Read Wano 1 TIMOTIYUT 6 Bible Online

1 TIMOTIYUT 6 - Wano bible

1 TIMOTIYUT 6

¹Ala endage inom, nit wone mamunirogwe nogo inom, miyuk-meya eerogo pukwak, wam keeleluwi mbarenak mban piirogo mengga kwak, it aakumi inayeloman ti, togop aret, ”Ninogobamini aret o,” yinuk, inoone konenggo logonet, inayuk wuko logowak o.

²Ndi, it aakumi inayeloman nogo nen inogobamini abet mbakwi iinok, ”Nit kunduk abet mbakwi me, Ala apuri ninom ndak-ndak aret o,” yinuk, inoone taganogo punuk, tebembiyoorak mage o. Ata, it nogo nen, ”Ninogobamini yabu eeppiigwi ti, aakumi inambik ti lek o. Nit ninom ndak-ndak abet mbakwi aret me niniki kunik aret o,” yinuk, ambinom inake nggwok togon eerit nugu logowak o. Wone yokkege yi nogo mamunirage, inaruk wake, eeke logot o.

³Aap ambit-ambi wone kole wone ninowe Yetut Keritut wone nogo inom, ndi, nit Ala wone liippunuk, mugurok noorak mamunirogwe wone nogo inom, eebi mbake logonet, alik mamunirage kenok,

⁴at nen, ”An neenu o,” nduk, wogoppatit nage kwe, kobak kagak we ugun agan nege o. At aap ti nogo wone, ”Yi ndogop me, ti ndogop me,” ari logonet, wone wake, ndi, wone mbuuluk yugu kagak ndugwi pege, eerit nage logorak ti inikilom lombok mbarit nage menggerak. At togop eerit nage kenok, it aap ando Ala ari menggerak wone nogo mondok kobak logonet, maluk mban koonggwi nogo nen, ”At ari kenok mban koneniyak yo'nirogwe me,” yinuk, neebi-keebi yogwe, ”An iya, kat iya,” yogo logonet ndugwi pugwi, at meek ombako logonet abok mbanit nogwe, ndi, inom wone mondok wakak mban eekwi, eeko menggaarak. It aap ti, ”Ala wone liippunuk eerit nogwe niinok, nineenggi warak eekkolaawok o,” yinuk, mbako menggaarak kwe

⁶nit perak, Ala wone liippunuk, eerit nogo logonet, niniki tayenak wonogwe niinok, onggo iya tit woorak nineenu aret o.

⁷Ninagalomini inikime nen nda'nogo logonet, iri'ngga ambi inom wonok wundi woroolik me, kanggo logonet kunduk, ambi wonok nagun lek o.

⁸Ninambi-ninayum ambit iluk wonage kenok, ”Yi abu aret o,” yinuk, niniki tayenak logowok o.

⁹It aap, ”Nineenggi warak eekkolaawok,” yinuk, mbakwi iinok, Tile nen, ”Nanonggwan aga o,” yinuk, iniki nggagangge kagak, pagi keele pugu eenggo'lek logonet, ugun aru paga nage me, enggaanok nggerok togon wake minggi kwak, it aap ti togop aret perak togon maluk eekwi, ndi, ”Yi an neebe paga maluk eekkolage,” mbaka'lek iniki ugun nenet nugwi, eerit nugwi paga yobok togon yigeebu wanggo logonet, ineebe mondok wakkolaagun aret o.

¹⁰Yiluk-maluk alom lombok ti, wu mban uugwe mbarit nugwi ti aret o. It aakumi ando nen uugwe nduk, kwaarit nugu logonet, wone abet mbareegwaarak nogo mbo punuk, tu alik nomoninuk nogwe me, aap togowa paga ndanunggologo nagaatik andi kogo menggaarak nogo kokwak, it aap ti, togop aret wakkologo menggaarak.

¹¹Kat perak, Ala aput aret me, eekwi ti mendek mamunggolookwak, ogole nen mbagangge logot o. Obeelom kenok mban eekwi, Ala wone liippunuk eekwi, iniki abet mbakwi, aakumi iniki kunik aganakwi, aaninggin inoba age kagak, inogogumbuk logonet waganggwi, iniki yanggonak paga yorogwe, ti mendek eeriyak kenok mban mugurok nage logot o.

¹²Nit abet mba'nuk mugurok nogwe nogo, kat kunduk mugurok nage logonok nduk, mondok wakkagak eeke logot o. Ndi, keenik mondok logonok nduk, kayonggo pege mbareegi, kat abet mbareegindak aakumi ambik inenggaanom paga paganeegindak nogo, mondok kola namunggun aret o.

¹³Yi mendek ndi mendek ineenik aganake menggerak alom at Ala inom, ndi, at iniki mbareegerak Ponitiyut Pilatut enggaanom paga paganeegerak Keritut Yetut nogo inom, imbirak inenggaanom paga noone omaawi yi yokkege agarik o.

¹⁴Wone lengganogo yokkereegwaarak nogo ambi wuppega'lek abok inaani porogo wonage me, ninowe Yetut Keritut kin ari woraawak nduk, liirogon porogo logonet, eerit nage logot o.

¹⁵Ala nen ninowe Yetut Keritut, ”Ndiyom paga kin eeppi woroorak,” koonogo pereegerak nogo ndak-ndak aret kin eeppi woraagin o. Nit alut eeko monggoorak mondok omaawi menggerak ti Ala aret o. Aakumi inoweewi inarum menggerak inogoba inom, yi aap ndi aap inendage warak inowe endagembogut inom, ti at aret o.

¹⁶At kanggeelik mondok-mondok eenik menggerak aret o. At wonage me time eya ambik me aakumi nen at owagam wok yi noorak meek aret o. Aakumi nen aa'nduk at eebe inigen kogolik me, yogondak kunduk inigen kogwe lek mban aret, ”At endage mondok tiyanak yi aakumi ndi aakumi abok at abu'me tebe yinuk, at oone mban konenggo logowak o,” yinuk, amin.

¹⁷It aakumi o yogondak ineenggi warak wonogwe iinok, ti paga iniki wogoppako logonet, yi mendek ndi mendek lek ariyak kagak, iniki ti paga luunik logokwak, yorage logot o. Ata, nit ale'nggen mbaruwok nduk, Ala nen yi mendek ndi mendek ngginu-ngginu eerogo wo'nirage nogo paga mban iniki mondok luunik logowak nduk, yorage logot o.

¹⁸Obeelom eeppiinet nugu logonet, yi obeelom ndi obeelom eekwi paga ineenggi warak eekkologwe, iniki lek ndoobu aakumi wogoroorak mban inikilom mbakwi, eeko logowak nduk, mamunirage logot o.

¹⁹Ti eekwi iinok, ko'lu o eebe wuruwak nduk, yogondak o eyak nu'lek wurakwi nogo kokwak, it peebi ineenik mondok abe mendek kologo logorak iniki piirik lek, ”Eeppinanigin aret o,” mba'nuk, inageerok abe kunggolaawak nduk, inawu kuwak eeko mengga kwak, yogonak yi obeelom ndi obeelom mban eerit nogo logowak nduk, yorage logot o.

²⁰Timotiyut wae. Wone liirogon yogwe lek inoone amburu puk-puk agan nugwi, pilit wone aret kwe, ”Wone ngget mendek yi aret o,” agan wogwe paga wone wakwi, eekwi nogo mendek liippugun o. Ata, kat unde logonok nduk, mippagareegwaarak nogo liippunuk eeke logot o.

²¹Wone ti mendek nogo agan nugwi paga aakumi ando abet mba'nuk waganggo nogogwaarik, Ala wone abet mbareegwaarak nogo mbo punuk, tu alik paga nomoninuk nogo agaarik o. Yogondak abu aret yokkigi. Ninogoba kimbirak wonage me, karum aret logogin o. Wa. Abu.