Read Wano EPETUT 4 Bible Online

EPETUT 4 - Wano bible

EPETUT 4

¹Ti kenok noreewi o. Kit eeko logobagip nduk yonggo pinagareegerak Ala nogo nen kit ndak-ndak aret eerit nogwe kiyaawak nduk, an ninowe oone wonok yoranet nege paga keele maa'nabeegwaarak nogo nen, noone yanggorogon lengganogo yokkiragi o.

²Eerit nogo logonet, kiniki tebe yinuk yonggorogon eeppiigwi, kiniki aanaganggenggwi lek nabuwa-kabuwa mbako logonet, yeenggwa-yeenggwa eekwi, Aberiniki nen kiniki ambit lambumbinagareegerak nogo,

³kinom ogookkologwe kiyo, liippunuk wonogwe, eeko logonip o.

⁴Kiniki luunik wonogwe nogo ambit aret kolaabagip nduk, yonggo pinagareegerak nogo ndak-ndak, kit kineebe ambit aret. Ndi, Aberiniki eebe togon ambit aret mbako logonip o.

⁵Nit ninowe endagembogut nogo eebe ambit aret, ndi, niniki abet mbakwi wone nogo togon ambiret. Ndi, yiime wuppinanugwi wone nogo kunduk ambit mban aret o.

⁶Nit aakumi abok ninogoba ti, Ala ambit aret logonet, oome-endekem at eebe mondok endak warak menggerak. Yi mendek ndi mendek abok aret at abu'me menggerak me, yi eekwi ndi eekwi abok aret at nen mban koonogo yo'nirage kagak eeko monggoorak.

⁷Ala wone liiru mbanak paga nen ari logonet, ”At agi tiyarogon lagi nage logonet, it aakumi keele maarogo piirogo wonogwe nogo apit aret ndineren lagi nage nagagirik, at amendek onggo lek we aret tumburiragagerak o,” yinuk, yereegerak nogo ndak-ndak, Ala nen Keritut eeke logowak nduk, unde eeppereegerak nogo kokwak, nit togon, at eyabu eeko logowok nduk, ninabuwa mbake logonet, ninalitik-ninalitak togop aret unde eeppinaneegerak.

⁹Ndi, ”At lagi nagagerak,” yereegerak nogo ti, ngge nduk yereegerak mbakop? Lek o. At nggween abu'na wambi nage nagagirik, lagi wagagerak nogo kenok, yereegerak nogo lek a?

¹⁰Ndi, at wambi nage nagagirik, lagi wagagerak nogo ti, yi awi ndi awi abok aret at eebe endak warak logowak nduk, mbogut irim paga lombok lagi nagagerak nogo aret.

¹¹Ndi, ninalitik-ninalitak unde eeppinaneegerak nogo ti, it ando nappiigak logowak nduk mippiige, ando Ala nen yorage kagak yorogo logowak nduk mippiige, ando obeelom wone yi awi ndi awi ambime yoragak nogo logowak nduk mippiige, ando o ambit me Ala apuri liirogon unde logowak nduk, nggembala mippiige, ando Ala wone mamunirogo logowak nduk mippiige, eereegerak.

¹²Ti eereegerak nogo ti, nit Ala eyabu liirogon eerit nogo logonet, nit nineebe paga Keritut eebe mondok nggwok wigak yuwak nduk, nit abet mbareegurak Ala apuri nogo, abok aret mondok li'lak eerogo pinaneegerak.

¹³Ti eeppinaneegerak nogo ti, nit abok aret Ala aput eeke menggerak abet aret nineenu ogo logomonggoorik, abet mbakwi paga niniki ambit a'nuk, Keritut iniki mondok koleewak obeelom wonage nogo kokwak, nit togop aret niniki kole eeppinanit wundi wage logowak nduk, unde eeppinaneegerak.

¹⁴Togop me, noreewi o. Yi kilaarak-mogonik eeke logonet, yi mendek ndi mendek piyanogo nippege, o wiya nen yi mendek ndi mendek wonok nage, eeke menggerak nogo kokwak, it aakumi pilit wone yogo menggaarak nogo nen, aakumi inambo'me laganuwok nduk, iniki koombunuk nomoniren nogo menggaarak inoone agan nugwi nogo, wologwe negen logonet konenggo mengga kwak, nit niniki kole ogwe niinok, konenggo logogun lek o.

¹⁵Ata, nit aakumi inabuwa mba'nuk, Ala ari menggerak wone nogo mban yorogo logonet, ninanobak kwak ninowe Keritut iniki abu koleewak minggi kwak, nit togop aret niniki kole ee'ninabuwak nduk, eerit nogo logowok o.

¹⁶Nineenggi-niniyok yereegerak-pereegerak abok aret eeriyak ake puunik alitak lombok wonage kwe, nineebe ambit ninomanggen paga yinik-kunik eerak logonet, eerit nage kenok, nineebe mondok op aret menggerak nogo kokwak, nit Ala apuri abet mbareegurak nogo, ninanobak kwak Keritut ninom togop aret kunik me, nabuwa-kabuwa eeko logonet, ninalitak eeriyak unde eeppinaneegerak nogo ndak-ndak eerit nugwi niinok, Keritut eebe mondok obeelom aret logonet, nit nineebe paga nggwok wiganit nage logogin.

¹⁷Togop me noreewi o ”It aakumi Ala wone konenggulik endekem mendek nen eerit nogo mengga kwak, kit togop eerugup o,” yinuk, nogoba nen yo'nege kenok yokkiragi o. It eekwi nogo ti, it iniki o apit pogom logonet, aanom warogo koombunuk, eerit nogo menggaarak o. Iniki omaawi logonet, ”Ala wone woorak nineebi o,” yinuk, yogwe paga Ala inom ogoorak wonogwe me, Ala nen ineenik eeginabigin mondok lek o.

¹⁹It maluk eeriyak inagabiti mbaka'lek kumi paga mban iniki luunik logonet, ”Ugun-ugun eeruwok o,” mba'nuk, iniki nengge kenok ale'nggen paga eerit nogo menggaarak kwe,

²⁰Keritut eeke nagagerak wone nogo, mamunggirogo logonet, kit eekwi ti mendek ambi inom mamunggiroolik o.

²¹At eeke nagagerak nogo mamunggirogwe niigak, Ala ari menggerak wone at Yetut ndak-ndak ari nagagerak nogo, kit liirogon konenggo logonet,

²²”Niniki nengge kenok mugurok nogo nogoorak nogo ti, obeelom ee'ninaburak nduk, mugurok nogo logolik o. Ata, maluk ee'ninaburak kagak mugurok nogo nogoorak kogo,” yinuk, mamunggologogutak me, kinobaabut maan mendek nogo, nggonenogo mbo punuk,

²³kiniki ngget ogobakkigikkinabuwak nduk, Ala oone mban mugurok nogo logonip o.

²⁴Kit nen kinobaabut koonogo obeelom eekkologo logobagip nduk, yokkirage lek o. Ata, Ala maluk eekeelik obaabut abu obeelom menggerak nogo kokwak, kit nogo ndak-ndak kinobaabut mondok ngget mendek eerogo pinagawak nduk, yokkiragi o.

²⁵Togop me noreewi o. Keritut ninom kunik eenggi-iyok kokwak nit aret me, kit-kit aret pilit pugunggo monggotak nogo mbo punuk, kit abok aret wone abet kenok mban yogo logonip o.

²⁶Kiniki aagi eekkinake logonet, kinanini nen maluk eeriyak ti mage o. Ndi, kinanini wungge kagak oonegen kilu yi noorak ti mage mban.

²⁷Ibilit nen, ”Nanonggwan aga o,” yinuk, kiniki nggagangginake kero, maluk mbuuluk kinikime tebembunuk logogup o.

²⁸Kit yogoot waganggo monggotak nogo, ambinom yogoot waagup o. Ata, kineenggi paga nen mban eerogo nunggwi, it aakumi inamendek lek iinok yeenggwaarogwe, eeko logobagip nduk, yabu ambi eeriyak miippunuk, kineenggi omaawi paga eekko'net nogo logonip o.

²⁹Wone maluk mendek kinambe paga nen wumbi woroorak ti mage o. Ata, it konenggwi nogo nen, ”Ninabuwa nen yo'nirogwe iigo o,” yuwak nduk, aaninggin ambi inoba age kenok, obeelom eeppiyoorak kenok mban yogo logonip o.

³⁰Ala nen at apuri wogonabi wage logonet, nit ninom wo'ninabi woroorak nogo, nineenu logowak nduk, wam yelok kaawak nduk, aruk nggaganggo mengga kwak, Aberiniki wo'niragagerak me, Ala nen nappi wagagerak Aberiniki nogo, iniki maluk eerogo puurak mage o.

³¹Kinoreewi kinom ogoorak logonet, neebi-keebi yogwe, nanini-kanini yogwe, wone wakwi, miyuk-meya eerogo piigwi, kinoreewi maluk eeppiigo monggotak nogo mendek abok aret mbo pogo logonip o.

³²Mbo punuk, kinom nabuwa-kabuwa mba'nuk, kiniki yanggonak paga obeelom eeppiigo logonet, Keritut eereegerak nogo paga Ala nen kit kinomaluk lek eerogo pereegerak nogo ndak-ndak, kit-kit aret maluk eekkologomonggotak nogo, mari eerogo mbo pogo logonip o.