Read Wano PILIPI 2 Bible Online

PILIPI 2 - Wano bible

PILIPI 2

¹Keritut kinom kunik me, kiniki eyak wappinagage, at kinabuwa mbake logonet kiniki yanggongginake, Aberiniki kinom kunik wonogwe, kit mban-mban kinom kiniki kunik logonet obeelom eeppiinet nugwi, eeko logorak eekkinake kogotak kenok,

²an ambinom niniki ale'nggen nggwok lombok kaakit nduk, kit togop aret kiniki ambit eeppunuk logonet, Keritut kinabuwa mbake nogo kokwak, kinoreewi kinom nabuwa-kabuwa mbakwi, kiniki lambunik logonet eeriyak ambit koombunuk eekwi, eeko logonip o.

³Kit yi mendek ndi mendek eeko logonet, ambi koloorak nduk eeppiigwi, ndi, ”Tiyappinanuwak,” mba'nuk eekwi, ti eerugup o. Ata, kiniki tebenak logonet, ”An perak meek, ndi, nore ti iya o,” mbako logonet, eeppiigo logonip o.

⁴Kit kinobaalombok mban koonggologo logogup o. Ata, kinoreewi inobaalombok inom koonggo logonip o.

⁵At Keritut Yetut iniki koombunuk eereegerak nogo kokwak, kit ndak-ndak aret eeko logonip o.

⁶At Keritut nogo ti, Ala iniki menggerak kokwak, Keritut iniki ndak-ndak aret wonagagerak kwe, ”Ala nimbirak ndak-ndak aret me, an tiyanak logokit,” ti mbarulik.

⁷Ata, at iniki nen aret tebeppatinuk, ”Aakumi inayeloman kokwak eekkola o,” yinuk, aakumi nit pogom aret nda'nagagerak.

⁸Nda'nage nagagirik, aakumi nit pogom aret nege logonet, eyo karo-karo paga kambuurak ti meek aret kwe, iniki tebeppatinuk, ”Ti paga kambuurak op aret o,” yinuk, kambeegerak.

⁹Togop eeke mbareegi, at Ala nen mondok agi lombok tiyappereegerak me, yi aakumi ndi aakumi abok inendage tebenak iigak, at mban endage mondok-mondok tiyanak aret agaarik o.

¹⁰It mbogut paga mendek inom, nggween paga mendek inom, nggween abu'na mendek inom, it abok aret Yetut endage kumbunuk, abu'me tebe yinuk, ayuk wukwi,

¹¹ndi, aakumi inanebunu lombok abok aret ninogoba Ala endage tiyak yuwak nduk, ”Yetut Keritut ti, ninowe endagembogut aret o,” yinuk, nggwok paga paganggwi, eeruwak nduk, tiyappereegerak o.

¹²Noreewi o. Kit an niniki kunik me, wone ambi yokkira o. Aa'nduk kit ninom time logonet, an noone yugu ndak-ndak eeko nogogutak nogo kokwak, yogondak neebe yime neegak, kinagap ndakkolaabagip nduk, kinagabiti nen kinaganak wako logonet, ambinom nggwiirit-nggwaarit eeko logonip o.

¹³At Ala nen eeriyak inikilom mbake menggerak nogo, kit nen ”Eerikit,” mbakwi inom, ti'nuk, eebe aret eekwi inom, nogo ti Ala nen mban aret koonggirage menggerak.

¹⁴O yime it aakumi inobaabut nggolo iniki mondok maluk mban koonggo menggaarak inenggela'me laaluguragan pindan-pindan eeke minggi kwak, kit togop logonet, inoone kinoba pinaga'lek Ala apuri kiniki kikak naka'lek abu obeelom mban eerit nugwi kiyaawak nduk, kit yi mendek ndi mendek eeko logonet, kinoone laakit-laakot yogwe, wone wakwi, eerugup o.

¹⁶At Keritut woroorak eyom paga, ”An mbe agan nage, anggon-panggon ee'nake kagak eerit nage, eeke nagagirak nogo ti, we aanom warogo eerulik ambi kolaakit nduk eereegirak kagi,” mba'nuk, niniki ale'nggen kaakit nduk, wone nineenik ee'ninake menggerak wone nogo, kit nggirik-nggerok agago porogo logonip o.

¹⁷Kit abet mba'nuk kineebe apit Ala wogo'nuk, at ake eerit nogwe nogo ti, ndomba warogo Ala ake wogogo mengga kwak aret me ambinom eerit nogo logobagip nduk, kinake eeke neegak, amburu ndomba warak obaga kilippogo mengga kwak, an yogondak neebe nookwi kenok ti, ”Kambuurak op aret o,” mba'nuk, niniki ale'nggen mbake me, kit togon kiniki ale'nggen mbako logonip o.

¹⁸An niniki ale'nggen mbake minggi kwak, kit ndak-ndak kiniki ale'nggen mbako logobagip nduk, yokkiragi o.

¹⁹Kit nonggop wonogwe nogo liippinaganuk yo'niri woramenggerak neenu age logominggirik, niniki ugun tayenak logokit nduk, ninowe Yetut nen niniki koonnege kenok, Timotiyut mbet-mbet pekkiya woraawak nduk, kinowagam nappi woroorak mbakirak o.

²⁰It aakumi yime abok aret Keritut Yetut obaalombok eerit noorak, ”Nineebi o,” mbako logonet, it inobaalombok mban koonggo'net nogwe iigak kwe, at Timotiyut alik nen perak, kit nonggop wonogwe nogo, mondok abet aret kinoba abeke menggerak me, at aret nappi woraagin o.

²²Aap ambi apuluk nen ogoba yeenggwaage minggi kwak, an obeelom wone yoranet nage neegak, ko'lu-kii'me yeenggwanege nagagerak ti paga, at obaabut kineenu aret me,

²³nonggop togon eeppaniyak nawone mbanggwi nogo, neenu age logominggirik, mbet-mbet kinowagam nappi woraagin mbake agarik o.

²⁴Ndi, an togon mbet-mbet kiya woroorak nogoba Ala nen tu koonogo panigin abet aret mbake kwe,

²⁵waga'lek neegak, an niniki eyak wappanuwak nduk, aap ambi awot imbirak ndak-ndak wim nambuko mengga kwak, Ala wone wigak yuwak nduk, nimbirak ndak-ndak eeko monggoorak nore Epapororitut kit nappi wogotak nogo, kinowagam nappi wage ti o.

²⁶At nogo nen, ”An andi ee'nakerak noreewi muk konenggaarak me, nonggoti mbakwi iigak logokwak, pegiya na ilik?” yinuk, iniki piirik eeke kage nagarik, at aa'nduk, kinowagam nappi wagi ti o.

²⁷At andi kambuurak abet aret eereegerak kwe, Ala abuwa mbake logonet, obeelom eeppereegerak. At mban abuwa mbareegerak lek o. At andi eereegrak nogo paga an togon niniki ambinom aaninggin logonet, wakko'net unggwage logokwak, niniki teeluk logokit nduk, obeelom eeppereegerak.

²⁸Togop me, at kiya wage kenok, kiniki ale'nggen paga keyage warogo waganggwi kiinok, an niniki piirik wonage nogo, tayok ari logonet, niniki ale'nggen mbarikit nduk, mbet-mbet kinowagam nappi wagi ti o.

²⁹Ndi, kit an eeppaniyak mbareegutak nogo obaane'me at aret eeppani wage logonet, ”Keritut ake eerit nage logonet, kambuurak op aret o,” yinuk, agabiti nen eebe ili yikkoloolik aret neya wagagerak me, yogondak kit kiya wage ti, ”Ninore Keritut imbirak kunik niya wage yi o,” yinuk, kiniki ale'nggen paga keyage warogo waanip o. It aap togoti mendek kiya wogwe iinok, keyage warogo waganako logonip o.