Read Wano 1 TETALONIKA 5 Bible Online

1 TETALONIKA 5 - Wano bible

1 TETALONIKA 5

¹Noreewi o. Yi eeriyak wone yokkirogoorak nogo ti, ”Ndiyom paga woraagin a, o lagi nage, wambi wage, eeke paga woraagin a?” kineenu arubagip nduk, liiru mbanggiroorak lek o.

²At ninowe woroorak eyom nogo ti, aap yogoot wagangga nen oonikiya wogo menggaarak nogo pogom woraagin ti muk kineenu aret o.

³It aakumi nen, ”Nit abok obeelom aret me, niniki ale'nggen aret o,” yogwe iigak, kwe abila aagaluk nda'nariyak eenggo'lek me, enegen pagak ari nogo pogom, ninowe abera'lek me wage logonet, mondok lek eerogo piya woraagin me, it ambi mbo nagun abu lek aret o.

⁴Togop me, noreewi o. Kit perak, kiniki o apit pogom kobak wonogwe lek o. It aap oorum wonogwe lek me, aap yogoot wagangge unggwage kenok, inogut nage nogo kokwak, kit togop kinogut nagin lek o.

⁵Kit abok aret aakumi o apit paga logonet eeko menggaarak nogo pogom lek o. Ata, eya paga logonet eeko menggaarak mendek kit aret o. Ndi, it aakumi oonikiya paga eeko menggaarak pogom kit lek mban. Ata, it liingge eeko menggaarak nogo pogom kit aret me,

⁶it aakumi ando nogo yugu menggaarak nogo pogom nit togop nogo yugu logorak lek o. Nit nogolumok yaga'lek tum wako logowok o.

⁷It aakumi nogo yugu menggaarak nogo ti, oonikiya aret nogo yugu menggaarak. Ndi, it amburu kumili aganabuwak nduk, nonggo menggaarak nogo ti, oonikiya aret nonggo menggaarak kwe,

⁸it liingge eeko menggaarak nogo mendek nit aret me, nit nogolumok yaga'lek tum mban wako logowok o. Tum wako logonet, nit niniki abet mbakwi, aakumi niniki kunik aganakwi, eekwi nogo paga ninarin pogom yirikkologwe, ndi, aap wim nambuka anobak me warukwak nduk, petagi mbuti mendek yirikkolage nogo kwak, ninagap nda'ninaburak niniki luunik wonage nogo abekwi, eeko logowok o.

⁹At Ala nen anini ninoba pinanikit nduk, leenogo pinanulik o. Ata, at ninowe Yetut Keritut nen ninagap ndaruwak nduk, leenogo pinaneegerak o.

¹⁰At ninom nineenik mban logowok nduk, nit ninake kambeegerak me, nineenik wonogwe kenok, kanggwi kenok, op mban aret o.

¹¹Togop aret me, kit kiniki eyak wat-wat eekwi, ndi, at ambi nen at ambi iniki kole eekak eekwi, eerit nugwi nogo yogondak ndak-ndak aret eerit nogo logonip o.

¹²Noreewi o. ”It aap kinenggela'me nabenak mban eeppinagagwi, ninowe inom kunik logonet, kinarum wonogwe, ndi, wone mamunggirogwe, eekwi nogo liippiigo logonip o,” yinuk, yokkirogo o.

¹³It eerit nugwi ti paga kit kiniki kunik logonet, tiyappiigo logobagip nduk, yokkirogo. Kit kiniki ambit lambunik logonip o.

¹⁴Ndi, noreewi o. It aap iniki nen alik eerit nugwi iinok, inaruk wakwi, aaninggin inoba age kero, inagabiti mbakak nugwi iinok, iniki kwippiigwi, iniki awo kole aga'lek kenok, eyak wappiigwi, ndi, aakumi abok kinoone yanggorogon yorogwe, eeko logonip o.

¹⁵Maluk onggo-onggo eekwi iyo, liippiigo logonip o. Kit-kit inom, it aakumi abok inom, obeelom mban eekak yuwak nduk, liippogo logonip o.

¹⁶Kiniki ale'nggen mban mbako logonip o.

¹⁷Puk aga'lek tamban mban eeko logonip.

¹⁸Keritut Yetut kinom kunik logonet, eerit nogwe kiinok, yi mendek ndi mendek eeppinagagwi nogo ti, Ala mbareegerak paga aret eeppinagagwi me, ”Wa,” mban yogo logonip o.

¹⁹Aberiniki tebenogo puurak ti mage o.

²⁰Ndi, Ala nen wone yorage kagak, yokkirogwe nogo, miyuk-meya eerogo pugwi ti mage mban o.

²¹Yi mendek ndi mendek abut mbambunuk, abe kenok mban nggirik-nggerok agago porogo logonip o.

²²Yi mendek ndi mendek maluk eraambe yelok kenok, mbo pogo logonip o. Wone yokkirogoorak ti abok aret eeko logonip o.

²³Ndi, yogondak niniki ugun obeelom tayenak logowak nduk, eeppinanege menggerak at Ala nogo nen kit kineebe at ake leenogo pake logonet, kinomaluk abu lek eerogo pinagage, ndi, ninowe Yetut Keritut woroorak eyom paga maluk kinoba pinagage kero, kiniki-kineebe abok aret inaani nggelorogon pinagage, eeke logowak nduk, tamban eeko monggoorak.

²⁴At yonggo pinaneegerak nogo nen yegetak alik mbeyok ari lek, abok liirogon aret eeke menggerak.

²⁵Noreewi o. Ninake tamban eeko logonip o.

²⁶Keyage wat-wat yogo logonet, kiniki kunik paga linggik-kambuk yogo logonip.

²⁷Nit liiru mbanggoorak yi, ninowe endagembogut nen, ”Yoret o,” yinuk, yo'niragaarak me, noreewi apit inenggaanom paga mbininogo yoraanip o.

²⁸At ninowe Yetut Keritut kinom wonage me, kinarum aret logogin o. Noreewi wa!