Read Wano IBERANI 9 Bible Online

IBERANI 9 - Wano bible

IBERANI 9

¹Wone aa'nduk koonogo yoragagerak nogo eeko logonet, ”Ala alut eeriyak kenok, togop aret eeko logonip o,” yinuk, wone lengganak inom, eeko menggam aakumi nen o wureegwam nogo inom, wonagagerak.

²Ala unde nen eeko logowam ooliya negen wuko logonet, ko mbere ogooreegwaarak. Ko endekenggwe ogoorak ti, mage negen minggim yogo nogogwaarak me, ndi wuninogo pegak ogobakkigirik inom, roti mbi Ala ake pogo nogogwaarak eyo ndoonak inom, time aret wonagagerak.

³Ndi, yum endekem tugunik kagak ko oolo akenggwe ogoorak me tugunik nogo ti, mage lombok minggim yogo nogogwaarak me,

⁴kemenyan obari abe mendek kunggo menggam mbuti emas paga ogobakkigirik nogo, time aret wonagagerak. Ndi, togolowak mbuti emas paga ogobakkigirik me, mbi mbogut paga mendek wurabi wagagerak nogo, ando yonggolak inom, aap Karun owaanggun paga agarip wundeegerak nogo inom, ndi, Ala nen wone yugum paga liiru mbanogo Muta wogoreegerak nogo inom, abok aret Ala aloobut mbanak enaagan-ambokan mbuti emas mban nabenak wonagagerak nogome yonggolak o akenggwe mage lombok minggim time aret wonagagerak.

⁵Ndi, Ala ninom wonage negen mbaruwak nduk, Ala yonggo nugu menggaarak mendek inendage kerub aakumi wiirogwe nogo, aakumi inomaluk lek eerogo punuk, Ala inom lambungge minggim aloobut mbanak irimbaga inenaabit wiganak wonogogwaarak. Wone ti mendek ando apit mbininogo yokkiroorak kwe, ando kagak nggaruk togon ti aret yokkiragi o.

⁶Ooliya wurik ko ogoorak nogome togop aret ndigik-ndegek aago wonagagerak me, it Ala unde nogo, abok aret Ala ayuk wuko logonet eeko menggaarak nogo nen, eeko logowok nduk, ko endekenggwe nogome ko'lu-kii'me unggwi nogo nogogwaarak kwe,

⁷ko ore akenggwe ogoorak nogome perak, at Ala unde inowe nggwok nogo mban tahun ambi eeppunuk, ne ambit paga mban unggwagak eeke nagagerak. Ndi, eeke logonet, we unggwage logolik o. Ata, at omaluk onggo inom, oreewi nen, ”Nit maluk eerulik,” mbakwi iigak, Ala nen maluk eekaarak inombake kero onggo inom, inake amiya kilirik wonok mban unggwagak eeke nagagerak.

⁸Ti eeke nagagerak paga Aberiniki nen paganogo yo'nirage logonet, Ko endekenggwe lek aga'lek awo eekwi wonogwe me, ko akenggwe mage lombok minggim nogome tu paarogo pinanega'lek awo narak wonage nineenu aruwak nduk, yo'nirage o.

⁹Ooliya wurik me eeko nogogwaarak nogo ti, eebe yogondak kin agaarak eekwi yi, ogut wakkagak aret eeko nogogwaarak me, yi mendek ndi mendek Ala ake pugwi, Ala aanggo warogo wogogwi, eeko nogogwaarak kwe, it wogori wa'nuk, ”Nomaluk abu lek eerogo punuk, obeelom agago panegi o,” yinuk, iniki ale'nggen logolik. Ata, inomaluk aberak aret wonogogwaarak ti paga we ogut wakkagak negen aret eeko nogogwaarak me

¹⁰it yi mendek ndi mendek Ala wogori wogo nogogwaarak nogo ti, ineebe op logorak nduk, ”Mbi inom, niyo inom, ndogop eerogo punuk nunggwi, kinabin ndogop eerogo kookwi, eeko logonip o,” yinuk, wone yugu kagak alik eeko nagaatik, onggo pi wagak eeko nogogwaarak me, peebi wone ngget mendek kin ari wage kenok, lek eerogo puwak nduk, eeko nogogwaarak kwe,

¹¹Keritut perak, ninowe nggwok Ala unde logonet, Ala nen mondok alik negen obeelom eeppinaniyak kooneegerak nogo, eeppinanikit nduk wage nagagirik, Ala nen yi mendek ndi mendek nggween paga ogobakkigirogo pereegerak nogo mendek aakumi nen kuwak eeppunuk wureegwam nogome eekeelik o. Ata, at o alik nggwok mondok abe lombok wurik nogome unggwi nage nagagirik, ninake eeke agaarik o.

¹²Ndi, at yum oolo ogoorak kagak mage lombok minggim unggwi nage logonet, wam sapi inom, ndomba inom, amiya wonok unggulik o. Ata, at amiya lombok wonok ne ambit aret pi unggwage nagagirik, nit mondok-mondok ninagap ndarak logowak nduk, ninonggo mbanogo pereegerak.

¹³It aakumi eeriyak mage yugu kagak, ugun eeppunuk sapi inom, ndomba inom, amiya wonok wogwe, ndi, it aap lu pigaganggaatak inoba kooka'lek iinok, Ala nen inooke kero inoba koo'naruwak nduk, sapi warogo kani kumbunuk, wun waganogo inagabolo paga yumbunogo piigwi, eekwi iinok, ineebe obeelom ogo nogogwaarak nogo kokwak,

¹⁴Yetut amiya ti perak, iya lombok me, ninomaluk koo'ninaburak meek mbakop? Lek o. At mondok itok menggerak kwe, iniki nen nit ninake wam ndomba eeruwak mondok obeelom nogo pogom, at eebe aret Ala wogoreegerak me, yogondak nit Ala mondok eenik itok menggerak nogo, ake eeko logowok nduk, wone aa'nduk aanom warogo mugurok nogwe niigak, ninomaluk lek aga'lek abe'nagak mban eeke wonage nogo, at amiya paga lek eerogo punuk, mondok obeelom eerogo pinaniyak op aret mbako logowok o.

¹⁵At togop eereegerak me, at Ala nen wone aa'nduk lengganogo yoragagerak nogo, eerit nogo logonet, ndak-ndak eeka'lek taganogo punuk, maluk eeko mbareegwa, keele maarak negen wonogwe nogo, inonggo mbanogo punuk wondet aago nugu logowak nduk, inake aap ambi muk kambeegerak me, Ala nen, ”Yi mendek ndi mendek mondok logorak mendek wokkiraagin o,” yinuk, yonggo piyareegerak nogo nen, wone alik wappunuk, eerit nogwe paga waawak nduk, Keritut nen wone alik ngget mendek koonogo yo'niragagerak.

¹⁶Aap ambi nen, ”An kangge neenok neyate it ndogop-ndogop mban kolaawak o,” yinuk, liiru mbanogo pegetak kwe, kanggetak liirogon ineenggo'lek kenok, ineyate tumburirogolik o.

¹⁷At liiru mbanogo pegetak nogo awo eenik wonage kagak, ”Togop koloorak o,” yinuk, liiru mbanak nogo ti, tumburirogolik o. Eebe kangge kenok perak, tumburirogo menggaarak me,

¹⁸wone aa'nduk Ala nen koonogo yoragagerak nogo, amiya werenogo piyoolik ta lek o.

¹⁹Ata, at Ala nen, ”Yogop ee'nu, ndogop ee'nu,” yinuk, wone nogo abu yoge mbareegi, it Yakuri nen eebe aret eeko logowak nduk, Muta nen wone nogo abok aret mbininogo yorage nagagirik, sapi-ndomba amiya niyo inom tooppunuk, ndomba eeruwak maa'ngga warak tamonogo yigirok paga kumbunuk, mbuku liiru mbanak paga inom, aakumi ineebe paga inom, abok aret werenogo nagabit nagagerak.

²⁰Nagabit nage logonet, ”Kit, E o, yinuk, eeko logobagip nduk, Ala nen wone koonogo yokkiragaarak yi, abet aret eerigin mbako logobagip nduk, amiya yi kinoba werenogo pinagagi o,” yinuk, yoragagerak ti paga, wone aa'nduk eeko nogogwaarak nogo ti, amiya kilippunuk mban eeko nogogwaarak kogo ogoorik o.

²¹Ti eeppege nagagirik, ooliya wurik inom, Ala alut eeko logonet, eeko menggaarak yi mendek ndi mendek inom, abok togop aret amiya werenogo pereegerak.

²²Muta wone lengganak nogo ndak-ndak eeko logonet, yi mendek ndi mendek abok aret amiya paga mban obeelom age menggerak me, amiya kilika'lek kenok ti, ninomaluk lek eerogo puurak lek aret kogo ogoorik.

²³Mbogut paga eeko logorak ogut wakkagak eeko nogogwaarak yi nogo ti, obeelom aruwak nduk amiya paga togop aret kooppunuk eeko nogogwaarak kwe, mbogut paga nen eeko logorak yi mendek ndi mendek ti perak, iya me, obeelom aruwak nduk, sapi-ndomba amiya paga kooriyak meek o. Ata, amiya omaawi alik mendek paga kooriyak perak op.

²⁴Togop me, Keritut nogo ti, o abe wurik kagak ogut wakkagak mage minggim aakumi nen wureegwam nogome unggulik o. At mbogut paga lombok unggwi nage nagagirik, Ala enggaanom paga ko'lu-kii'me ninake eeke agaarik o.

²⁵Ndi, Ala unde inowe nggwok nogo nen mage lombok minggim nogome unggwi nage logonet, at amiya wonok unggwagak eeke logolik o. At sapi-ndomba amiya nogo mban wonok tahun ambi eeppunuk ne ambit paga unggwagak eeke nagagerak kwe, Keritut perak, kulinik unggulik o.

²⁶At Ala unde inowe nggwok nogo nen sapi-ndomba amiya wonok tahun ambi eeppunuk unggwagak eeke nagagi kwak, Keritut nen at amiya paga togop eeke logonetak en, at o wakkagagerak kuli nen nok, yogondak kuli yagan wakak mban eeke logonetak kwe, at amiya paga yi maluk ndi maluk abok aret lek eerogo pikit nduk, o age yobok yogondak panggoni wage yi paga, ”Inake kambikit o,” yinuk, wambi wage nagagirik, ne ambit paga ninake yagan warogo kambeegerak.

²⁷Nit aa'nduk kanggo logomonggoorik, ti'nuk, peebi kambugun lek o. ”Ne ambit mban kanggo logomunggup o,” yinuk, at Ala nen kooneegerak me, ne ambit kanggwi niinok, Ala nen ninowak loonigin nogo ndak-ndak,

²⁸Keritut kunduk, yi aakumi ndi aakumi abok ninomaluk lek eerogo pikit nduk, wage nagagirik, ne ambit paga ninake kambeegerak me, peebi wage logominggirik perak, ninomaluk lek eerogo pinanikit nduk, woraagin lek o. Nit abok at woraawak nduk, tokkogwe nogo ninagap ndarogo wo'niren nawak nduk woraagin o.