Read Wano EPETUT 5 Bible Online

EPETUT 5 - Wano bible

EPETUT 5

¹Noreewi o. Kit Ala apuri aret me, kinogoba kinom kunik logonet, at eeke minggi kwak, kit ndak-ndak eerit nogo logonip o.

²Aakumi inake Ala aanggo warogo kani kunggwi iinok, Ala nen obari obeelom kage minggi kwak, at Keritut ninabuwa mbake nagagirik, ”Inake kambikit o,” mba'nuk, ninake kambeegerak nogo ndak-ndak, nabuwa-kabuwa mbako logonet, at ambi obeelom eeppegak eeko logonip o.

³Kit abet mbareegutak Ala apuri aret kagak kumi paga mban kiniki luunik logonet, ugun-ugun wurinabit nogwe, uugwe-ugwe mbakwi, eerit nogwe kiinok, it aakumi ando nen, ”Ala apuri aret kwe, maluk eekwi iyaanip o,” yinuk, kinombakwi kiyo, liippunuk, eeko logonip o.

⁴Kumi inabok mban agan nugwi, elege negen ugun i'ndok kambuurak mban agan nugwi, iniki kumi paga mban luunik logonet, inoonewak agan nugwi, eekwi ti mendek abok aret yuurak lek maluk mendek kagak agan nugwi me, kit Ala apuri kenok togop yuurak mondok mage o. Ata, Ala endage mban tiyappogo logonip.

⁵It kumi ugun-ugun wurinabit nogo menggaarak inom, iniki kumi paga mban luunik logonet, inabok agan nugu menggaarak inom, it uugwe-ugwe mbako logonet, Ala obaane'me yi mendek ndi mendek tiyappogo menggaarak nogo inom, it aap ti eeko menggaarak abok aret Ala Keritut inawoore'nggan unggwi nagun mondok lek mbako logonip o.

⁶It Ala wone tagambunuk, maluk ti mendek eerit nogwe iinok, Ala anini inoba piige menggerak me, it ugun kobak menggaarak nogo nen inoone amburu ndik-ndik agan wogo logonet, kinambokan laganggwi iyo, liippogo logonip o.

⁷It aap togop yogo menggaarak nogo ti, kinom kunggoloorak ti mage o.

⁸Kit aa'nduk o apit paga nogo nogogutak kwe, yogondak kinowe endagembogut nen muk eya eerogo pinagareegerak me, Ala apuri eya paga logonet, eeko mengga kwak, kit togop aret eerit nogo logonip o.

⁹Eyoonggen yi'nage minggi kwak, it eya paga logonet eerit nogo menggaarak nogo ti, iniki yanggonak paga aakumi obeelom eeppiinet nugwi, maluk eeka'lek Ala ari menggerak nogo ndak-ndak eerit nogwe, ndi, iniki mbere lek ambit logonet, inoone abet mban agan nogwe, eeko menggaarak me,

¹⁰kit nen, ”An eeke yi, Ala inikilom mbake menggerak ndak-ndak aret eeke ilik?” yinuk, mbako logonet, Ala apuri eya paga logonet, eeko mengga kwak, kit togop aret eerit nogo logonip o.

¹¹It aap o apit paga logonet, eebe lek kagak eerit nogo menggaarak nogo, kinom lambumbunuk eerit nagup o. Ata, it kote eeko menggaarak inabok mbininiyak kineebi mbakwi kwe kagak, nggwok paga aret inenggali wappiigo logonip.

¹³Aap ambi nen ari logonet, ”Wologwe wae. Kit nogo yugwi nogo kineenik a'nip o. Kineenik a'nuk, it aakumi mondok kambak wonogwe nogo, inenggela'me nen wundi wogwe kiinok, Keritut nen eya eekkinabigin o,” yinuk, yereegerak nogo ti, ndi wuninggwi iinok, yi mendek ndi mendek o apit paga wonage nogo kin kogo mengga kwak, it aap kote eeko menggaarak nogo, nggwok paga paganogo inenggali wappiigwi iinok, ”Aap yi inobaabut togop aret menggaarak iigo o,” yinuk, yuwak nduk yereegerak kogo o.

¹⁵Togop me, kit eerit nogo monggotak nogo, mondok liippunuk eerit nogo logonip o. O yi eyom paga aakumi nen maluk mondok alik negen eeriyak koonggwi me, kiniki lek we ugun eerit noorak ti mage o. Ata, kiniki mondok warak logonet, ”Yogondak obeelom eeriyak ambi yi nanonggwan agaarak me, eerikit o,” mba'nuk, eerit nogo logonip o.

¹⁷Kumili negen kiniki lek ugun eerit nogo logogup o. Ata, ninowe endagembogut nen eeriyak kooneegerak nogo mban liippunuk, eerit nogo logonip o.

¹⁸Ndi, eyoonggen anggur amburu nonggo logomonggotik, kumili kunit namonggotak paga maluk eekkinaburak me, mbo punuk, Aberiniki mban kiniki me yagabit aago logowak nduk, eeko logonip o.

¹⁹Ndi, kit-kit aret kiniki mondok ale'nggen paga ninogoba endage alut eeko logonet, Ndawut ndawi pereegerak nogo inom, ki wone ndawi inom, ugun wee'lek ndawi inom, abok aret warit nogo logonip o.

²⁰Warit nogo logonet, yi mendek ndi mendek apit eeppinanege menggerak nogo paga ninowe Yetut Keritut endage kunogo, ”Ninogoba Ala wa,” yinuk, yogo logonip o.

²¹Ninowe Keritut ayuk wuko logonet, kiniki tebe yinuk nabu'me-kabu'me logonip o.

²²Kit kumi yi wae. Kit kinogonggelomini warak kenok, ninowe endage tiyak yuwak nduk, kinogonggelomini inabu'me tebe yinuk logonip o.

²³At Keritut alik en nit Ala apuri yi awi ndi awi monggoorak nogo, kinagap ndarogo at eebe paga ambit aruwak nduk, kunogo pinaneegerak me, ninanobak kwak Keritut wonage nogo pogom, kit kumi kinanobak kwak ti, kinogonggelomini aret o.

²⁴Ndi, Ala apuri yi awi ndi awi monggoorak nogo ti, Keritut abu'me logonet, oone konenggo monggoorak nogo pogom, kit kumi togop aret kinogonggelomini inabu'me mondok tebe yinuk logonet, it inoone mban konenggo logonip o.

²⁵Ndi, kit aap yi wae. Kit kinakuwi warak kenok, Keritut nen nit Ala apuri yi awi ndi awi monggoorak nogo, ninabuwa mbake logonet, ”Inake kambikit o,” yinuk, ninake kambeegerak nogo kwak, kit kinakuwi togop aret inabuwa inombako logonet, obeelom eeppiigo logonip o.

²⁶Nit ap apuri yi awi ndi awi monggoorak ninake kambeegerak nogo ti, ”An napuri inoba muli lenggenak yinik-pinik aago ineebe yinuk-punuk eerak iigak koloorak neebi o. Ata, ineebe kikak naka'lek mondok alik mbeenak abe kigirikwe lombok kolaakit o,” yinuk, ngguu'mo wappiigo mengga kwak, at oone waganggwi paga ninomaluk lek eerogo pinanege logominggirik, Ala ake leenak logowak nduk, ninabuwa mbake logonet, ninake kambeegerak o.

²⁸Kit aap kineebe kiniki kunik eekkologo monggotak nogo kokwak, kinakuwi togop aret kiniki kunik aganako logonip o. Aap ambi akwe iniki kunik eeke kenok ti, at eebe aret iniki kunik eekkolage menggerak o.

²⁹Ndi, Keritut eenggi-iyok kwak nit aret me, at Keritut nen at apuri yi awi ndi awi monggoorak nogo, iniki kundugu ee'ninake logonet, liirogon ndegenninake minggi kwak, nit aap nen nineebe ti, nineebi mbakulik o. Ata, niniki kunik eekkologo logonet, liirogon ndegenggologo monggoorak nogo pogom, kit kineebe ando nogo ti, kinakuwi aret me, kiniki kunik aganako logonet, liirogon aret ndegeninako logonip o.

³¹”Togop me, aap ambi nen agalo-ogoba mbo piinok, akwe imbirak lambunik logonet, ineebe mbere kwe, ambit aret arugun o,” yinuk, Ala nen yereegerak liiru mbanak wonage nogo aret yokkiragi o.

³²Ala nen wone yereegerak nogo ti, wone alom abu kumaarak negen aret yereegerak mbake logonet, Keritut apuri yi awi ndi awi monggoorak nogo ninom nonggop togon ambit kunik logorak wakkagak yokkirage kwe, ti mban yokkirage lek o.

³³Ata, kit aap kineebe kiniki kunik eekkologo monggotak kokwak, kinalitak lombok kinakuwi inabuwa mbakwi, ndi, kit kumi nogo nen kinogonggelomini inayuk wuko logonet, inabu'me tebe yinuk, inoone konenggwi, eeko logobagip nduk, inom aret yokkiragi o.