Read Wano 2 TETALONIKA 1 Bible Online

2 TETALONIKA 1 - Wano bible

2 TETALONIKA 1

¹Noreewi o. Kit ninogoba Ala ninowe Yetut Keritut kinom kunik o Tetalonika kuwak eeko monggotak nogo, nit an Pawulut inom, Tiliwanut inom, Timotiyut inom, nen wone ambi yokkiraawi o.

²Ninogoba Ala ninowe Yetut Keritut imbirak nen iniki kunik en wokkirogwe, kit kiniki ugun obeelom aret logobagip nduk, eeppinagagwi, eeko logogun o.

³Noreewi o. Kit eekwi paga puk logorak meek ee'ninake kenok, Ala mondok, ”Wa,” yogo monggoorak. Kit abet mbakwi nogo piyok ari lek omaawi arit unggwage, ndi, niniki-kiniki kunik aganakwi ti, yogondak nggwok arit nage, eeke me, ”Ala wa,” yogo monggoorak nogo ti, op aret eeko monggoorak o.

⁴Kit piyak-payak eerogo pinagagwi, aaninggin kinoba pinagagwi kwe kagak, kinogogumbuk logonet waganggwi, eeppinagagwi iigak, kiniki mondok nu'lek logonet abet mbakwi nogo, nit Ala apuri yi awi ndi awi kuwak eeko menggaarak yoranet nogo logonet, tiyappinagit nogo monggoorak.

⁵Kit Ala abu'me logorak miikotak kenok, maluk eekkinakwi nogo ti Ala nen, ”Kit obeelom aret me, nabu'me logorak op aret o,” yokkiraawak nduk, kinogogumbuk logonet, waganggwi me, Ala nen koonogo pinanege nogo ti, maluk lek obeelom aret koonogo pinanege menggerak nineenu ogo o.

⁶At Ala iniki koonak a'me nggelok eeke menggerak me, it aaninggin kit kinoba pinagagwi nogo, onggo at nen it aaninggin inoba piyaagin o.

⁷Ndi, yogondak aaninggin kinoba wonage nogo peebi nit ninom niniki tayenogo pinanigin o. At ninowe Yetut it yonggo mbogut paga nugu menggaarak waka'ngget mondok tiyanak menggaarak melaikat nogo inom mbogut paga nen kani wuninik enggela'me wambi wogo logonet,

⁸it aakumi Ala ineenggo'lek obeelom wone ninowe Yetut eeke nagagerak wone nogo wagangga'lek kenok, maluk onggo wogora woraagin eyom nogo paga niniki tayenogo pinanigin o.

⁹Ti eyom paga nit abet mbakwi at apuri nogo nen at eebe tiyappugwi, ndi, nit wone paganogo yokkirogogurak paga abet mbareegutak me kit ninom abet mbakwi abok aret, ”Wi!” ugwi, eeruwok nduk, woraagin o. Wage kenok, it Ala ineenggo'lek obeelom wone Yetut eeke nagagerak wone wagangga'lek mendek nogo maluk onggo mondok-mondok aganabuwak nduk, at Ala nen, ”An niniki mba'nuk eeppiinet nage neenok aakumi nen, Wi! nugu menggam nenggaawak paga yayi logorak lek o,” yinuk, ogoorogo endekem wumbiyaagin o.

¹¹At ninogoba Ala nen obeelom eerit nogo logobagip nduk, kinayonggo pereegerak nogo ndak-ndak eerit nugwi kiinok, ”Op eekotak o,” yinuk, yokkirage, kit obeelom eeriyak mbakwi nogo eerubagip nduk, eeppinagage, ndi, at abet mba'nuk eeriyak mbakotak nogo ndak-ndak eerubagip nduk, omaawi paga eekkinake, eeke logowak nduk, kinake tamban mban eeko monggoorak.

¹²Ninogoba Ala at ninowe Yetut Keritut imbirak iniki kunik nen eeppinagagwi iigak, togop eerit nugwi kiinok, kit nen at tiyappugwi, ndi, at nen kit tiyappinagage, eeko logomunggup o.