Read Wano 1 TIMOTIYUT 4 Bible Online

1 TIMOTIYUT 4 - Wano bible

1 TIMOTIYUT 4

¹At Aberiniki nen kin paga ari logonet, ”O age yobok kuli paga it aap ando nen aakumi inambokan laganuwok nduk, pilit pugunogo yorogwe, Ibilit nen yorage kagak mamunirogwe, eekwi wone nogo liippunuk, mugurok nogo logonet, Ala wone abet mbareegwaarak nogo kobak eerogo mbo aret pugun o,” yinuk, ari menggerak.

²It aap wone ti mendek agan nugwi nogo ti, aakumi inambokan laganuwok nduk, pilit pugunogo yorogo menggaarak aret. Ninagabolo togum agaatak me, kani nengge kagak andi lek minggi kwak, it aap ti inikime togop aret me, wone yoragaatak kwe, konengga'lek inogogumbuk aret menggaarak o.

³It aap ti'nen, ”Kumi wogonako logorak mage o,” yinuk, yorogwe, ndi, it aap Ala ari menggerak wone ineenu a'nuk abet mbakwi nogo nen Ala nen ugun noorak nduk wakkagagerak me, ”Wa,” yinuk, ma'mak noorak op mbakwi iigak, ”Noorak mage o,” yinuk, mamunirogwe, eeko menggaarak.

⁴Yi mendek ndi mendek Ala nen wakkagagerak nogo ti, obeelom mban aret wakkagagerak me, nit niniki nen, ”Wa,” mbako logonet, waganggwi kenok ti, mage lek o.

⁵Ala wone waganggwi, tamban eekwi, eekwi paga yi mendek ndi mendek ugun noorak op aret o.

⁶Wone yi koreewi mamunirage keenok, kat Keritut Yetut ayeloman abe mendek aret logomunggun o. Ndi, niniki abet mbakwi wone inom, wone kole wone mamunik mugurok nage menggendak wone inom, waganogo aberit nage paga kiniki nu'lek kole aret logomunggun o.

⁷It kumi inanggok inariimbayok mbininggo mengga kwak, yi wone ndi wone abe mendek lek kagak aanom warogo mbininggo menggaarak nogo ti, liippugun o. Ala wone perak, ndak-ndak eeke logonok nduk, nabinik-nabenak mamunggolage logot o.

⁸Nineebe omaawi eeriyak wakkagak eekwi paga nineebe ninomaawi ee'ninake ti, we mbuuluk op ee'ninaburak nduk eeko monggoorak kwe, Ala wone yugu ndak-ndak eeruwok nduk, wakkagak eekwi niinok perak, Ala nen yogondak inom, peebi inom, ee'ninaburak nineenu me, mondok nggwok togon obeelom ee'ninaburak nduk, eeko monggoorak kogo o.

⁹Togop me, ”Wone ti abet aret o,” yinuk, waganggo logorak op aret o.

¹⁰Yi aakumi ndi aakumi abok inagap ndarikit mbake menggerak kwe, nit niniki at oba panggombunuk abet mbakwi ninagap ndakak mondok itok eenik menggerak Ala nogo niniki luunik mondok nu'lek monggoorak me, kola nawok nduk, nit lin wako logonet, nabilik-nabenak mban eerit nogo monggoorak.

¹¹Wone yi nogo lengganogo mamunirage logot o.

¹²Kat keebe awo tawe aret me nduk, aakumi nen tebenogo pagarak ti mage o. Ari menggendak inom, eeke menggendak inom, aakumi kiniki kunik aganake menggendak inom, Ala wone abet mbake menggendak inom, maluk eerukwak, kenegen tebenak nege menggendak nogo inom, eeke ti paga it aap abet mbako menggaarak kat in wakkagak logonet, eeke logot o.

¹³An awo waga'lek neegak, Ala wone mbuku paga mbininirage, inaruk wake, wone mamunirage, eeke logonet, liirogon eeke logot o.

¹⁴Ala eyabu ambi eeke logonok nduk, it Ala apuri unde nogo nen kanobak tebenggo logonet, ”Kat peebi togop eeke logomunggun o,” yinuk, nggwok paga aa'nduk unde eeppagareegwaarak nogo kobak eeriyak ti mage o.

¹⁵Kiniki kole age aakumi abok yelok keyaawak nduk, yokkigirak ti paga mban luumbunuk, eerit nage logot o.

¹⁶Kobaabut eeke menggendak inom, koone mamunirage menggendak inom, liippege logot o. Wone yi, mondok liirogon porogo logot o. Liirogon togop aret eeke keenok, it aakumi kat koone konenggwi nogo inagap ndake, ndi, kat kunduk kagap ndakkolage, eerumunggun o.