Read Wano PILIPI 1 Bible Online

PILIPI 1 - Wano bible

PILIPI 1

¹Kit Keritut Yetut abet mbakwi Ala apuri o Pilipi wonogwe nogo inom, Ala apuri inarum monggotak nggembala nogo inom, aap yeenggwaaragak mayelit nogo inom, kit abok aret an Pawulut Timotiyut nimbirak Keritut Yetut ayeloman wonogwe nogo nen, wone ambi yokkiraawi o.

²Ninogoba Ala ninowe Yetut Keritut imbirak iniki kunik nen wokkirogwe, kiniki ugun obeelom logobagip nduk, eeppinagagwi, eeko logogun o.

³An niniki kinoba abe'nage kenok, nogoba Ala wa yoge minggirak.

⁴Tamban eeke logonet, o aa'nduk nen nok-nok yogondak kuli aret obeelom wone kit ninom ndak-ndak eerit nugwi nogo, abe'nage kenok, niniki ale'nggen mbake logonet, kinake tamban eeke minggirak o.

⁶”At Ala nen obeelom eekkinaburak nduk, aa'nduk eereegerak kuli nogo nen, kinikime eekkinake tit kagak, o age yobok Yetut woraagin o,” yinuk, an abet aret mbake logonet, yokkiragi o.

⁷An yogondak keele maarak wonage neegak inom, aa'nduk nawone mbanuwak nduk, mippanugo mbareegwa, obeelom wone mondok nu'lek logowak nduk, yorage neegak inom, kit mbo panulik me, Ala nen nabuwa mbake logonet, unde eeppaneegerak nogo, ”Kat ninom ndak-ndak eeko logowok o,” yinuk, eeko nogogutak nogo paga, kit an niniki mondok kunik wonage me, kinoba abe'nage kenok, niniki ale'nggen logonet, kit kinake Ala wa yoriyak ti, op aret mbake agarik o.

⁸At Keritut Yetut nen, ”Naput ao,” yinuk, kinabuwa mbake logonet, iniki kunik eekkinake menggerak nogo kokwak, an togon kit ninom niniki mondok kunik logorak mbake minggirak nogo ti Ala eenu aret o.

⁹Kit yi wone ndi wone alom liirogon kineenu ogwe, ndi, kiniki warak logonet, yi mendek ndi mendek eraambe yelok kogwe, eeko logonet, it kinom kiniki kunik aganakwi nogo, ambinom nggwok togon eeko logobagip nduk, kinake tamban eeke minggirak o.

¹⁰Kit eeko logobagip nduk, kinake tamban eeke minggirak nogo, kit ndak-ndak eekwi kiinok, yi mendek ndi mendek abut mbambunuk, abe kenok mban eeko logomonggotak me, Keritut woroorak eyom ti paga Ala endage alut eerak tiyanak logowak nduk, eyo anggen abe yi'nage minggi kwak, Yetut Keritut eeppinagage kagak obeelom mban eeko logomonggotak nogo paga enegen kiige logominggirik, ”Kit maluk eerulik obeelom mban eeko nogotak o,” yinuk, oone kinoba pinagagin lek o.

¹²Ai noreewi o. An ee'nabeegwaarak nogo paga obeelom wone mondok nggwok wiganeegerak me, kineenu arubagip nduk, yokkiragi o.

¹³An keele maarak wonage yi paga, it aap inendagembogut inawuri apit nogo inom, it aakumi wee'lek ugun mendek inom, abok aret, ”Pawulut nen Keritut wone yoranet nage nagagerak nogo paga, keele maarogo mambiigo menggam time wonage o,” yinuk, ineenu ogogwaarak.

¹⁴Ndi, ninoreewi ando apit nogo ti, Ala wone yoranet nugu logorak inagabiti mbako nogogwaarak kwe, an keele maa'nabeegwaarak nogo paga iniki ninowe oba panggombunuk logonet, yogondak Ala wone yoroorak inagabiti lek mondok inogogumbuk logonet, yoranet nugu agaarik o.

¹⁵It ando nen, ”Nit togon ninoone konenggo logowak o,” yinuk, abet aret ineebi nombako logonet, ”Tebembuwok,” mba'nuk, Keritut wone yorogo menggaarak kwe, it ando nen perak, iniki obeelom paga yorogo agaarik o.

¹⁶Wone obeelom wone Keritut nen yo'niragagerak nogo, amburu mbanogo yorage logowak nduk, Ala nen aret mippaneegerak ineenu me, ninom niniki kunik logonet aret yorogo agaarik o.

¹⁷Ndi, it ando nogo nen perak, iniki obeelom paga Keritut wone yorogwe lek o. Ata, ”An ari mban konenuwak o,” yinuk, an keele maarak neegak, aaninggin ambinom noba paniyak mba'nuk iniki laakot mbako logonet, yorogo menggaarak.

¹⁸Togop agan nogwe iinok ti op mban aret o. It iniki laakot nombako logonet yorogwe a, iniki obeelom paga yorogwe a, nogo ti, Keritut wone mban aret yorogwe me, ”Op mban aret o,” yinuk, niniki ale'nggen mban mbake minggirak me, yogondak togon niniki ale'nggen aret agarik o.

¹⁹Kit nen nake tamban eekwi, ndi, Yetut Keritut nen Aberiniki nappi wagagerak nogo nen niniki eyak wappanege, eekwi ti paga keele piinogo wumbanugun neenu me, niniki ale'nggen mban mbake agarik o.

²⁰An eeke logowak nduk unde eeppaneegerak nogo ando eeka'lek neenok, nenggali wappaniyak neebi me, ”Ao,” mba'nuk, an neebe paga Keritut tiyappuurak mbake minggirak nogo, yogondak ndak-ndak mbake logonet, kambuurak kenok, neenik logorak kenok, ”Op mban aret o,” yinuk, nagabiti mbaka'lek logonet, yoranet nege logorak uugwe mbake agarik o.

²¹Neenik logorak kenok ti, Keritut ake aret o. Ndi, kambuurak kenok ti, an ambi kola noorak me, neenik logorak kenok, kambuurak kenok ti, op mban aret o.

²²Kambuurak kenok ti, an ambi kola noorak aret kwe, neenik logorak kenok, Ala wone yoranet nage paga ambi anggen yippiyoorak kagak eerukwak me, an nggaruk togon, ”Kambi a, neenik logi a?” yinuk, miikkoloorak ti meek o.

²³An Keritut nimbirak logorak ti, op lombok mbake logonet, nggween paga yime mbo punuk, pekka noorak, ”Ao,” mbake kwe, kit ninom logonet eeppinagarak ambi wonage mban me, niniki abu mbere ee'nake o, noreewi.

²⁵Kit eeppinagarak ambi wonage mbakirak me, kit abet mbareegutak nogo paga kiniki kole age logonet, kiniki ale'nggen mbarubagip nduk, ninom aret logorak mbake agarik o.

²⁶An keele piinogo teppanumenggaarak paga kiya wage neenok, kiniki ale'nggen nggwok mbako logonet, Keritut tiyappubagip nduk, neenik logonet, kiya woraagin mbake agarik o.

²⁷An yime wonage neegak a, time kiya wage neenok a, kit obeelom wone abet mba'nuk waganeegutak nogo, mbo pega'lek kiniki ambit a'nuk, nu'lek logonet, eerit nogwe konenikit nduk, obeelom wone Keritut nen yo'niragagerak nogo, kit liirogon aret eerit nogo logonip o.

²⁸It kinom ogoorak wonogwe nogo kinagabiti mbarugup o. Kinagabiti mbaka'lek nugwi ti paga it kinom ogoorak wonogwe nogo nen, ”Iya! It abet aret yogwe me, nit perak, lek eerogo pinaniyak kagi,” yinuk, yugun o. Ndi, kit perak, Ala nen abet aret kinagap ndakkinabeegerak kineenu arumunggup o.

²⁹At Ala nen kinabuwa mbake logonet, eeriyak kooneegerak nogo ti, kit kiniki Keritut oba panggombunuk abet mbarubagip nduk mban koonulik o. Ata, at oone waganggwi paga aaninggin-paaninggin inom kaabagip nduk kooneegerak me, kiniki ale'nggen mbako logonet waganggo logonip o.

³⁰Piyak-payak eerogo panugwi iigak, Ala wone lek age kero nduk, nggwiirit-nggwaarit yorage neego nogogutak nogo inom, ndi, yogondak eeppaneegwaarak kagak nogogumbuk logonet, eerit nage konenggwi nogo inom, kit ninom ndak-ndak aret eeko logowok o.