Read Wano KOLOTE 1 Bible Online

KOLOTE 1 - Wano bible

KOLOTE 1

¹Ala iniki mbareegerak nogo paga an Pawulut Yetut Keritut wone yoranet nege logowak nduk, nappiigak mendek agago paneegerak ninawot Timotiyut nimbirak nogo nen

²kit abet mbareegutak Ala apuri o Kolote wonogwe nogo, Keritut kinom kunik logonet, kulinik-kalinik obeelom wone mugurok nogo monggotak me, nit wone ambi yokkiraawi o. Ninogoba Ala iniki kunik nen wokkirage, ndi, kiniki ugun obeelom logobagip nduk, eeppinagage, eeke logogin o.

³Ala ari menggerak wone obeelom wone yokkirogo logonet, ”Kit abet mbakwi kenok, kinake aago mbogut paga wonage o,” yinuk, aa'nduk yokkirogogwaarak nogo konembunuk, mondok kola noorak kiniki luunik logonet, kit Keritut Yetut abet mba'nuk, kiniki at oba panggombugwi, ndi, it abet mbareegwaarak Ala apuri abok aret kiniki kunik aganakwi, eekwi nogo kulinik-kalinik kinabok ninaruk konenggo nogootik, kinake tamban eeko logonet, ninowe Yetut Keritut ogoba Ala mondok, ”Wa,” yogo monggoorak.

⁶Obeelom wone Ala abet aret kinabuwa nen eeppinagage menggerak wone nogo, kinaruk konenggo nogogutik, abet mba'nuk, waganeegutak kuli nen yogondak awo aret, kinenggela'me nen wiganinuk nage logonet, eyoonggen yi'nage minggi kwak, yi o ndi o abok togop aret wiganinuk nage logonet, anggen abu alik negen yi'nage agaarik o.

⁷Obeelom wone ti nogo, at ninom niniki ambit kunik Ala ayeloman logonet, ndak-ndak eeko monggoorak Epaparat nogo nen mamunggiragagerak o. At Keritut ayeloman logonet, nit kinake eeriyak meek kenok ninobaane'me at aret kulinik-kalinik eeke menggerak me,

⁸Aberiniki nen eeppinagage kagak, nabuwa-kabuwa mbako monggotak nogo, at nen aret yo'nira wage mbaki, konenggo nogogurik, Ala mondok, ”Wa,” yogo monggoorak.

⁹Kit togop eerit nogwe ninaruk koneneegurak kuli nen puk aga'lek kulinik-kalinik kinake tamban eeko logonet, Ala nen eeriyak mbake menggerak nogo, Aberiniki nen yi mendek ndi mendek alom abok aret kineenu eeppinagage kagak kiniki warak a'nuk, ninowe endagembogut inikilom kinombaruwak nduk, ndak-ndak eerit nogo logonet, eyoonggen abe yi'nage minggi kwak, obeelom eerit nogwe, ndi, Ala eeke menggerak kineenu ogo logomonggotik, kiniki kole ogwe, eerubagip nduk, kinake tamban eeko monggoorak.

¹¹It abet mbareegwaarak Ala apuri nogo, Ala abu'me eya aago minggim logonet, pipuk eerogo piyareegerak kolaawak nduk, kooneegerak nogo, nit ninom ndak-ndak kolaawak nduk, niniki koonogo pinaneegerak me, aaninggin-paaninggin kinoba age kenok, kinaanaganggenggwi lek kiniki kwi'ndak nu'lek logonet, kiniki ale'nggen paga, ”Ninogoba Ala wa,” yinuk, waganggo logobagip nduk, tamban eeko monggoorak. Kit kiniki kwi'ndak logonet, waganggwi kiigak, at mondok tiyanak logonet omaawi paga yi mendek ndi mendek eeke menggerak nogo nen, kit ndak-ndak omaawi eeppinagage logowak nduk, kinake tamban eeko monggoorak.

¹³Nit Ibilit unde minggim o apit me keele maarak negen wonogwe me, Ala nen ninagap ndarogo at aput iniki kunik nogo abu'me pinani nage mbareegi, nit wondet aago nugu logowak nduk, aput nogo nen ninomaluk lek eerogo pinaneegerak.

¹⁵Ala atenggen ninigen kaga'lek kwe, at atenggen ndak-ndak ti, Keritut aret me, liippogo ogoorik o. Ala aput manggu ndarak Keritut aret me, yi mendek ndi mendek wakkagagerak nogo, tebenak kagak, at mondok tiyanak aret agaarik o.

¹⁶Ala nen eeriyak yoge kagak, mbogut paga mendek inom, nggween paga mendek inom, ninigen kogwe mendek inom, ninigen kaga'lek mendek inom, yi mendek ndi mendek abok aret aput nen mban wakkagagerak. Wakkage logonet, kugi nggween abu'na mendek inom, eyoonggame mendek inom, mbogut abu'na mendek inom, yi kugi ndi kugi yi mendek ndi mendek abok aret, at mban endage tiyappogo logowak nduk, ogobakkigirogo piyareegerak.

¹⁷Yi mendek ndi mendek awo wakkaga'lek kagak at aa'nduk wonagagerak. At nen mban yi mendek ndi mendek wakkage nagagirik, unde wonage me, oone konenggo menggaarak.

¹⁸Ala apuri yi awi ndi awi menggaarak lambuk togon Keritut eebe negen nit aret me, ninanobak kwak ti, at aret. Ndi, yi eekwi ndi eekwi alom unde nogo ti, at mban aret me, yi mendek ndi mendek abok aret tebenak kagak, at mban tiyanak logowak nduk, kambunuk nogo menggam nen aa'nduk at aret eenik agago mippereegerak.

¹⁹At Ala nen, ”An neebe niitok li'luk aago minggi kwak, naput mondok ndak-ndak aret logowak o,” yinuk, inikilom mbake logonet,

²⁰”Naput eyo karo-karo paga kangge logonet, yi mendek ndi mendek abok aret, an ninom ogoorak wonogwe nogo, amiya paga inonggo mbambunuk, an ninom lambuni woraagun o,” yinuk, kooneegerak me, at eereegerak paga mbogut paga mendek inom, nggween paga mendek inom, abok aret at amiya paga ninonggo mbambunuk, Ala ninom lambumbinani wagagerak.

²¹Kit aa'nduk maluk eeriyak mban kiniki koombunuk, eerit nogo logonet, Ala kinom ogoorak nda negen aret wonogogutak kwe,

²²Keritut nen wokkiren Ala enggaanom unggwi nage mbariminggi, Ala nen, ”Kat an napuri nake leenak logonet, maluk eeka'lek obeelom aret monggotak me, an noone kinoba pinagagin lek o,” yinuk, yokkiraawak nduk, at eebe aap aret age nagagirik, ninake kambeegerak nogo paga lambunogo pinaneegerak me, yogondak lambunik aret ogoorik o.

²³Keritut ti eereegerak nogo paga, Ala kinom lambumbinagareegerak me, obeelom wone kit konenggo nogogutik, abet mbako logonet, ”Ala nen togop eeppinanigin kagi,” yinuk, kiniki luunik wonogwe nogo, mbo puurak mage o. Ata, o eyak wurabak kwak Keritut paga kiniki panggombunuk, wone abet mbareegutak nogo, kiniki nu'lek logonet, mugurok nogo logonip o. Ndi, obeelom wone yi awi ndi awi abok aret wiganinuk nage nogo ti, an Pawulut ninom aret yorage logowak nduk, Ala ayeloman agago paneegerak aret o.

²⁴An andi-pandi eeppanugwi nogo ti, ”Kit kinake aret eeppanugwi,” mba'nuk, niniki ale'nggen mbake agarik o. Ndi, ”Ala apuri yi awi ndi awi menggaarak lambuk togon ti, Keritut eebe aret me, iniki nu'lek logowak nduk, Keritut wako logonet, it ando nen warulik mbo pereegwaarak nogo, Ala apuri inake an neebe paga eeppaniyak op aret,” mba'nuk, niniki ale'nggen mbake agarik o.

²⁵Wone o maan nen yogondak kuli kote kumaarak wonage nogo, ninombomini maan ndarak nen liippega'lek wonogogwaarak kwe, yogondak iluk, it abet mbakwi Ala apuri iinok, kin eeppiyareegerak. Kin eeppiyareegerak Ala wone nogo, kit yokkirage logowak nduk unde eeppaneegerak nogo ndak-ndak, it Ala apuri yi awi ndi awi menggaarak nogo abok aret inake eeke logowak nduk, inayeloman agago paneegerak o.

²⁷Yi aakumi ndi aakumi abok iniki ale'nggen mbaruwak nduk, wone alik negen mondok iya lombok eeppinaniyak kagak kumaarak wonagagerak nogo, ”Peebi aakumi endekem konenggulik mendek inom ineenu eeppiyaakit o,” yinuk, mbareegerak nogo, yogondak iluk aret ineenu eeppiigerak. Wone niniki ale'nggen mbariyak kagak kumaarak wonagagerak eebe nogo ti, Keritut ninom kunik wonogwe o. Ndi, ninom kunik aret me, peebi at ninom ndak-ndak logowak nduk, eeppinaniyak niniki luunik wonogwe nogo, abet aret kola nagun nineenu ee'ninake niniki me wonage nogo, Keritut aret o.

²⁸Togop me, noreewi o. Kit ninapuri abok aret Keritut kinom kunik logonet, kiniki muk kole agaarak kenok, Ala owagam wokkiren pinagi nawok mba'nuk, Keritut eeke nagagerak wone yokkirogo logonet, kinaruk wakwi, niniki abu kwippunuk mamunggirogwe, eerit nogo ogoorik o.

²⁹Kiniki mondok kole age kiyaakit nduk, Keritut omaawi mondok alik negen eeppanege kagak, an puk aga'lek kinake mondok nggwiirit-nggwaarit eeke agarik o.