Read Wano IBERANI 10 Bible Online

IBERANI 10 - Wano bible

IBERANI 10

¹Muta wone lengganak eerit nogo nogogwaarak nogo ti, abe mendek lek kagak, eebe peebi obeelom ee'ninaburak wone yugu nogo, ogut wakkagak eeko nogogwaarak me, yi tahun ndi tahun sapi-ndomba nogo mendek mban warogo Ala wogogak mban eekaatak kwe, ti paga it wogori wogo nogogwaarak nogo obeelom ogo logolik.

²It wogori wogo nogogwaarak nogo ti paga obeelom ogo logonetak en, inomaluk inikime aberak wonage nogo, lek a'netak me, peebi ambinom warogo wogori wagak eeko logonetak lek kwe,

³sapi-ndomba amiya ti paga ninomaluk lek eerogo puurak meek o. Aberak mban wonage kenok, yi tahun ndi tahun sapi-ndomba wonok Ala wogori wagak mban eeko nogogwaarak.

⁴

⁵Togop me, Keritut nggween paga wambi woraakit nduk, at ogoba Ala yoge logonet, ”Kat yi mendek ndi mendek kat kake pugwi inom, kaango warogo wokkugwi inom, kat keebi mbake logonet, an neebe aakumi inagabolo kokwak agago panenok nduk, puunogo paneegindak o.

⁶Sapi-ndomba warogo inaani kani kumbugwi, ndi, inomaluk lek eerogo piyaanok nduk, inaanggo warogo kiri wogwe, eekwi nogo ti, kat kiniki ale'nggen mbaka'lek keegak eekwi, kage nagagirik,

⁷ai, nogoba. An eeriyak nombareegindak liiru mbanak mbuku pirik-perek aago wonage nogo, an neebe aret eerikit nduk, agarik o,” yinuk, yoreegerak.

⁸Keritut nen Ala yoge logonet, ”Yi mendek ndi mendek kat kake pugwi, kaanggo warogo wokkugwi, sapi-ndomba warogo inaani kani kumbugwi, aakumi inomaluk lek eerogo piyaanok nduk, inaanggo warogo wokkiri wogwe, eekwi ti mendek abok aret ti, kat kiniki ale'nggen lek keebi mbake keegak eekwi o,” yinuk, yereegerak nogo ti, Muta wone lengganak aret eekwi kwe kagak, yoge nagagirik,

⁹ti'nuk, ”An eeriyak nombareegindak nogo an neebe aret eerikit nduk, agarik o,” yinuk, yoreegerak ti paga, it aa'nduk eeko nogogwaarak nogo, lek eerogo punuk, obaane'me peebi alik ambi eeko logowak nduk, tiyappereegerak.

¹⁰At Yetut Keritut nogo nen at Ala eeriyak iniki mbareegerak nogo ndak-ndak aret eeke logonet, at eebe ne ambit aret Ala wogoreegerak ti paga, nit ninomaluk mondok lek eerogo punuk, obeelom agago pinanege nagagirik, nineebe Ala ake leenogo pinaneegerak.

¹¹It aap Ala unde abok aret ko'lu-kii'me kulinik-kalinik aakumi inake eeko logonet, sapi-ndomba nogo mendek mban warogo Ala wogogo nogogwaarak kwe, inomaluk lek aga'lek itok aret wonagagerak.

¹²Ndi, Keritut perak, nit abok ninomaluk mondok lek eerogo pikit nduk, ”Inake kambikit o,” yinuk, at eebe ne ambit aret Ala wogoge nagagirik, Ala eenggi abe'nggan paga kwi'nari laganeegerak logonet,

¹³Ala nen at inom wim mbanak mendek aan lebenogo abu'me tebenogo piyaawak nduk, tokkage agaarik o.

¹⁴At Ala nen at apuri at ake leenogo patiyak mbareegerak nogo, inomaluk abu lek eerogo punuk, mondok obeelom aago logowak nduk, ninake kangge logonet, at eebe ne ambit nggaruk togon Ala wogoreegerak.

¹⁵At Aberiniki nen nit yo'nirage logonet, ”An kinogoba Ala nen, Peebi eeriyak wone alik ngget mendek koonogo yokkiraagin o, yinuk, yagi o. An nen, Yogop ee'nu, ndogop ee'nu, wone lengganogo yorage minggirak nogo ti, aberak logobagip nduk, kinikime mambinagage, ndi, kobak ogwe kiyo, kinikime liiru negen mbanogo pinagage, eerigin o,” yinuk, ari nagagirik, ti'nuk, ambi ari logonet, ”It Ala wone taganogo punuk, maluk eekwi iinok, an aberak logogin lek o,” yereegerak Aberiniki nen yo'niragagerak ti paga, Aberiniki kunduk nit mbakwi ndak-ndak aret mbake menggerak kogo ogoorik o.

¹⁶

¹⁷

¹⁸Togop me, Ala wone taganogo punuk, maluk eeko nogogurak nogo muk lek eerogo pereegerak me, ambinom lek eerogo puwak nduk, nit nen ambi wogoriyak lek aret kogo o.

¹⁹Togop me noreewi o. Yum oolo tugunik nogo ti, at eebe pogom aret me, ninake kambeegerak ti paga tu ngget mendek yarogo pinanit, mage lombok minggim unggwi nage nagagirik, time mondok-mondok eenik logonet, ninake eeke wonage me, amiya wundeegerak nogo ti paga, nit togon mage lombok minggim nogome ninagabiti lek ungguurak op aret kogo ogoorik.

²⁰

²¹Nit Ala apuri ninake eekak yuwak nduk ninowe nggwok wonage me,

²²niyo abe muli-muli paga ninabin koorogo punuk, ninomaluk lek eerogo pinanemenggerak ninikime maluk abeka'lek logonet, ”Abet aret panggo yi ungguurak yegerak,” mba'nuk, niniki mondok abe paga at owagam panggo yi ungguwok o.

²³At nen, ”Ndogop eekkinabigin o,” yinuk, abok yo'niragagerak nogo, ne ambi paga alik ambi koonggak eekeelik yegetak nogo a'me aret eeke menggerak me, nit ee'ninaburak wone abet mba'nuk, waganeegurak niniki luunik wonage nogo, mondok nggirik-nggerok agago porogo logowok o.

²⁴Ndi, niniki-kiniki kunik eekwi, at ambi nen at ambi obeelom eeppegak eekwi, eeko logonet, at ambi iniki eyak wappegak eeko logowok o.

²⁵It aakumi nit Ala wone yogome ninom kuwak eekulik nogo kokwak eerugup o. Ata, niniki eyak wat-wat yogwe ti, ”Yetut woroorak abu panggo yi wage kagi,” mba'nuk, niniki aganggen kerek togon ambinom eeko logowok o.

²⁶Nit Ala yereegerak wone nineeu logonet kwe, kagak, maluk eeriyak niniki koombunuk eerit nogwe niinok, ninomaluk lek eerogo pinanuwak nduk, alik ambi warogo Ala wogoriyak lek me,

²⁷”Ala nen ninowak loonogo punuk, maluk ninoba pinanege logonet, kani eyak mondok alik paga at inom ogoorak wonogwe nogo, ineebe pup eerogo piyoorak nogo ti, nit ninom lek eerogo pinanigin kagi,” yinuk, ninagabiti mbako logowok.

²⁸Aap ambi Muta wone lengganak nogo tagangge kenok, aap mbere-kenagan nen, ”Abet aret ndogop eekerak o,” yogwe iinok, kambuwak nduk, abuwa mbaka'lek mondok warogo pogo menggaarak nogo lek a?

²⁹Togop aret eeko menggaarak me, aap ambi nen, Ala wone koonogo yo'niragagerak nogo abet mbako logowak nduk, amiya wundeegerak nogo ti, ”Abe lek o,” yinuk, Ala aput iyok kenden aambele eerogo negen pege, ndi, at ninabuwa nen obeelom eeppinanege menggerak Aberiniki nogo inom miyuk-meya eerogo pege, eeke kenok, at teppigin mbakop? Mondok lek o. Ala nen maluk onggo mondok alik negen at oba kwippege kaamunggup o.

³⁰”Aap inane'me wakwi inom, maluk onggo eeppiigwi inom, kit nen onggo eerugup o. An nen mban aret eeppiigwi logogin o,” yinuk, yereegerak inom, ndi, ambi, ”An napuri inawone amburu mbanogo inowak loonigin nogo ti, inogoba an aret o,” yinuk, yereegerak nogo inom ti, eebe ambit Ala nen mban yereegerak nineenu aret o.

³¹Ala eenik menggerak nogo nen nit maluk eekwi onggo abera'lek me ninoba pinanege kero, ninagabiti mbako logowok o.

³²Kit aa'nduk obeelom wone waganggo mbareegup, kinikime eya eekkinabeegerak me, aaninggin-paaninggin alik negen kinoba pinagagwi iigak, kinogogumbuk logonet, waganggo nogogutak nogo, abeko logonip o.

³³Mondok alik negen eeppinagago logonet, kit ando nggwok paga kinendage miyuk-meya eerogo maluk eeppinagagwi, ndi, it ando inookwi, kinagabiti mbaka'lek, inili yogwe me, kit kinom aret kinookwi, eeko nogogwaarak.

³⁴Kinoreewi ando keele maarak wonogwe nogo, inabuwa mbako logonet, yeenggwaarogwe, ndi, kinamendek ndinggola unggwogwe iigak, ”Namendek abe mondok logorak mendek alik ambime wonage aret me, op aret kolaga o,” yinuk, kiniki ale'nggen mbakwi, eeko nogogutak me,

³⁵yogondak kit kinookwi iigak, kinogogumbuk logonet wone abet mba'nuk waganeegutak nogo, mugurok nogwe kiinok, onggo nggwok wokkiraagin me, mbo puurak mage o.

³⁶At Ala nen ari logonet, ”At woroorak yereegerak nogo ti, elaambirik logonuk woraagin lek o. At mbet-mbet aret woraagin me, it an napuri obeelom eerogo piyareegirak nogo, it abet nombakwi nogo mbo pugwi iinok, an inabuwa inombarigin lek kwe, abet nombako logonet iniki noba panggombunuk wonogwe iinok perak, mondok-mondok ineenik logogun o,” yinuk, yereegerak me, Ala nen kit eeko logorak kinombareegerak nogo, abu eekwi kiinok, wokkiroorak yereegerak nogo wokkiraawak nduk, maluk eeppinagagwi iigak kinogogumbuk logonet, waganggo logonip o.

³⁷

³⁸

³⁹It aap abet mba'nuk waganeegwaarak nogo, mbo pugwi iinok, Ala nen ineebe lek eerogo piyaagin nogo kokwak, nit aap ti mendek lek o. Ata, it abet mbakwi iinok, mondok-mondok ineenik logorak nogo mendek nit aret ogoorik o.