Read Wano IBERANI 2 Bible Online

IBERANI 2 - Wano bible

IBERANI 2

¹Togop me, nit Ala wone ninaruk konembunuk waganeegurak nogo, mbo punuk nomo agan nogwe niyo, ambinom nggirik-nggerok agago porogo logowok o.

²Ala nen, ”Yogop ee'nu ndogop ee'nu,” yereegerak wone nogo it melaikat nen ninombomini we konenogo mbo puwak nduk, yoroolik. Ata, mondok eeko logowak nduk, lengganogo yorogwe iigak, taganogo punuk, maluk eeko mbareegwa, Ala nen onggo mondok ndak-ndak wogoragagerak me,

³nit ninagap ndariyak wone mondok iya kooneegerak nogo, kobak eerogo punuk wonogwe niinok, nit teppinanigin mbakop? Mondok lek o. Wone ti, aa'nduk ninowe endagembogut nen aret paganogo yorage mbareegi, it koneneegwaarak nogo nen, iniki yunggup-pegak yo'niroolik inoone mondok abet aret yo'nirogwe iigak,

⁴”Wone yi abet aret o,” yinuk, waawok nduk, Ala nen ninagabiti warak mendek eeke, tam warak negen eeke, eerubok mendek eeke, eerit nage logonet, ninalitak lombok eeko logowak nduk, at Ala iniki mbareegerak nogo ndak-ndak aret Aberiniki nen tumbu'niragagerak kwe, mbo pugwi niinok, teppinanigin mbakop? Lek o. Ala nen mondok ninoorigin aret o.

⁵”Mbogut-nggween yi lek age logonet, obaane'me ngget mendek ambi ari woraagin o,” yogo monggoorak nogo ti, at Ala nen melaikat unde logowak mba'nuk, yulik.

⁶Ata, aap ambi Ala wone liiru mbanak paga nen ari logonet, ”Ai, nogoba Ala. Kat nonggop nduk, nit aakumi ninoba abeke menggendak o? Aakumi aret kwe, nonggop nduk, liippinanege menggendak? Mbo pinaniyak op aret kwe,

⁷ninendagembogut abu tiyanak ninayuk warak logowak nduk, koongge, kat yi mendek ndi mendek wakkagagindak nogo, nit mban unde logowak nduk, mippinanege, ndi, yi mendek ndi mendek abok aret nit mban ninabu'me logowak nduk, pege, eereegindak kwe, we yogondak luululuk it melaikat tiyanak wonogwe iigak, nit aakumi tebenak logowak nduk, kooneegindak o,” yinuk, yereegerak nogo ti, yi mendek ndi mendek nit aakumi ninabu'me pege logonet, ambit iluk ambi ninabu'me logorak lek ti mbarulik. Ata, abok aret ninabu'me logowak nduk kooneegerak nogo, liiru mbaneegerak kwe, yogondak yi paga ninabu'me wonage lek o.

⁹At Yetut perak, tiyanak mondok ayuk warak wonage kogo ogoorik o. At Ala ninabuwa mbake menggerak me, melaikat tiyanak iigak, aput nen ninalitak lombok ninake kambuwak nduk, ne ambit luulu tebeppege mbareegi, nggween paga wambi wage nagagirik, ninake kangge logonet, andi-pandi kagak waganeegerak ti paga, aap ambi amendik-amendek li'luk eeppogo mengga kwak, Ala nen at aput totop aret ayuk wurogo tiyappereegerak wonage agaarik o.

¹⁰At yi mendek ndi mendek abok aret wakkage nagagirik, unde menggerak Ala nogo nen, ”Napuri apit ninom ndak-ndak tiyanak logowok o,” yinuk, ninagap ndaruwak nduk, ninowe nen wo'niren noorak nogo, abut mbangga'lek kagak wo'niren noorak meek me, at kunduk iniki kole aruwak nduk, ”Aa'nduk abut mbanikit o,” yinuk, andi-pandi eerogo at oba puurak kooneegerak nogo ti, op aret kooneegerak o.

¹¹At Yetut nen ninomaluk lek eerogo punuk Ala ake leenogo pinanege menggerak nit inom, at inom, ninogoba Ala ambit aret me, ninowe Yetut nen, ”Nawuri o,” yinuk, yo'niroorak agabiti mbaka'lek logonet,

¹²”Ai, nogoba o. Kat eeke menggendak nogo an nawuri yorage, ndi, kat kapuri kuwak eeko menggaarak inenggela'me logonet, kalut eeke, eeke logogin o,” yinuk, yoge,

¹³ndi, ambi ari logonet, ”An niniki koba panggombunuk logonet, eerit nage logogin o,” yinuk, yoge, ndi, ambi, ”Kapuri inarum logowak nduk, unde eerogo mippaneegindak nogo ninom wonogwe yi, niyet o,” yinuk, yoge, eeke menggerak o.

¹⁴At Yetut ti, aap a'nuk kambemenggerak paga, at kanggwi alom unde menggerak Ibilit nogo tebenogo punuk, it kambuurak inagabiti nen, ”Nabelan-kabelan aruwok lak piriguru agan wagagerak yi ao,” yinuk, iniki mondok aaninggin ndugu agan koonit nugu logonet, iniki wakko'net nugwi nogo, teeluk eerogo piyaakit nduk, nit at apuri nineebe nggween paga kanggo monggoorak mendek ndak-ndak aret eekkolagagerak.

¹⁶At eereegerak nogo ti, it melaikat mendek yeenggwaaraakit nduk eerulik o. Ata, at Abarakam ombowologwe yeenggwaaraakit nduk, eereegerak me,

¹⁷nit maluk eekwi niinok, Ala iniki yanggo yuwak nduk, Ala unde logonet, ninabuwa nen puk aga'alek ko'lu-kii'me ninake eeke logowak nduk, nit ee'ninake menggerak nogo, abok aret at ndak-ndak eeriyak age mbareegi, aa'nduk at awuri nit pogom aret eekkolagagerak.

¹⁸At iniki nggagangge kagak, iniki lek agagerak kwe kagak, ogogumbuk nu'lek logorak mamunggolagagerak me, yogondak nit niniki nggagani wage kenok, ninake eeke logonet, yeenggwanirage wonage o.