Read Wano 2 TIMOTIYUT 4 Bible Online

2 TIMOTIYUT 4 - Wano bible

2 TIMOTIYUT 4

¹At Ala Keritut Yetut imbirak inenggaanom paga noone omaawi paga wone yi yokkiri o.

²Ala wone yoranet nege logot o. Anggon kagak, anggon lek kagak, yiyom ndiyom ugun yorage logot o. ”E o,” yuuwak nduk yorage, maluk eekwi iinok mberirage, koone yanggorogon inaruk wake, eeke logonet, kiniki yanggonak paga mamunirage logot o.

³It aap wone kole wone mamunik nogo koneniyak, ”Nineebi o,” yuurak eyom panggoni woraagin. Ndi, panggoni wage kenok, it aap ti nen, ”Wone ngge yogwe iyaamun?” yinuk, inaruk nggoonit nogo logonet, wone it inikilom mbako menggaarak mban yogwe iinok, inabu'me unggogo logogun o.

⁴It aakumi ti nogo, abe wone kenok, nomonogo mbo punuk, woneelom kenok mban mbininit nogo logogun o.

⁵Kat perak, kiniki tum wakkolage logot o. Maluk eeppagagwi iigak, kogogumbuk logonet wagangge, aap obeelom wone yoranet nugu mengga kwak, kat ndak-ndak yoranet nege, eeke logonok nduk, mippagareegwaarak nogo ndak-ndak aret eeke, eeke logot o.

⁶Wam wariyak nduk, punogo pogo mengga kwak, an nooriyak nduk, abu punogo panegaarak me, an lagi noorak eyom panggoni waga o.

⁷Nit abet mba'nuk mugurok nogwe nogo kolaawok nduk, wakkagak eeko monggoorak nogo ti, an mondok wakkagak eeke nagagirak o. ”Kuli ndi paga mbe agan mi'nari nak o,” yorogwe iinok, mbe agan mi'nari nogo mengga kwak, an abu irip paga kuli mi'nari wagi o. Nit wone abet mba'nuk mugurok nogwe nogo ti, an mondok aret porogo wonagagirak.

⁸Ndi, yogondak ninogoba nen it aakumi obeelom eekwi iinok, onggo nggare-nggare mendaarak negen makoota yippiige menggerak nogo, o age yobok paga an ambi yippanuwak nduk, paneegerak wonage o. An nowe endagembogut nen wone abe owak loongge menggerak me, an nalik yippanigin lek o. Ata, yi aakumi ndi aakumi at kin ari wage kero, tokkogwe nogo abok aret yippiyaagin o. Aakumi at abu'me piyoorak nduk, ninowe kin ari wage logonet, aakumi ineenik wonogwe inom, kambeegwaarak inom, inowak loonogo inawone amburu mbani woraagin me nduk, noone omaawi togon yokkigi o.

⁹Mbet-mbet neya woroorak mbake logot o.

¹⁰Aap Ndemat nggween paga mendek eeriyak inikilom agagerak me, mbo paninuk o Tetalonika nagagerak o. Ndi, aap Kereket o Nggalatiya nage, aap Titut o Ndalamatiya nage, eekwi iigak,

¹¹aap Lukat alik perak, nimbirak wonage o. Aap Marukut nogo nimbirak eeriyak op me, wage logonet, waganggak woraamunggun o.

¹²Aap Tikikut nogo o Epetut nappigirak me,

¹³kat wage logonet kenok, togwi yum o Terowat aap Karuput ame kagak wagagirak nogo inom, ndi, nambuku inom, ndi, mbuku pirik-perak aago nogo ti iya me, ti inom, abok aret wo'nombanok woraamunggun o.

¹⁴Aap Ikandat mbuti paga yi mendek ndi mendek ogobakkigike menggerak nogo nen nit wone yorogo monggoorak at mondok eebi lombok mbake logonet maluk iya tit eeppaneegerak me, kat kunduk maluk eeppagukwak, tum wake logot o. At eeppaneegerak nogo ti, nogoba nen onggo ndak-ndak wogorigin o.

¹⁶Aa'nduk, nawone mbaniyak nduk, noreewi ambi abu woroolik abok aret mbo paneegwaarak kwe, nowe endagembogut perak, nimbirak logonet, niniki eyak wappaneegerak. An obeelom wone yorage logowak nduk, mippaneegerak nogo ambi wuppulik tigitogon aret it aakumi endekem mendek abok aret konenuwak nduk, ”An yoraakit o,” yinuk, mi'nage neegak, nowe nen mban niniki eyak wappaneegerak. Niniki eyak wappaneegerak me, maluk eeppaniyak mbakaarak nogo wam nggwiya ambeme nen ndinggwi kwak, ndinaabeegerak. Ndi, noreewi mbo paneegwaarak nogo Ala nen maluk inoba piige kero yoge minggirak.

¹⁸Maluk eeppaniyak mbakaarak nogo abok aret mbo punuk nogoba nen nagap ndarogo at abu'me piige minggim mbogut paga time pani nagin o. ”At togop eeppanigin me, endage mondok-mondok tiyanak aret logowak o,” yinuk, amin.

¹⁹Kwe Perika aap Akwila imbirak inom, ndi, aap Onetiporut aagapuri inom, keyage wappiyaanok nduk, yokkigi o.

²⁰Aap Eratitut o Korindut time puk agagerak kwe, aap Tetopimut andi eereegerak me, o Miletit time kagak wagagirak.

²¹O mayu kumili'nggen wambi woroorak eyom awo panggoni waga'lek kagak, mbet-mbet neya woroorak mbake logot o. Aap Eyubulut kunduk, Pundenet kunduk, Linut kunduk, Kalawundiya kunduk, ndi, Ala apuri kunduk, abok aret keyage wakkaka o.

²²Ninowe endagembogut kimbirak wonage me, karum aret logogin o. Abu!