Read Wano IBERANI 12 Bible Online

IBERANI 12 - Wano bible

IBERANI 12

¹It aap abet mba'nuk, eeko nogogwaarak yogoorak nogo ti, ”Nit eeko nogogurak nogo ndak-ndak eekwi iyaamun ilik, lek a?” yinuk, ineebe apit aago wanggerak inigen wa'ninakwi negen wonogwe me, tu mbe agan nogo logonet, ninogowa lek age kero, yi mendek ndi mendek ninoba luurik wonage nogo inom, maluk mendek kagak, nit eeriyak ninikilom mbako logonet, yilinogo pinanege menggerak nogo mendek inom, abok aret nggonenogo mbo punuk, ”Mbe agan ti kuli aret mi'nari nanip o,” yinuk, yo'niragagerak nogo mondok ninogogumbuk a'nuk, mbe agan mi'nari nogo logowok o.

²Ndi, aa'nduk nit abet mba'nuk Ala wone waawok nduk niniki pipuk eerogo pinanege, ti'nuk, abet mbakwi niinok, niniki mondok kole eerogo pinanege, eeke menggerak ti Yetut aret me, at mban ninigen loorit mugurok nogo logowok o. It aap eyo karo-karo paga nabenogo piigwi iinok, ”Aap mondok maluk mendek aret o,” yogo menggaarak nogo, at Yetut nen, ”An togop nombariyak me, neebi o,” ti mbarulik. Ata, ”Peebi nale'nggen nggwok kaagin me, yogondak we luulu togop ee'naburak op aret o,” yinuk, ogogumbuk a'nuk, eyo karo-karo paga kangge nagagirik, eenik a'nuk, Ala wone lengganogo yorage minggim Ala eenggi abe'nggam paga kwi'nari laganeegerak wonage o.

³It aap maluk eeko menggaarak nogo nen, Yetut mondok ineebi ombako logonet, maluk eeppugwi iigak, at ogogumbuk logonet, wagangge nagagerak me, kit ta'lila eekkinake kenok, kineebi eekkinake kero, at eereegerak kokwak eeko logobagip nduk, liippogo logonip o.

⁴At Yetut nogo ti, maluk eeppugwi iigak, onggo yoraga'lek iniki yanggonak paga wagangge kagak, amiya wunogo wako mbareegwa, mondok kambeegerak kwe, kit perak togop aret kinookwi kwe, kangga'lek aret ogotik o.

⁵At Ala nen, ”Yi an napuri aret o,” yinuk, kiniki eyak wappinagakit nduk, yokkirage logonet, ”Napuri wae. Kit an niniki kunik aret me, an kinogoba nen kinaruk wake, ndi, an napuri abet aret wonogwe kiinok, kiniki koonnaruwak nduk, yawi paga kinooke, eeke minggirak me, kinaruk wake neegak, Yi meek, nombakwi, ndi, kiniki koongginaburak nduk, eeke neegak, kiniki lek age, eerugup o,” yinuk, yereegerak nogo kit kobak ogotak mbaki o.

⁷Wologwe iniki koonnaruwak nduk, inogobamini nen inaruk waka'lek ambi wonogwe lek o. Tigitogon inapuri inaruk wako menggaarak me, Ala nen kiniki koongginaburak nduk, eeke kenok, ”An at aput abet aret wonage neenok nabuwa nen ee'nake kagi o,” yinuk, kiniki kwi'ndak logonet, waganggo logonip o.

⁸Nit Ala apuri kenok abok aret niniki koonnaruwak nduk, ninaruk wake menggerak me, kit ambi kinaruk waka'lek kenok perak, ”Nit at apuri lek we terak ndarak aret wonogwe kogo,” mbarumunggup o.

⁹Ndi ambi, nit ninogobamini abe nda'ninabeegwaarak nogo nen, niniki koonnaruwak nduk, ninaruk wakwi iinok, inoone liirogon konembunuk, eeko monggo kwak, at niniki lombok unde menggerak ninogoba Ala oone yo'nirage nogo, liirogon konembunuk ndak-ndak eekwi niinok, mondok-mondok nineenik logogun lek mbakop? Lek o. Nineenik logogun aret o.

¹⁰Ninogobamini abe nda'ninabeegwaarak nogo nen, ”Abe eeko logowak nduk eeppiyoorak yi aret kagi,” yinuk, iniki koombunuk, luulu ninaruk wako menggaarak kwe, ninogoba Ala perak, at maluk eeka'lek mondok obeelom menggerak nogo kokwak, nit togop ndak-ndak logowak nduk, liippunuk, niniki koonninake menggerak.

¹¹Nit niniki koonninaburak nduk ee'ninake nogo ti, niniki ale'nggen ee'ninaka'lek we tiyom paga niniki puru ari mban kogo monggoorak kwe, ”Yi op aret ee'ninake o,” yinuk, liippunuk, waganggwi niinok perak, eyoonggen abe yi'nage minggi kwak, nit togon obeelom eerit noorak mamunggolamonggoorak paga niniki ugun tayenak ale'nggen aret logogun o.

¹²Togop me, kinaganak nuk-nuk kirage logonet, kineenggi-kiniyok ndeyak eekkinake nogo kinomaawi eekkologo logomonggotik,

¹³kiniyok andi nogo abunuk andi eekkinake kero, obeelom aruwak nduk, tu abe mot-mot yarak paga nugu logonip o.

¹⁴Maluk ninikime wonage kagak, ninowe endagembogut ninigen koorak mondok meek me, yi aap ndi aap abok kinom lambunik kiniki ale'nggen logonet, maluk eeka'lek Ala ake leenak obeelom mban logonip o.

¹⁵Ala ninabuwa mbake logonet, eeppinaneegerak nogo mbo pugwi kiyo, liippogo logonip o. Iri'ngga ale warak mendek ambi mbiingga larak paga pegaatak me, mbiingga apit ale age minggi kwak, aap ambi kinenggela'me oone togop agan nege kenok, kit aakumi apit at oone konembunuk, maluk eeriyak koonggwi kiyo, liippogo logonip o.

¹⁶Aap Etau nogo nen, Ala wone taganogo punuk, iniki teeluk a'nuk ugun oone konembunuk, maluk eeriyak koonggwi kiyo, liippogo logonip o. At Etau nogo nen manggu ndarak kenok ineebe obeelom logowak nduk, wone kilirirogo menggaarak nogo, ”Nawuluk kat kilikkiruwak nduk, onggo mbi larak ti, an wo'niru o,” yoge mbareegi, wogoreegerak nogo ne ambit aret nengge nagagirik,

¹⁷ti'nuk peebi, ”Nogoba awone kili'niriyak neebi yagarak nogo, wo'niruwak lak ao,” yinuk, le ari logonet, eereegerak nogo kooniyak nduk, wakkagak mban eereegerak kwe, ”Woorak neebi,” mbareegerak me, Ala nen at eebe mbo aret pereegerak.

¹⁸Aakumi Iterali mendek puut Torotina abu'me wogo mbareegwa, kani omoonuk wunuk ari, kaluk kwiragan lagangge, o apit age, o wiya nen nombok-kombok eeke, mbuti luu'ngget oone nggwok eeke, eeke kagak, Ala oone nggwok paga yorage logonet, ”Wam a, aakumi a, puut yi abu'me woraanuk, mbaanggogwe kiinok an yugum paga mondok kinoorigin o,” yinuk, yorage mbareegi, inagabiti nen, ”Wone ambinom yo'niroorak mage ubi,” yinuk, yereegwaarak. Ndi, aakumi inagabiti mbaruwak nduk, Ala nen iya tit eeke nogo, Muta kage nagagirik, ”An kunduk nagabiti nen naganak wake agarik o,” yinuk, yereegerak. It aakumi inom, Muta inom, inagabiti mbaruwak nduk, eereegerak nogo kokwak, kit yogondak Ala owagam nogwe kiinok, togop eerigin lek o.

²²Kit yogondak puut alik Tiyon abu'me Ala eenik menggerak ame Yerutalem mbogut paga nogome aret ka nogogutak negen aret wonogwe o. It yi melaikat ndi melaikat abok kuwak eerak logonet, inale'nggen paga eekwi ineebe inom,

²³it aa'nduk abet mbareegwaarak Ala apuri ogogwaarak inendage mbogut paga liiru mbanak ineebe inom, nit abok ninawone amburu mbanogo ninowak loongge menggerak Ala nogo inom, it aakumi obeelom eeko nogogwaarak kambeegwaarak obeelom eerogo piyareegerak inogoma inom,

²⁴ndi, Ala ninom lambuniyak nduk, wone ngget koonogo ninake eeke menggerak Yetut nogo inom, time aret kuwak eerak wonogwe me, iya nogogutak negen aret wonogwe o. Kit Kaben amiya wambeegim nogome nogogutak lek o. Ata, kit obeelom eekkinaburak nduk Yetut amiya abe kilireegim nogome aret nogogutak me,

²⁵at nen wone yokkirage nogo konembunuk, mbo pugup o. Liirogon aret porogo logonip o. At nggween paga logonet, at Ala nen eeriyak mbareegerak nogo yorage mbareegi, ”Nineebi o,” yinuk, mbo pogo mbareegwa, Ala nen teppiyoolik mondok inooreegerak me, yogondak at mbogut paga wonage nogo nen wone yo'nirage nogo mbo pugwi niinok, nit teppinanigin mbakop? Lek o. Mondok ninoorigin aret o.

²⁶Tiyom paga yorage logonet, o nggween yi nogo, na'ndo-wa'ndo eereegerak kwe, yogondak perak, peebi ambi eeriyak ari logonet, ”An ne ambi paga nggween yi na'ndo-wa'ndo eeke logonet, mbogut inom togop aret eeke neyaamunggup o,” yinuk, yo'niragagerak.

²⁷”Ne ambi paga o,” yinuk, eeriyak wone yo'niragagerak nogo ti, yi mendek ndi mendek nu'lek wonage kenok teppege logonet, nuk-nuk ari kenok mbo puwak nduk, ne ambi paga yi mendek ndi mendek wakkagagerak abok aret na'ndo-wa'ndo eerikit nduk, yereegerak kogo o.

²⁸Ndi, Ala abu'me piige minggim nit unde logorak mbareegerak nogo ti, nuk-nuk arilik me, ”Ala wa,” yinuk, keyage wako logowok o. Ninogoba Ala ti, kani omoonuk nen iri'ngga mondok pup eerogo nanet nage minggi kwak aret me, ninagabiti nen ayuk wuko logonet, at eeriyak inikilom mbake nogo mban aret eerit nogo logowok o.