Read Wano EPETUT 1 Bible Online

EPETUT 1 - Wano bible

EPETUT 1

¹Kit abet mbareegutak Ala apuri Keritut Yetut kinom kunik logonet, kulinik-kalinik obeelom wone mugurok nogo monggotak o Epetut wonogwe nogo, Keritut Yetut eeke nagagerak wone yoranet nege logowak nduk, Ala mbareegerak paga nappiigak mendek agago mippaneegerak an Pawulut nogo nen wone ambi yokkira o.

²Ninogoba Ala ninowe Yetut Keritut imbirak iniki kunik nen wokkirogwe, kiniki ugun obeelom logobagip nduk, eeppinagagwi, eeko logogun o.

³Nit Ala awoore'nggam unggwi nogwe niinok, obeelom eeppinaniyak mbake menggerak nogo mendek abok aret, Keritut ninom kumbinaneegerak paga nen, muk unggwi nogoorak negen wonogwe niigak eeppinanege me, ninowe Yetut Keritut ogoba Ala mondok alut eeko logowok o.

⁴At Ala nen, ”Peebi Keritut nen eeppiyamenggerak nogo paga an napuri maluk eeka'lek nenggaanom paga mondok alik mbeenak obeelom mban logowak o,” yinuk, o nggween yi, awo wakkaga'lek kagak mii'ninabeegerak.

⁵Nit awo nda'naga'lek niigak, at Ala nen Yetut Keritut eeremenggerak nogo paga, nit at apuri lombok logowak nduk wo'ninaburak inikilom mbareegerak nogo ndak-ndak, ninabuwa mbake logonet, ”Eeppiyaakit o,” yinuk, koonogo pinaneegerak ti aret o.

⁶Ninabuwa mbake logonet, at aput iniki kunik nen wo'niragagerak nogo paga, amendek mondok alik negen ngginu-ngginu eerogo wo'nirage menggerak me, nit at mondok-mondok alut eeko logowok o.

⁷At amiya paga ninonggo mbambunuk, keele piinogo pinanege nagagirik, ninabuwa mba'nuk, oba ngginik kagak eeppinanit wundi wage menggerak nogo ndak-ndak, ninomaluk mondok lek eerogo pinaneegerak. Ala iniki warak lombok me, mondok liippinanege nagagirik, ”Keritut nen togop eeppiyaawak o,” yinuk, koonogo pereegerak kote kumaarak wonage nogo, ”Ineenu eeppiyaakit lak ao,” mbake nagagerak nogo aret paganogo yo'niragagerak.

¹⁰At Ala nen, ”An eeriyak mbareegirak nogo, ndiyom paga a'me lik yigin o,” yinuk, kooneegerak nogo ti, mbogut paga mendek inom, nggween paga mendek inom, yi mendek ndi mendek abok aret Keritut abu'me pege nagagirik, at eebe mondok tiyanak logowak nduk, mippereegerak ti aret o.

¹¹At eeriyak koonggetak nogo ndak-ndak aret age menggerak me, o maan togon nit nda'naga'lek niigak, ”An napuri ndogop obeelom eeppiyaakit o,” yinuk, koonogo pereegerak nogo ndak-ndak, yogondak Keritut ninom kumbinaneegerak paga, nit at apuri aret mii'ninabeegerak wonogwe o.

¹²Togop me, noreewi o Ti eeppinaniyak koonogo pereegerak nogo ti, ”Nit Keritut ndogop eeppinanigin o,” yinuk, aa'nduk abet mba'nuk, niniki at oba panggombereegurak nogo nen, eerit nogwe paga Ala endage tiyak yuwak nduk, mii'ninabeegerak.

¹³Kit kinagap ndariyak wone Ala ari menggerak obeelom wone nogo, konembunuk, abet mba'nuk kiniki Keritut oba panggombogo mbareegup, wam yelok kaawak nduk, aruk nggaganggo mengga kwak, kit Ala apuri alik leenak yelok logobagip nduk, Aberiniki wo'niroorak koonogo pereegerak nogo, kit kunduk wokkiragagerak.

¹⁴Ti wokkiragagerak nogo ti, peebi abet aret kit at apuri kineebe wokkinaburak aberak logobagip nduk, kwe yiindi aa'nduk pogo mengga kwak, Aberiniki aret yilinogo wokkiragagerak me, Ala nen kit ninom ndak-ndak aret mondok iya lombok koonogo pinaneegerak me, alut eeko logowok o.

¹⁵Togop me, kit nen ninowe Yetut abet mba'nuk, kiniki at oba panggombugwi, ndi, Ala apuri kinom kiniki kunik aganakwi, eerit nogwe nogo, an konengge nagagirik,

¹⁶tamban eeke logonet, kit eerit nogwe paga an Ala mondok, ”Wa,” yoge minggirak.

¹⁷At mondok tiyanak menggerak ninowe Yetut Keritut ogoba Ala nogo nen, kit kiniki warak eeppinagage, Ala eeke menggerak yelok kaabagip nduk, kineenu eeppinagage, eeke menggerak Aberiniki nogo, ambinom wokkiraawak nduk, kinake tamban eeke minggirak.

¹⁸Ti eeke logonet, kit kola nabagip nduk kinayonggo pinagareegerak kiniki luunik wonogwe nogo inom, nit at apuri kenok eyate mondok alik negen eerogo wo'niraagin kooneegerak nogo inom, ndi, nit abet mbakwi mendek Ala omaawi mondok iya lombok eeppinanege nogo inom, kineenu arubagip nduk, ”Inikime eya eeginake logot o,” yinuk, Ala yoge minggirak. Nit abet mbakwi niinok, at owaawi paga eeppinanege nogo ti, Keritut kambunuk, nogo menggam nen eenik agago mippege nagagirik, kugi nggween abu'na mendek inom, eyoonggame mendek inom, mbogut abu'na mendek inom, yi kugi ndi kugi inayuk wuko menggaarak o yogondak wonogwe inom, peebi logorak inom, it abok aret tebenak iigak, at Keritut alik mban Ala eenggi abe'nggan tiyanak logowak nduk, mbogut paga mippereegerak nogo ndak-ndak, nit yogondak at omaawi paga togop aret eeppinanege agaarik o.

²²Yi kugi ndi kugi inom, yi aakumi ndi aakumi inom, yi mendek ndi mendek abok aret, at abu'me piinok, nit Ala apuri yi awi ndi awi monggoorak lambuk togon ninowe endagembogut ninanobak kwak tiyanak logowak nduk, mippereegerak.

²³Ndi, nit Ala apuri yi awi ndi awi monggoorak lambuk togon nogo ti, at eebe ando mbanak aret me, eebe ambit aruwak nduk, anobak mbanak nogo paga kumbinaneegerak me, yogondak at eebe yi awi ndi awi abok aret mondok endak warak menggerak.