Read Wano YAKOBUT 4 Bible Online

YAKOBUT 4 - Wano bible

YAKOBUT 4

¹Kit ndugwi pugwi, wone wakwi, eeko monggotak alom ti ngge paga o? Kiniki nengge alom abok aret, ”An nduk eeriyak, kat nduk eeriyak,” kinikime nen nili-gili yogwe logonet, eeko monggotak nogo lek a?

²Yi mendek ndi mendek woorak kiniki nengge kwe, woorak meek age kenok, aap aret wako monggotak. Ndi, yi mendek ndi mendek uugwe mbakwi kwe, wagangga'lek kenok, wone wakwi, ndugwi pugwi, eeko monggotak. Kit uugwe mbakwi nogo, Ala nggino yoga'lek me, wagangga'lek aret ogotik o.

³Ndi, kit ando nen Ala nen wokkiraawak nduk nggino yogo monggotak kwe, kiniki nengge nogo mugurok nogo logonet, lek eerogo patuwok nduk, kiniki abu alik koombunuk yogwi me, wokkiraagin mondok lek o.

⁴Kwe ambi nen aap ambik waganakak eeke minggi kwak eeko monggotak yi, it aakumi nggwen paga eeko menggaarak mendek kinom kiniki kunik eekkologwe kiinok, Ala kinom ogookkologwe nogo kineenggo'lek me eeko ogotik? Togop me, aap ambit-ambi, ”It aap nggween paga eeko menggaarak mendek ninom kunggola o,” mba'nuk, eeke kenok, Ala imbirak ogookkolage menggerak aret o.

⁵”Ala nen Aberiniki ninikime mambinaneegerak wonage kagak, niniki nengge nogo mugurok nogwe niinok, Aberiniki nogo nen, Ao, yinuk, iniki wakkolage menggerak o,” yinuk, Ala wone liiru mbaneegerak nogo ti, we mbaneegerak mbakop?

⁶Aberiniki iniki togop aret wakkolage kagak kwe, maluk mbo puwak nduk, Ala iniki kunik en nggwok aret eeppinanege menggerak. ”It aakumi iniki wogoppako menggaarak kenok, Ala nen tebenogo piige menggerak kwe, iniki tebenak menggaarak kenok perak, Ala iniki kunik en eeppiige menggerak o,” yinuk, Ala wone liiru mbanak wonage o.

⁷Togop me, Ala abu'me tebe yinip o. Ala abu'me tebe yinuk, wonogwe me, Ibilit maluk eekkinabi wage kenok kole mbaganuwak nduk, kinom wim perenggologo logonip o.

⁸Kit Ala abu'me kuwak ari wogwe kiinok, at kinarum aret logogin o. Kit maluk eeko monggotak yi, kineenggi kookwi, ndi, kiniki mbere yi, ambit eeppunuk kinomaluk mbo pugwi, eeko logonip o.

⁹Kiniki puru ari logonet, le yogo logonip o. Kit i'ndok kanggwi, kinale'nggen yogwe, eekwi ti mbo punuk, kiniki puru ari logonet, leenggu maako logonip o.

¹⁰Ala abu'me kiniki tebe yinip o. Tebe yogwe kiinok, at nen kit aret tiyappinagagin o.

¹¹Nowe-nawot o. Nabok-kabok yuurak mage o. Kit nen kinowe-kinawot inabok mbanggwi, inowak loonggwi, eekwi ti, ”Ala nen wone lengganogo yo'niragagerak ti maluk yereegerak o,” yinuk, eeko logonet, Ala aret owak loonggwi negen eekwi me, kit wone lengganak eeka mendek lek o. Kit Ala owak loonggo monggotak mendek aret kinombakwi me, togop eerugup o.

¹²Wone lengganogo yo'niragagerak nogo, owak loongge menggerak nogo ti, at Ala alik aret o. At alik en ninagap ndake, lek eerogo pinanege, eeriyak op aret kwe, kit Ala kokwak eekko'nok kinowe-kinawot owak looniyak nduk eeko ogotik ya? Mage o, noreewi.

¹³Ndi, wologo wae! Kit wone mbanggo logonet, ”Yogondak a, ko'lu a, o koota time nogo logomonggoorik, wu kuwak eekkolaawok nduk, yi mendek ndi mendek kunit nugwi niigak, 1 tahun aruwak o,” yinuk, yogo monggotak nogo, kinaruk logonip o.

¹⁴Kit ko'lu eekkinaburak nogo, kineenggo'lek logonet yogwe kiigi o. Nineenik wonogwe nogo ti, laago aagi pogom aret o. Laago aagi nogo ti, ne ambit lagangge ninigen kogootak kwe, lek age menggerak kokwak ti, nineebe togop aret ee'ninake menggerak o.

¹⁵Kit nen yogo logonet, ”Ninogoba nen koonogo yo'nirage kenok nineebe op logonet, Yogop eeruwok, ndogop eeruwok,” yogo logorak perak op o.

¹⁶Ko'lu eeriyak kineenggo'lek kagak, nineenu negen eekko'nok wogoppakwi ti, maluk aret eekwi kiigi o.

¹⁷Ndi, kit obeelom eeriyak kineenu logonet kwe eeka'lek kiinok tirogon maluk aret o.