Read Wano 2 TIMOTIYUT 1 Bible Online

2 TIMOTIYUT 1 - Wano bible

2 TIMOTIYUT 1

¹Timotiyut wae. Kat naput niniki kunik aret me, at Ala mbareegerak paga nit Keritut Yetut ninom kunik logonet, nineenik mondok logorak wone abok yo'niragagerak nogo yorage logokit nduk, Keritut Yetut ayonggo nappani wagagerak an Pawulut nogo nen wone ambi yokkiri o.

²At ninogoba Ala inom, ninowe Keritut Yetut inom, imbirak nen iniki kunik nen wokkugwi, kabuwa nen obeelom eeppagagwi, kiniki ugun obeelom logonok nduk, eeppagagwi, eeko logogun o.

³An ko'lu-kii'me tamban eeke minggirak me, eeke logonet, kat koba aberak wonage me, ”Nogoba Ala wa,” yinuk, yoge minggirak. An nombomini maluk abeka'lek logonet iniki abe paga Ala ake eeko nogogwaarak nogo kokwak, an ndak-ndak aret eeke minggirak o.

⁴Kat le yereegindak nogo abe'nage kenok, an niniki ale'nggen nggwok aruwak nduk, ”Keya woraakit lak ao,” mbake minggirak.

⁵Kat kiniki abu abet aret Yetut oba panggombereegindak nogo an neenu aret o. Kowogolo Lowit inom, kat kagalo Ewunike inom, imbirak aa'nduk abet mbareegwaarak ndak-ndak, kat kunduk abet mbareegindak me niniki aberak agarik o.

⁶Togop me, an neenggi kanobak tebembagage neegak, Ala eyabu ambi ee'nok nduk, unde eeppagareegerak nogo, kani noguk ari kenok ambi kunggwi nogo pogom ambi abeke logonok nduk, yokkigi o.

⁷At Ala nen niniki ninagabitinggut mendek wo'niroolik o. Ata, maluk eeppinanugwi kwe, at omaawi eeppinanege kagak niniki kwi'ndak logonet waganggo logorak mendek inom, aakumi niniki kunik aganaburak mendek inom, niniki warak mendek inom, wo'niragagerak.

⁸Togop me, ninowe endagembogut eereegerak wone nogo yorage logorak kagabiti mbarugun o. Ndi, an Ala wone yorage nagagirak paga nen keele maa'nabeegwaarak nogo kagabiti mbarugun mban. Obeelom wone yorogwe paga aaninggin-paaninggin ninoba pinanugwi iinok, ndak-ndak woorak nduk, Ala omaawi wo'nirage menggerak me, an nalik lek o. Nimbirak ndak-ndak aaninggin kogo logowok o.

⁹At Ala nen ninagap ndake nagagirik, nit at apuri at ake leenak logowak nduk, ninayonggo pereegerak. Nit ambi eekkologogurak paga ti lek o. Ata, at ee'ninaburak kooneegerak nogo ndak-ndak, iniki kunik en eeppinanege logonet, ninagap ndareegerak. At iniki kunik en eeppinanege menggerak nogo ti, o yi awo wakkaga'lek kagak, ”Yetut Keritut abet mbakwi paga woorak o,” yinuk, koonogo pinaneegerak nogo, pagak yaga'lek wonagagerak kwe,

¹⁰yogondak iluk ninagap ndaka Keritut Yetut kin ari wage nagagirik, kambuurak ninoba lengganak wonogogurak nogo lek eerogo punuk, obeelom wone waganggwi paga nabelan-kabelan ee'ninaburak wone nogo nggwok paga pagak yereegerak.

¹¹Wone obeelom wone ti, mamunirage, yi aakumi ndi aakumi yoranet nege, yi awi ndi awi, ”Nak o,” yo'nege kenok nage, eeke logowak nduk, leenogo mippaneegerak.

¹²Mippaneegerak me, eerit nage neenok, aakumi nen aaninggin eeppanugwi kwe, nenggali mbaka'lek aret agarik o. An niniki at oba panggombereegirak nogo ti, an abu neenu aret o. Ndi, an eeke logowak nduk, unde eeppaneegerak nogo ninowe waga'lek kagak, lek arigin ti lek o. ”Yorogo logogun aret o,” yinuk, abet aret mbake agarik o.

¹³Wone kole wone kat nen in wakkagak eeke logonok nduk, yokkege nagagirak nogo porogo logot o. Keritut Yetut ninom kunik logonet, wone kole wone yi, abet mbake, ndi, aakumi kinom kunik aganake, eeke logonet, porogo logot o.

¹⁴Abe mendek unde eeppagareegerak nogo, Aberiniki ninikime menggerak nogo nen omaawi eeppagage kagak, liirogon unde logot o.

¹⁵It o Atiya menggaarak aap Pigelut kunduk, aap Eremogenet kunduk, abok aret an mbo paninuk mbaganeegwaarak nogo ti, kat keenu aret o.

¹⁶At aap Onetiporut perak, an mbuti keele maarak neegak, mbo panulik nabenak mban niniki eyak wappanege nagagerak me, at aagapuri inom abok aret ninowe inabuwa nen obeelom eeppiige logogin o.

¹⁷At o Oroma nen mbet-mbet kwaa'nabit nege logonet, kwaa'neyareegerak.

¹⁸At o Epetut logonet, yeenggwaanege nagagerak nogo kat abu keenu me, o age yobok eyom paga ninowe nen aap ti, abuwa mba'nuk obeelom eeppigin aret o.