Read Wano EPETUT 6 Bible Online

EPETUT 6 - Wano bible

EPETUT 6

¹Wologwe-komologwe yi wae. Kinagalomini-kinogobamini inoone yokkirogwe iinok, konembunuk eeko logorak nogo ti, Ala nen aret kooneegerak me, liirogon eeko logonip o.

²Ala nen wone, ”Yogop ee'nu, ndogop ee'nu,” ari logonet, ”Kinagalomini-kinogobamini inayuk wuko logonet, inoone liirogon konenggo logonip o,” ari nagagirik, ti'nuk, liirogon konembunuk eekwi kiinok, ambi inom eeppinagarak yereegerak nogo ti, ”Nggween paga yime kineebe obeelom aret logomonggotik, mondok li a'nuk, kambumunggup o,” yinuk, yereegerak me, kinagalomini kinogobamini inoone liirogon konembunuk, eeko logonip o.

⁴Kit kinapuri kinaagalogwe wonogwe kenok, inanini aruwak nduk, eeppiyaagup o. Ata, Ala wone mugurok nogo logowak nduk, inaruk wakwi, Ala wone yorogwe, eeko logonet, tawe eeginako logonip o.

⁵Kit aakumi inayeloman monggotak kenok, ”Nogoba yi Keritut kwak me,” yinuk, kinagabiti mbakak inayuk wuko logonet, kiniki obeelom yanggonak paga inoone konembunuk, inake eeko logonip o.

⁶Eerit nogo logonet, inikilom kinombaruwak nduk, inigen iigak mban eeriyak ti lek o. Ata, ”An Keritut ayeloman aret me,” yinuk, Ala iniki mbake menggerak nogo ndak-ndak, ”Eerikit o,” yinuk, kiniki obeelom yanggonak paga eeppiinet nogo logonip.

⁷Nit aakumi inayeloman wonogwe inom, aakumi we ugun wonogwe inom, abok aret obeelom eerit nogwe niinok, ninogoba nen onggo ndak-ndak aret wo'niraagin nineenu me, ”Yi aakumi inake eeke lek o. Ata, nowe endagembogut ake aret eeke o,” yinuk, kiniki ale'nggen paga eerit nogo logonip o.

⁹Ndi, kit nogobamini yi wae. Kit kinayeloman wonogwe kenok, ”Nit ninogoba ambit mbogut paga wonage nogo nen ninayeloman inom, inogobamini nit inom, eekwi onggo ndak-ndak wo'niraagin,” mbako logonet, kinoone omaawi paga yoraagup o. Ata, it kinayeloman nen iniki ale'nggen paga eeppinagago mengga kwak, kit ndak-ndak kiniki yanggonak paga obeelom eeppiigo logonip o.

¹⁰Wone abu aret yokkiragarak me, age yobok ambi yi yokkira o. Kinowe endagembogut omaawi ambik nogo paga kiniyok panggombunuk, kinogogumbuk logonip o.

¹¹Ibilit nen iniki koombunuk, kinambokan lagani wage kero, mugugo nappuurak nduk, Ala nen kineegin-kinomaale li'luk eerogo pinagareegerak nogo, waganggo logonip o.

¹²Wim ninom nambuko logonet, perenggologwe nogo ti, it aap nggween paga mendek ninom nambukwi lek o. Ata, it kugi inayuk warak o oolo yime nugu logonet, aakumi nggween paga yime iniki o apit aago pogom wonogwe nogo, maluk eeruwak nduk, iniki nggaganggo menggaarak Tile inom, at awuri yi kugi ndi kugi inom, abok aret ninom wim nambuko logonet, perenggologwe me, maluk eekkinabuwak nduk wogwe iinok, mondok mugugo nappiigo logonet,

¹³kit mban kineegin tiyanak logobagip nduk, inagabe'le bam nggerenggologo mengga kwak, Ala ari menggerak wone kinikime nggerorogon waganggwi, tin yikkologo mengga kwak, Ala obaabut obeelom menggerak nogo yikkologwe, sepatu omaawi mendek yikko'nok nogo mengga kwak, Ala ninom lambumbinaniyak obeelom wone nogo pipuk ee'nuk nogwe, eeko logomonggotik, at maluk lombok eeke menggerak nogo nen omaale kani kunik negen namburi wage nogo, mbeenogo nappogo logobagip nduk, nggeemu langgunggologo mengga kwak, kiniki abet mba'nuk Ala oba panggombugwi, petagi langgunggologo mengga kwak, kinagap ndariyak wone aberogo kologwe, tege wooluwak kwak ti, Aberiniki nen Ala wone wo'niragagerak nogo waganggwi, eeko logomonggotik, kineegin-kinomaale Ala nen wurogo pinagareegerak nogo, li'luk eeppunuk, kinogogumbuk nu'lek logonip o.

¹⁸Kinogogumbuk mondok kinom perenggologo logonet, Ala nen yeenggwagiraawak nduk, Aberiniki nen yokkirage kagak, puk aga'lek Ala nggino yogwi, nogo yigin eekkinaka'lek kineenik logonet, it abet mbareegwaarak Ala apuri abok aret inake tamban eekwi, eeko logonet,

¹⁹an kunduk obeelom wone kote kumaarak wonagageraak nogo, yoranet nege logowak nduk, Ala nen aret leenogo mippaneegerak kagak keele maarogo mambaneegwaarak yime logonet, nagabiti nen noone puk logorak ti lek o. Ata, wone nogo yoraakit nduk, eeke neegak, Ala nen, ”Togop yoret o,” yinuk, yo'nege kenok, nagabiti mbaka'lek noone teeluk paganogo yorage logokit nduk, it Ala apuri abok aret inake tamban eeko logonet, an ninom nake tamban eeko logonip o.

²¹At ninawot niniki kunik ninowe eyabu liirogon eeke menggerak Tikikut nogo nen, an neebe nonggop logonet, eeke minggirak wone nogo, abok aret kineenu arubagip nduk, yokkira woraagin o.

²²Kineenu aruwak nduk, kinowagam nappi woraminggirak wage logominggirik, nit abok nineebe nonggop wonogwe nogo abok yokkirage, ndi, kiniki eyak wappinagage, eeri woraagin o.

²³Kit noreewi Ala apuri abok aret abet mba'nuk, kiniki ugun obeelom ambit lambunik logonet, nabuwa-kabuwa mbako logobagip nduk, ninogoba Ala ninowe Yetut Keritut imbirak nen eeppinagagwi,

²⁴ndi, kit kinowe Yetut Keritut kiniki kunik nogo, lek aga'lek mondok kundugu wonogwe kiinok, kinabuwa mbake logonet, kinarum wonage, eeke logowak nduk, kinake tamban eeke minggirak o. An Pawulut nen abu aret yokkiragi o. Noreewi wa!