Read Wano NGGALATIYA 6 Bible Online

NGGALATIYA 6 - Wano bible

NGGALATIYA 6

¹Noreewi o. Kinore ambi perak togon yigeebu wangge kenok, kit aap Aberiniki kinom kunik monggotak nogo nen, ”Noreeluk iniki nggagangge mbaki, yigeebu wanggerak nogo kokwak, an togop wangge neyo nagabiti o,” yinuk, kinoone yanggorogon awone mbanggo logonip o.

²Aaninggin kinoba age kenok, yeenggwa-yeenggwa eerumonggotak paga Keritut wone lengganogo yo'niragagerak nogo ndak-ndak aret eeko logomunggup o.

³Kit aap iya lek kwe, ”Nit iya o,” mbakwi kiinok, kit aret kinambokan laganggologwe me, liippako logonip o.

⁴Kit ambi nen at ambi eeke wakkagak eeko logogup o. Ata, kinalitak lombok eeko monggotak nogo wakkaanuk, op kenok kiniki ale'nggen mbakwi, ndi, maluk kenok mbo pugwi, eeko logonip o.

⁵Nit ninalitak aret ninobaalombok eeko logowok o.

⁶Nit Ala wone konenggo monggoorak nogo nen, ninamendek obeelom nogo mogonogo ninogobamini mamunnirogo menggaarak nogo wogoroorak ti op aret o.

⁷Ala ambokan laganggulik kagak, ambokan laganggwi kiinok, kit aret kinambokan laganggologwe me, liippako logonip o. Aap ambi awi yake ndak-ndak anggen togop aret mbanggolage menggerak me,

⁸kit kiniki maan mendek nen eeriyak eekkinake nogo, eerit nogwe kiinok, anggen yugu maluk mendek mbanggologwe nogo kokwak, kineebe aret kambumunggup o. Ndi, Aberin ki nen yokkirage nogo mban mugurok nogwe kiinok perak, anggen yugu abe mendek mbanggologwe ti pogom, mondok-mondok kineenik aret logomunggup o.

⁹Togop me, nit yi obeelom ndi obeelom eerit nogo logonet, anggon-panggon ee'ninake kagak, mbo pega'lek mondok aret eerit nogwe niinok, anggen yugu obeelom mbanggologwe nogo kokwak, nit onggo wo'niroorak nineenu me, ta'liila ee'ninake kenok mbo puurak mage o. Kagak aret eerit nogo logowok o, noreewi.

¹⁰It yi aakumi ndi aakumi abok aret obeelom eeppiyoorak, ”Nanonggwan aga o,” yinuk, obeelom eeppiinet nogo logonet kwe, it aakumi nit ninom ndak-ndak abet mbakwi nogo kenok perak, obeelom eeppiyoorak mondok aberak aret logonip o.

¹¹An neenggi paga liiru mondok nggwok lombok mbanggirage yi kaanip o.

¹²It aakumi nen iya ninombaruwak nduk, wogoppatit nugwi nogo ti, Keritut eyo karo-karo paga kambeegerak wone yoranet nugwi paga piyak-payak ee'ninaburak inagabiti mbako logonet, ”Kinagabolo mbaninip o,” yinuk, inoone omaawi paga yokkirogo menggaarak.

¹³It inagabolo mbanak nogo nen Muta wone lengganak nogo ndak-ndak eeka'lek logonet, kit mban eeko logobagip nduk, yokkirogwe nogo ti, ”Nit ninapuri ambik aga o,” yinuk, wogoppatuwok nduk, yokkirogo menggaarak kwe,

¹⁴an perak, ninowe Yetut Keritut eyo karo-karo paga kambeegerak wone nogo abet mba'nuk, waganeegirak ti paga, it aakumi nggween paga mendek eeko menggaarak nogo ti, aap kanggaatak inoone yogolik nogo pogom me, it eekwi nogo an ambi eeke logowak nduk, yo'niriyak meek aret mbake ndi, an kunduk kambeegirak negen aret me, it nen an yo'nugwi nogo kunduk, koneniyak meek ee'nake, eeke minggirak me, an eeke minggirak paga wogoppatiyak lek o. Ata, ninowe Yetut Keritut eyo karo-karo paga kambeegerak wone nogo mban tiyappege agarik o.

¹⁵Inagabolo mbanak inom, mbanak lek inom, ti imbirak iya lek o. Ata, niniki ngget nda'ninake logonet ninobaabut koonogo pinanege ti perak iya o.

¹⁶It wone ti aberak logonet eerit nugwi nogo inom, ndi, Iterali mendek kwe, it abet mbakwi paga Ala apuri ogwe nogo inom, yi aakumi ndi aakumi abok aret Ala nen inabuwa mbake logonet, inomaluk mbo nappunuk iniki ugun tayenak ale'nggen logowak nduk, eeppiige logogin o.

¹⁷An Yetut wone yoranet nage paga ee'nabit nogo nogogwaarak nawin oban noba kunik yogobi wonage me, it kiniki nggagani wogwe nogo, inawone ambinom mbaniyak neebi me, mondok mbo pinaganuk mbaganuwak o.

¹⁸Ndi, noreewi o. Ninowe Yetut Keritut kinom wonage me, kinabuwa mbake logonet, kinarum aret logogin o. Wone ti abu aret yokkiragi o. Noreewi wa. Amin!