Read Wano PILIPI 4 Bible Online

PILIPI 4 - Wano bible

PILIPI 4

¹Togop aret eerigin me noreewi o, Kit an niniki abu kunik me, kinoba mondok aberak wonage o. Ndi, an nanggare-nggare makoota negen yippanege paga niniki ale'nggen mbariyak kit kineebe paga aret me, wone ti mondok nu'lek porogo logonip o. Ai, noreewi niniki kunik wa!

²Kit kumi Eroriya kunduk, Tinetike kunduk, kimbirak ninowe Keritut kinom kiniki kunik logonet, kiniki ambit lambunik logobagip nduk, noone yanggorogon yokkiragi o.

³Ndi, kat nore Tundogot nimbirak Ala eyabu ndak-ndak eeke menggendak me, it kumi ti, obeelom wone wigak yuwak nduk, nggwiirit-nggwaarit eeko nogogwaarak me, yeenggwaarage logot o. Ndi, aap Kelemen kunduk, it an noreewi ando abet mbareegwaarak inendage mbogut paga mbuku mbanak wonage nogo kunduk togop aret ninom eeko nogogurak me, inom yeenggwaarage logot o.

⁴”Ninowe kinom kunik logonet, mondok kiniki ale'nggen mbako logonip o,” yinuk, ne mbere paga yokkiragi o, noreewi.

⁵Ninowe endagembogut woroorak abu panggo yegerak me, it aakumi abok nen, ”Iniki obeelom paga aakumi obeelom eeppiinet nugwi iigo o,” yinuk, kinombaruwak nduk, eeko logonip o.

⁶Aaninggin ambi kinoba age kenok, kiniki piirik logogup o. Ata, ”Aaninggin ndogop noba agaarak o,” yinuk, tamban eekwi, ndi, kinamendek ambi lek kenok, wokkiraawak nduk, ”Ala wa,” yinuk, nggino yogwi, eeko logonip o.

⁷Niniki piirik lek ugun tayenak ale'nggen logowak nduk, eeppinanege menggerak alom kin kaga'lek niigak, eeppinanegak mban eeke menggerak Ala nogo nen, Keritut Yetut kinom kiniki kunik me, kineebe-kiniki abok aret liirogon kinarum logogin o.

⁸Noreewi o. Wone irip paga ambit iluk yi yokkira o. Pilit wone inom, wone iya lek kagak ugun agan nugwi wone inom, maluk wone inom, kwe abok agan nogwe wone inom, wone yuurak lek kagak ninggin agan nugwi wone inom, nabok-kabok agan nugwi wone inom, wone maluk ti mendek abok aret kit nen mbo punuk, wone kigirikwe obeelom yogo menggaarak kenok mban aberit nogo logonip o.

⁹An wone mamunggirage neegak, waganggo nogogutak inom, ari neegak kinaruk konenggo nogogutak inom, eeke neegak kinigen neego nogogutak inom, nogo abok aret eerit nogo logonip o. Ti abok aret eerit nogwe kiinok, niniki ugun tayenak ale'nggen logowak nduk, eeppinanege menggerak at Ala nogo nen kinarum aret logogin o.

¹⁰Aa'nduk noba kiniki abe'naka'lek wonogogutak kwe, yogondak iluk kiniki abe'nakwi kiige nagarik, nowe nimbirak kunik logonet, niniki ale'nggen ambik mbake agarik o. Aa'nduk we noba aberak wonogogutak kwe, eeppaniyak eyom awo aga'lek kenok, puk wonogogutak me nduk yokkiragi o, noreewi.

¹¹An yi mendek ndi mendek abok aret noba age kagak, niniki ugun tayenak logorak mamunggolagagirak me, an namendek lek kenok, ”Ambi wo'negabok eekaarak ao,” yinuk, yokkirage lek o.

¹²An namendek lek kenok, wonage kenok, ti neenu aret o. An mbi ndonggoppanege, abu ee'nake, ti neenu mban. Ndi, namendek ka'let age, namendek lek age, yi mendek ndi mendek op-maluk abok aret noba age nogo kagak niniki ugun tayenak logorak mamunggolagagirak.

¹³Keritut nimbirak kunik logonet, omaawi eeppanege kagak, an yi eekak ndi eekak abok eeriyak op aret kage minggirak.

¹⁴Op aret eeriyak kage neegak kwe, an aaninggin noba age mbareegi, kit nen yeenggwanireegutak me, ”Wa,” yokkiragi o.

¹⁵Kit Pilipi mendek yi wae. An maan aa'nduk obeelom wone yi awi ndi awi yoranet nage logokit nduk, o Makeroniya mbo punuk o alik me nage neegak, Ala apuri kenok ti yeenggwa-yeenggwa eeko monggoorak kwe, it ando puk iigak, kit Ala apuri o Pilipi nen mban yeenggwanireegutak nogo kineenu aret o.

¹⁶An o Tetalonika wonage neegak, kit nen ne mbere paga yeenggwanireegutak nogo kunduk aberak aret wonage o.

¹⁷Kinamendek ambi wo'nirubagip nduk, an nggino yokkiraga'lek neegak, wo'nireegutak ugun waganeegirak nogo ti, Ala nen peebi onggo nggwok wokkiraawak nduk, eyo anggen yi'nage minggi kwak, kit togop aret anggen nggwok yikkologwe kiyaakit nduk, waganeegirak o.

¹⁸Kit nappani wogogutak nogo abok aret waganeegirak me, lek aga'lek wonage aret o. Ala ake pugu kani kunggwi obari obeelom kenok Ala nen, ”Op wo'nega o,” yinuk, iniki ale'nggen mbake minggi kwak, kit an nake pugu aap Epapororitut nen wo'niruwak nduk nappi wogogutak nogo, wonok niri wage mbareegi, wagangge nagagirik, ndiinik-piinik agago pereegirak lek aga'lek wonage aret o.

¹⁹Nit eeriyak ambi mendek lek age kenok, Keritut Yetut eereegerak paga at Ala nen oona ngginik kagak wo'nirage logogin o.

²⁰Togop me, ”Ninogoba Ala endage mondok-mondok tiyappogo logowok o,” yinuk, abet aret yokkiragi o. Amin.

²¹An noreewi ninom yime wonogwe nogo nen kit abet mbareegutak Ala apuri Keritut Yetut kinom kiniki kunik wonogwe nogo abok aret keyage wappinagago o.

²²Ndi, Ala apuri o yime wonogwe nogo Kayitat apuri nogo inom abok aret keyage wappinagaga o.

²³Ninowe Yetut Keritut kinabuwa mbake menggerak me, kinarum aret logogin o. An Pawulut Timotiyut nimbirak abu aret yokkirogo o. Wa.