Read Wano YAKOBUT 5 Bible Online

YAKOBUT 5 - Wano bible

YAKOBUT 5

¹Kit aap kineenggi warak yi, kinaruk logonip o. Kit andi yagan wako logorak eyom panggoni wage me, kinaleenggu maakkologo logonip o.

²Kinamendek ambik nogo ti maluk age, kinayum abe nogo ti, ambeya nibinogo pege,

³kinawu mbuti emas inom, perak inom, ogobakkigirik nogo ti muk yi'mbaani kunit nage, eerit nage agaarik o. Kinawu yi'mbaani kunogo pegerak ti paga nggilimi negen kumaappatogo wonogogutak nogo kin arigin o. Ndi, yi'mbaani kunogo pit nage minggi kwak, kit kinagabolo togop aret kani nen nenet nagin. O age yobok abu panggoni wage kagak kwe, yi mendek ndi mendek kiniki kundugu kuwak eerogo pako nogogutak me, kinenggali nen leenggu maakkologo logomunggup o.

⁴It kineyabu eeppinagagaarak nogo, onggo ndak-ndak wogorogo mengga'nde eeko nogogutak me, it inoone mumun kokop yokkirogwe iyaanip o. It ando anggen yugu wonok kira wogwe nogo kunduk, inoone yogwe ti, ninogoba aap waka'ngget pogom wonage nogo, muk aruk konengge agaarik o.

⁵Kit nggween paga mondok obeelom mban logonet, kinikilom kenok mban eerit nogo nogogutak. Wam amok warak age kenok wariyak nduk, mbi abuk nggininogo wogorogo mengga kwak, kit yi mendek ndi mendek amburu warak mban na mbarit nogwe paga kinamok warak eekkologwe me, kinoorigin aret o.

⁶It aakumi iniki obeelom nogo nen wone onggo yokkiraga'lek iigak, kit nen mban pilit wone inoba piinok, inooko nogogutak o.

⁷Togop me, nowe-nawot o. Ti eeppinagagwi nogo koonuwak nduk, ninogoba woraagin me, kiniki kwippunuk logonip o. Aap ambi nen mbi awi yappege nagaatik, mayu kage, kibi kage, eeke logonet, kole aruwak nduk iniki kwippunuk, tokkage menggerak nogo liippinip o.

⁸Ti kokwak, kit kunduk kiniki kwippunuk logonip o. Ninogoba woroorak eyom abu panggoni wagaarak wonage me, kiniki nu'lek eeppatinuk logonip o.

⁹Nowe-nawot o. Ala nen maluk onggo eeppinagi wage kero, kiniki laakit-laakot mbako logonet, at ambi abok mbanggak eerugup o. Ninowak loongga nogo ti, muk tu ngga'nggi paga panggoni wagaarak wonage yi kaanip o.

¹⁰Wologo wae! It aap Ala nen yorage kagak wone yorogo nogogwaarak nabi-nabi nogo piyak-payak eeppiigwi iigak, iniki kwippunuk inogogumbuk logonet waganggo nogogwaarak nogo kwak, kit ndak-ndak aret inogut wakkagak eeko logonip o.

¹¹It aaninggin inoba age kagak inogogumbuk logonet waganggwi iinok, Ala ale'nggen inoba piige nagagerak nogo nineenu aret o. Aap Ayup kunduk aaninggin oba age kagak wagangge nagagerak nogo ti, muk koneneegutak o. Ala aakumi abok inabuwa nen obeelom eeppiige menggerak me, aap Ayup aaninggin oba age kagak iniki kwippunuk abu wagangge mbareegi, ti'nuk, Ala nen irip paga eeppereegerak nogo ti, kineenu aret o.

¹²Togop me, nowe-nawot o. Ala endage we lek me ugun yuurak mage o. Mbogut endage inom, nggween endage inom, yi mendek ndi mendek endage abok aret kumbunuk, ”Yokkiragi o,” yinuk, yoroorak mage o. Kit maluk yogwe paga Ala onggo kinoba pinagage kero, ”E o,” mbake kenok, ”E o,” aret yuurak. Ndi, ”Lek o,” mbake kenok, ”Lek aret o,” yuurak. Wone iya lombok nogo ti aret yokkiragi o.

¹³Aap ambi kinenggela'me nen aaninggin-paaninggin oba age kenok, tamban eekkolage logowak o. Ndi, ambi iniki ale'nggen mbake kenok, Ala endage tiyappege logowak.

¹⁴Ndi, ambi kugi andi eeke kenok, aap Ala apuri unde woraawak nduk, wiirage logominggirik, wogwe iinok, amburu oba mbenambunuk, Ala endage kumbunuk, ake tamban eeko logowak o.

¹⁵Ndi, iniki Ala oba panggombunuk, tamban eekwi iinok, ninogoba nen aap andi nogo agap ndarogo omaawi aret nege logowak nduk, obeelom eeppigin o. Ndi, at maluk eereegerak kenok, omaluk ti inom aret lek eerogo pigin o.

¹⁶Togop kenok, kit maluk eeko monggotak nogo, at ambi enggaanom paga paganggwi, at ambi nen at ambi ake tamban eekwi, eeko logomonggotak paga kugi andi eekkinake kenok, obeelom eekkinake logogin o. Aap ambi maluk inikime lek logonet iniki koonak paga oone mondok nabek togon tamban eeke kenok, Ala nen mbo pigin lek o. Aruk konenigin aret o.

¹⁷At aap Eliya ti, nit pogom ndak-ndak aret kwe, ”Mayu woraagun o,” yinuk, oone nabek togon tamban eereegerak me, mayu nggween paga wambi waga'lek kagak 3 tahun eeppunuk, tut 6 peneneegerak.

¹⁸Ti'nuk, peebi tamban eeke mbareegi, mayu nogo mondok lubu-lubu wambegeerak me, iri'ngga awi yarak nogo mbilangge nagagirik, anggen yi'nagagerak.

¹⁹Nowe-nawot o. Aap ambi Ala oone koneniyak, ”Neebi o,” yinuk, nomo agan nage me, kit ambi nen aap nogo iniki yanggombunuk wonok wogwe kiinok,

²⁰Ala nen yokkirage logonet, ”Aap ti maluk eeke menggerak nogo mbo punuk, an noone woorak nduk, iniki yanggombunuk wonok wogotak paga, aap ti kambunuk nogo menggam nage me, omaluk lek eerogo agap ndaruwak nduk, eekotak me, op aret eekotak o,” yinuk, yokkiraagin.