Read Wano YAKOBUT 3 Bible Online

YAKOBUT 3 - Wano bible

YAKOBUT 3

¹Nowe-nawot o. Ala ninowak loongge logonet, aaninggin nggwok nit aakumi mamuninako monggoorak ninoba pinanigin nineenu me, kit abok aret, ”An ngguru logokit o,” mbarugup.

²Nit abok aret maluk eeko monggoorak o. Nit ninoone yogootak paga irip paga maluk age logonetak lek en, nit mondok obeelom logonet, nineenggi-niniyok paga maluk eeriyak ee'ninake nogo, abok aret tebenogo pogo logonetak o.

³Wam wogoren nogo logonet, keeluwi obaak paga mbarembunuk nit noorak mbako'nom nogome wogoren nogo monggoorak.

⁴Ndi, yiiro kunduk nggwok lombok me, o wiya omaawi wake logonet, wonok nage menggerak kwe, to unde pilot nogo nen, ”Ndime noorak,” mba'nuk ogobak koonggak yuurak nduk eyo abu mbuuluk akom paga pugunik menggerak nogo paga nomonogo nappege menggerak.

⁵Ti pogom ninamili aret o. Nineenggi-niniyok nggwok kagak, ninamili mbuuluk nogo nen yogootak paga ndugwi nggwok wigak ari menggerak. Kani anggen mbuuluk nen, takkani nggwok nengge menggerak nogo abe'nip o.

⁶Ninamili ti kani pogom aret o. Yi maluk ndi maluk anebunu abok aret alom ti, ninamili aret o. Ninamili ti, nineebe ando aret me nineebe apit aret maluk eerogo pinanege menggerak. Kani moonu'me nen kani anggen wonok ninamili paga wuninogo pi wagaatak paga, nit aakumi nggween paga mendek eeko monggoorak abok aret eerit nogo logonet, maluk mban eerit nogo logowak nduk, ninoba wuninogo pinanit nage menggerak alom ti, ninamili aret o.

⁷Towepagi nen, ndimbu-nggwiya nen, woret-waalo nen, yibut-yikwe nen, yi mendek ndi mendek ogobakkigirik nogo abok aret pigogo owaanggo eeginako menggaarak me, owaanggo eeginaburak op aret kwe,

⁸ninamili perak, yonggonogo owaanggo eeriyak meek o. Ninamili ti abu maluk, aakumi inooriyak nduk iri'ngga magagirak nogo pogom mondok yagabit agago wonage me, tebenogo puurak meek aret o.

⁹Ninoone peenok paga ninogoba Ala alut eekwi, ndi, peenok paga aakumi Ala etenggen ndak-ndak ogobakkigirogo piyareegerak kagak, kugi pulunogo piigwi, eeko monggoorak.

¹⁰Ninambe ambit me nen wundi wage logonet, ale'nggen inoba piigwi, ti'nuk, kugi pulunogo piigwi, eeko monggoorak me, togop eeriyak abu mage o, noreewi togon, ai.

¹¹Niyo eneeri ambit me nen ambi mili wundi wage, ndi, ambi nggut wundi wage, eeke kogo monggotak mbakop?

¹²Ndi, woromo nen tawi yege, tawi nen woromo yege, eeriyak op mbakop? Ndi, niyo nggut nen niyo mili wundiyak op mbakop? Togop mondok eekeelik o, noreewi.

¹³Kit aap ambi kinenggela'me iniki warak logonet, yi mendek ndi mendek mbet-mbet yelok kage menggerak kenok, aap ti iniki warak kogo monggotak me, iniki tebenak logonet, obeelom eerit nage kinigen kogo logobagip nduk, eerit nage logowak o.

¹⁴Kit kiniki warak aret kwe, kinoreeluk ambi anini eeppogo logonet, worokot linik agan nugwi, ”An koongge mban eeriyak,” mbako logonet, agan nugwi, eekwi me, kiniki wogoppatiyak mage o. Ala ari menggerak wone kagak, abut laganggwi me, pilit pugunit nugwi aret o.

¹⁵Kit kinoreeluk ambi anini eeppogo logonet, worokot linik agan nugwi, ”An koongge mban eeriyak,” mbako logonet, eerit nugwi, eekwi kiinok, abu naalop-kaalop age logonet, yi maluk ndi maluk abok aret age kogo monggoorak nogo ti, at iniki warak agi menggerak Ala nen koonogo pinagage kagak eekwi lek o. Ata, at Ibilit nen it aakumi nggween paga mendek iniki koonogo piige kagak, iniki nengge kenok, eeko menggaarak aret eekwi kiigi o.

¹⁷Ndi, at agi iniki warak menggerak nogo nen koonogo pinagage nogo ti, nit kikak naka'lek obeelom mban wonogwe, ugun logowak nduk, mage yorogwe, niniki yanggonak paga yorogwe, yo'nirogwe iinok, ”E o,” yinuk eekwi, aakumi inabuwa nen obeelom eeppiigwi, eyoonggen abe yi'nage minggi kwak, nit togop aret obeelom eerit nugwi, aap ambi obeelom eeppugwi, ambi maluk eeppugwi, eeka'lek ndak-ndak eeppiigwi, niniki laakot logonet yoraga'lek abe yanggonak paga mban yorogwe, eeko logowak nduk, ee'ninake menggerak aret o.

¹⁸It aakumi iniki lambumbiinet nugu menggaarak nogo nen iniki lambunik logowak nduk eeppiinet nugu logonet, awi anggen yako mengga kwak, aakumi obeelom mban eeko logowak nduk, inikime mambiinet nugu menggaarak o.