Read Wano 1 TETALONIKA 3 Bible Online

1 TETALONIKA 3 - Wano bible

1 TETALONIKA 3

¹Togop me, ambinom puk logorak abu meek ee'ninake mbareegi, an nalik o Atina taati neegak,

²at ninawot Ala ayeloman obeelom wone Keritut eeke nagagerak wone ninom yorogo monggoorak Timotiyut nogo nen it aakumi aaninggin kinoba pinagagwi paga wone ti, ”Nineebi o,” yinuk, mbo pugwi kiyo, kit abet mbakwi nogo nu'lek agago pinagage, kit kiniki eyak wappinagage, eeke logowak mba'nuk nappinagi wogogurak. Nit togop aret eeppinanogo logowak nduk, Ala nen koonogo pinaneegerak kineenu aret o.

⁴Kit ninom logonet, awo eeppinanega'lek kagak, ”Aaninggin eeppinanogo logogun o,” yokkirogo nogogurak nogo a'me aret agagerak ti, kineenu aret o.

⁵Togop me, an ambinom puk logorak abu meek ee'nake mbareegi, at niniki nggagangge menggerak nogo nen kit kiniki nggaganiyak kagak nit aanom warogo wone yokkirogo nogogurak kero, niniki piirik logonet, kit kiniki abet mbakwi nogo nonggop wonage an neenu arikit nduk, aap Timotiyut nogo nappinagi wagagirak o.

⁶Ndi, yogondak perak, at Timotiyut muk kit wonogome nen nit niya wagaarak. Ndi, niya wage nagaarik, wone obeelom wone kit kiniki abet mbakwi wone inom, aakumi kinom kiniki kunik aganakwi wone inom, ndi, nit nen kit kiyaawok lak, ”Ao,” mbakwi kwak, kit nen it iyaawok lak ”Ao,” ninombako logonet, kulinik-kalinik kiniki obeelom paga ninoba abekwi nogo inom, yo'nira wagaarak o.

⁷Noreewi o. Aaninggin-paaninggin ninoba pinanugwi iinok, niniki aaninggin ndugu agan koonit nogwe me, kit abet mba'nuk eerit nugwi nogo yo'nira wage mbaki, niniki kwi'naga o.

⁸Kit kinowe kiniki kunik logonet, mondok nu'lek wonogwe kiinok, an niniki aaninggin nen wakkolaagin lek o. Nale'nggen logonet, eerit nage logogin aret o.

⁹Kit eerit nogwe kiinok, nit niniki ale'nggen ambik ee'ninake me, ”Ala wa,” yinuk, yogo monggoorak nogo ti at eenu aret kwe, ambi ngge mendek wa yorubok ee'ninake o.

¹⁰Nit kinetenggen kiigo logomonggoorik, kit abet mbakwi wone nogo ambi yobok ari kero, yokkiraawok nduk, ko'lu-kii'me ninoone aganggen kerek togon kinake tamban eeko monggoorak.

¹¹Nit pekkiya woraawak nduk, at ninogoba Ala ninowe Yetut imbirak nen tu mbininogo pinani woraawak nduk, tamban eeko monggoorak.

¹²At ninowe Yetut it abet mbakwi at apuri inom wogo logomenggaarik, ”Kit kiniki nu'lek logonet maluk eeka'lek abu obeelom eeko nogotak me, nogoba Ala oone kinoba pinagagin lek aret kiigi,” yinuk, yokkiraawak nduk, nit nen kit niniki mondok kunik mbakwi nogo kokwak, kit-kit inom, aakumi abok inom, ambinom niniki-kiniki kunik aganako logorak ninowe nen eekkinabuwak nduk, tamban eeko monggoorak.