambit aret ogoorik o.

²⁹Ndi, nit Keritut apuri abet aret wonogwe kenok, Abarakam ombowologwe aret me, wone abet mbakwi paga woorak abok yoreegerak nogo, nit aret waganggo ogoorik o.