Read Wano NGGALATIYA 5 Bible Online

NGGALATIYA 5 - Wano bible

NGGALATIYA 5

¹Nit wondet aago nugu logowak nduk, Keritut nen wondet agago pinaneegerak me, it aakumi inayeloman tebenak mengga kwak, inabu'me pinagawak nduk, ”Yogop ee'nuk, ndogop ee'nu,” yereegerak wone nogo, yokkira wogwe iinok, inoone konengga'lek mondok kinogogumbuk logonip o.

²Kit liippatubagip nduk, an Pawulut nen wone ambi yokkira o. Kit kinagabolo mbaniyak mbakwi kenok, Keritut nen eeppinagarak mbake nogo, ambi eeppinagagin mondok lek aret o.

³Kit kinagabolo mbaniyak mbakwi kenok, wone ”Yogop ee'nu, ndogop ee'nu,” yugu nogo, ando taganogo punuk, ambiriluk miippunuk, eeriyak lek mondok tigitogon eeko logorak ariyak me, mbo pubagip nduk, yokkiragi o, noreewi.

⁴Wone lengganogo Muta yoreegerak nogo, eekwi paga obeelom eekkoloorak mbakwi nogo, Keritut kinom ogookkologwe me, Ala kinabuwa nen eeppinagarak kooneegerak nogo lek eerogo pako ogotik.

⁵Nit abet mbareegurak nogo paga Aberiniki nen obeelom agago pinanuwak nduk, niniki luunik logonet, tokkogo ogoorik o.

⁶Nit Keritut Yetut ninom kunik logonet, ninagabolo mbanak inom, mbanak lek inom, ti iya lek o. Ata, niniki abet mbareegurak paga aakumi inabuwa nen obeelom eeppiinet nogo logorak nogo perak iya o.

⁷Kit aa'nduk, kiniki aganggen paga Ala abet aret ari menggerak wone nogo, op aret mugurok nogwe kiige nagagirak kwe, Ala wone mbo puwak nduk, ta nen kiniki nggagambunuk nomonggiren nage agaarik o?

⁸Ala wone mbo punuk, alik eerit nugwi nogo ti, at yonggo pinagareegerak nogo nen yokkiroolik. Ata, it aap alik nen aret kiniki nggaganogo punuk, nomonggiren nogwe iigi o.

⁹”Kom ambiret mboro age nagaatik, engga maluk kungge logonet, apit aret maluk age menggerak o,” yinuk, yogo menggaarak nogo abe'nip o.

¹⁰Nit ninowe ninom ambit kunik me, an mbake minggirak nogo, kit ndak-ndak mbako logonet, eerit nogo logorak abet aret kinombake logonet, yokkiragi o, noreewi. Ndi, at nomonggiren nage nogo perak, Ala nen maluk onggo wogorigin me, agabiti mbake logowak o.

¹¹Ndi, noreewi o. An perak, alom ngge paga piyak-payak ee'nakwi mbakop? An, ”Kinagabolo mbaniyak o,” agan nege logonetak nen, piyak-payak agago paninetak lek kwe, Yetut eyo karo-karo paga kambeegerak wone yoranet nage logonet, ”Kinagabolo mbaniyak lek o,” yinuk, non mbanogo piinet nage paga, inanini nombako logonet piyak-payak ee'nako agaarik o.

¹²It aap kiniki abut laganit unggwogwe nogo inagabolo ti mban mbaniyak lek o. Ata, eebe inom aret mbanogo nappako logowak nduk, teppiyaanip o.

¹³Noreewi o. Kit perak, wondet aago nugu logobagip nduk, Ala nen miikkinabeegerak me, ”An nanonggwan wondet agago paneegerak me, niniki nengge kenok ugun eerit nage logi o,” yinuk, yuurak ti mage o. Ata, nabuwa-kabuwa mbako logonet, kinoreewi kinom yeenggwa-yeenggwa eeko logonip o.

¹⁴”Kit kineebe kiniki kunik eekkologo monggotak pogom, kinom monggotak togop aret kiniki kunik aganako logonip o,” yinuk, yo'niragagerak nogo ti, wone lengganak eebe tigi-togon eekwi ti aret o.

¹⁵Kit neyak-keyak yogo logonet, at ambi nibinogo nappegak eekwi paga kineebe lek eerogo pakwi kiyo, liippogo logonip o.

¹⁶Aberiniki nen yokkirage nogo aret eerit nogwe kiinok, kiniki nengge nogo mugurok noorak eekkinabigin lek o, yinuk, yokkiragi o.

¹⁷Niniki maan mendek nen Aberiniki warikit mbake, ndi, Aberiniki nogo nen niniki maan mendek warikit mbake, eeko logonet, imbirak wim negen ogoorak togon wonogwe me, kit eeriyak mbarumonggotak nogo, eeriyak meek aret kaamunggup o.

¹⁸Ndi, Aberiniki nen yokkirage nogo eerit nogwe kiinok perak, wone lengganak nogo abu'me logomunggup lek o.

¹⁹Inobaabut maan mendek paga eeko menggaarak nogo yi o. Kumi ugun wurinabit nugwi, iniki kumi paga mban luunik logonet ugun-ugun eerit nogwe, iniki nengge kenok mugurok nogwe,

²⁰kuguwak amuli kunggwi, magagirak paga aakumi inookwi, iniki ogoorik-ogoorak wonogwe, wone wakwi, nuwa-kuwa yogwe, inanini mbet-mbet wungge, an eeke mban op mbakwi, an iya kat iya yogwe, iniki nen koombunuk pilit pugunogo agan nugwi,

²¹neebi-keebi yogwe, amburu kumili aganake mendek neenok kumili-kumili agan nugwi, kwaanggen wappunuk inoone amburu paga kumi ugun-ugun eeginabit nugwi, ti mendek abok aret, it eerit nogwe iinok, at Ala abu'me piige minggim nogome unggwi nagun mondok lek aret o, yinuk, aa'nduk yokkiragagirak nogo aret yokkiragi o, noreewi.

²²Eyoonggen abe yit nage minggi kwak, Aberiniki ninikime logonet, eerit nogo monggoorak nogo yi o. Aakumi inabuwa mbakwi, niniki ale'nggen mban mbakwi, niniki ugun tayenak wonogwe, niniki aanaganggenggwi lek kwi'ndak wonogwe, ninobaabut abu obeelom wonogwe, aakumi obeelom eeppiinet nugwi, liippunuk mban eerit nogwe,

²³niniki yanggonak wonogwe, eeriyak niniki nengge kenok mbet-mbet tebenogo pugwi, eeko monggoorak ti paga, ”Kit maluk eekotak aret o,” yinuk, at Ala nen wone ambi ninoba pinanigin mondok lek o.

²⁴Nit Keritut Yetut apuri kenok, niniki maan mendek paga nen maluk eeriyak niniki nengge nogo, mondok warogo tebenogo wuppogo monggoorak.

²⁵Nit Aberiniki nen pi'niren noorak mbakwi kenok, at yo'nirage nogo mban aret eerit nogo logowok o.

²⁶Kit wogoppako logonet, an iya kat iya yogwe, at ambi obeelom eeppugwi iinok, nuwa-kuwa yogwe, eeko logogup o, noreewi.