Read Wano IBERANI 13 Bible Online

IBERANI 13 - Wano bible

IBERANI 13

¹Kit Keritut kinom kunik wonogwe me, nabuwa-kabuwa mbakwi nogo, lek age kero, liirogon eeko logonip o.

²It aakumi nen Ala ayonggo nugu menggaarak melaikat mendek nogo ineenggo'lek logonet, inabugo lako nogogwaarak me, it aakumi nggiru kiya wogwe iinok, keyage warogo kiniki ale'nggen paga waganako logonip o.

³It aakumi keele maarak wonogwe nogo, ”An ninom keele maarak wonage kagi,” yinuk, yeenggwaarogwe, ndi, aakumi nen yawi paga inookwi iinok, andi kogwe nogo, ”An togon nagabolo nggween paga mendek me, togop aret noo'netak en, andi kaanetak o,” yinuk, iniki eyak wappiigwi, eeko logonip o.

⁴Aap ambi akwe koloorak nduk, lambumbiigwi nogo ti, maluk lek abu obeelom aret me tiyappuurak op aret o. Ndi, kolage logominggirik, imbirak nogo yuurak ti kunduk, obeelom mban aret kwe, it aap kumi kundugume wurinabit nugwi, komologwe tawe ugun wurinabit nugwi, eekwi iinok perak, Ala nen inowak loonogo maluk onggo wogoraagin o.

⁵Kit wu mban uugwe-uugwe mbarit nugwi ti mage o. At Ala nen ari logonet, ”An yeenggwagiroorak neebi mbake, ndi, mbo pinagage, eerigin lek o,” yinuk, yereegerak me, kinamendek mbuuluk wonage ti paga, ”Yi abu aret wonage o,” yinuk, kiniki tayenak logonet, ale'nggen paga nugu logonip o. Ala nen, ”An mbo pinagagin lek o,” yinuk, yereegerak wone ti paga, kiniki panggombunuk, ”Ninogoba nen yeenggwanirage menggerak me, aakumi nen an eeppanugwi nogo, an nagabiti mbarigin lek o,” yinuk, yogo logorak ti op aret o.

⁷It aa'nduk togon Ala wone yokkirogo nogogwaarak kinogobamini nogo, inoba abeko logonet, it abet mba'nuk eerit nugwi iigak, nonggop eeppiigo mbareegwa, kambit nogogwaarak nogo, liippunuk, kit togop ndak-ndak abet mba'nuk eerit nogo logonip o.

⁸Maan inom, yogondak inom, peebi inom, at Yetut Keritut alik ageelik mondok itok aret menggerak.

⁹Yi wone ndi wone alik agan wogwe nogo, konembunuk, kiniki nomonggiren nogwe iyo, liippogo logonip o. It aakumi ando nen, ”Yi mendek ndi mendek nonggo logonet, Yogop ee'nu, ndogop ee'nu,” yinuk, wone lengganak nogo eekwi paga iniki kole eekkolaga'lek we aanom warogo eerit nogwe me, kit nen yogo logonet, ”Wone ti paga niniki kole ee'ninaburak lek o. Ata, Ala nen mban ninabuwa mbake logonet, ee'ninabuwak o,” yinuk, mbako logonip.

¹⁰It ooliya wuppunuk, Ala unde logonet aakumi inake eeko menggaarak nogo nen, nit Ala aanggo warogo wogogo monggom ndomba ninake warak yi, it na woroorak mondok lek o.

¹¹At Ala unde inowe nggwok nogo nen, aakumi inomaluk lek aruwak nduk, Ala aanggo ndomba wappunuk, amiya wonok mage lombok minggim pi unggwage kagak, eebe nogo yagat endekem kani kunggo nogogwaarak nogo ndak-ndak

¹²Yetut kunduk, at amiya paga nit aakumi ninomaluk lek eerogo punuk, Ala ake leenogo pinanikit nduk, yagan warogo yagat endekem aret kambeegerak.

¹³Ndi, at o neget endekem ninake kambikit nduk nage kagak miyuk-meya eerogo pogo nogogwaarak nogo kokwak, nit kunduk ti ndak-ndak miyuk-meya eerogo pinanugwi iigak, at mugurok o neget endekem aret wundi nawok o.

¹⁴Nit niname mondok-mondok logorak nogo nggween paga yime wonage lek o. Niname alik ambime nawok nduk, we luulu tokkogo ogoorik o.

¹⁵Togop me, eyoonggen abe yi'nage minggi kwak, ”Yetut ninowe aret o,” yinuk, Keritut ninake eereegerak paga Ala aanggo warogo wogogwi negen, nit ninoone paga Ala alut eeko logonet, endage tiyappogo logowok o.

¹⁶Ndi, ti eeko logonet, Ala aanggo warogo wogogo nogogwa kwak, at ake aakumi obeelom eeppiigwi, yeenggwaarogwe, eekwi niinok, Ala inikilom ninombake menggerak me, mbo puurak mage o.

¹⁷It kinogobamini nogo ti, ”Ala nen aakumi nonggop inarum wonagandak o, yinuk, yo'niraagin,” mba'nuk, liirogon aret kiniki arum wonogwe me, inabu'me logonet, wone yokkirogwe nogo, liirogon aret konenggo logonip o. Kit nen it inoone konengga'lek wonogwe kiinok, it nen inale'nggen lek logonet, kinarum liirogon wonogwe lek paga maluk aret eekwi kiyoorak me, iniki ale'nggen paga kinarum logowak nduk, inoone liirogon aret konenggo logonet, obeelom eeppiigo logonip o.

¹⁸Ninake tamban mban eeko logonip o. Nit obeelom eeriyak mban, ”Ao,” mbako monggoorak me, yi eekak ndi eekak eeko logonet, maluk eekoorak ambi abe'naga'lek kenok, ”Obeelom mban eeko monggoorak kagi,” yinuk, mbako ogoorik.

¹⁹Ala nen an mbet-mbet kinowagam nappani woraawak nduk, nake tamban eeko logobagip nduk, ”Ao,” mbake logonet yokkiragi o, noreewi.

²⁰Ndi, yogondak abu aret o. At niniki ugun tayenak ale'nggen logowak nduk eeppinanege menggerak Ala nogo nen, wone koonogo yo'niragagerak nogo, ”Mondok-mondok eerigin o,” yinuk, abet mbako logowak nduk, ninowe ndomba mondok liirogon ndegenninake menggerak Yetut nogo, ninake amiya kili'nage mbareegi, kambunuk nogo menggam nen, eenik agago mippereegerak me,

²¹at Ala eeriyak mbake menggerak nogo, kit mondok ndak-ndak eeko logobagip nduk, yi mendek ndi mendek abe mendek kenok mban li'luk eerogo wokkirage, ndi, Yetut Keritut eereegerak paga, kit eeppinagarak inikilom mbake menggerak nogo eeppinagage, eeke logogin me, Keritut endage mondok-mondok tiyappogo logowok o, yinuk, amin!

²²Noreewi o. An wone mbuuluk lengganogo liiru mbanggiragi yi, kiniki abe paga waganggo logobagip nduk, yokkiragi o.

²³Ninore Timotiyut keele maarak wonagagerak nogo, muk piinogo pereegwaarak mbarubagip nduk, yokkiragi o. Ndi, at mbet-mbet an neya wage kenok, nimbirak aret kiya woraagun o.

²⁴It kinarum menggaarak inom, it abet mbakwi Ala apuri inom, abok aret, ”At nen wa yokkiraga,” yinuk, yoret o. Ndi, it aap o Itaali mendek ninom wonogwe nogo, ninom abok aret keyage wakkinako o.

²⁵Ala kinabuwa mbake logonet, kinarum logogin o. Abu aret yokkiragi o. Wa!