Read Wano 2 PETERUT 1 Bible Online

2 PETERUT 1 - Wano bible

2 PETERUT 1

¹At ninagap ndakak ninowe Yetut Keritut Ala aret nogo nen, nit obeelom eerogo pinanikit nduk, eereegerak paga wone abet mba'nuk, waganeegurak niniki kunik porogo wonogwe nogo, kit ninom ndak-ndak waganeegurak me, an Timon Peterut Yetut Keritut ayeloman nappiigak mendek agago mippaneegerak nogo nen, kit abok wone ambi yokkira o.

²At ninogoba Ala ninowe endagembogut Yetut Keritut imbirak iniki kunik nen wo'nirogwe, niniki ugun tayenak logowak nduk eeppinanugwi, eeko menggaarak kwe, it eeko menggaarak mondok liippunuk waganggwi kiigak, nggwok togon eeppinagago logowak nduk, Ala nggino yoge minggirak.

³At abu obeelom mondok tiyanak menggerak nogo ninom ndak-ndak logowak nduk, ninayonggo pinaneegerak nogo nen eeke menggerak liippunuk waganggwi paga, nit nggween paga yime logonet, maluk eeka'lek obeelom mban eerit nogo logowak nduk, at Ala omaawi eeppinanege menggerak.

⁴At Ala abu obeelom mondok tiyanak menggerak me, at oone mondok iya iniki kunik nogo mendek, ”Onggo lek we aret eeppinagagin o,” yinuk, yo'niragagerak wone nogo ti, it nggween paga mendek iniki nen nengge mendek nogo mugurok nogwe iinok, lek eerogo piige minggi kwak, nit togop ndak-ndak ee'ninake kero, ninagap ndarogo pereegerak me, nit wone ti mugurok nogwe niinok, at Ala iniki koonak minggi kwak, nit niniki ndak-ndak logowak nduk, yo'niragagerak.

⁵Ti kenok, kit kiniki Ala oba panggombunuk abet mbakwi nogo paga obeelom eerit noorak liippunuk mamunggologwe, ndi, obeelom eerit nogwe paga yi eeriyak ndi eeriyak kineenu eekkologwe,

⁶ndi, kineenu ogwe nogo paga nen kiniki warak eekkologwe, ndi, kiniki warak eekkologwe nogo paga maluk eeppinagagwi iigak, kiniki kwi'ndak nu'lek logorak mamunggologwe, ndi, kiniki kwi'ndak nu'lek wonogwe nogo paga Ala kinagabiti eeppunuk, ayuk wuriyak mamunggologwe,

⁷ayuk wukwi nogo paga kinoreewi inabuwa mbariyak mamunggologwe, ndi, inabuwa mbakwi nogo paga, irip paga aakumi abok aret kinom kiniki kunik eekkologwe, we, eerit nogo logonip o.

⁸Ti eeko logorak nogo mendek abok aret nggwok togon eerit nogwe kiinok, aakumi nen, ”Inowe Yetut Keritut ineenu kwe, anggen alik mendek yi'nage kiraap!” yinuk, yogo logogun lek o. Ata, ”Yetut Keritut abet aret ineenu me, anggen obeelom mendek nggwok togon yi'nage agaarik o,” yinuk, yogo logogun.

⁹Ndi, kit ti eeko logorak yokkiragarak nogo eeka'lek kiinok perak, ”Ala nen nomaluk lek eerogo paneegerak me, wa,” yinuk, yaga'lek mari eerogo punuk wonogwe kiinok, aap inigen mbuk me yi mendek ndi mendek nda nakkoorak meek wonage nogo kokwak wonogwe kinombarugun o.

¹⁰Ti kenok, noreewi o, At Ala nen miirogo pinagage nagagirik, kinayonggo pereegerak me, ”Abet aret mii'nabeegerak kagi,” mba'nuk, kiniki mondok nu'lek logonet, nggwiirit-nggwaarit eeko logonip. Togop eeko logomonggotak kenok, kiniyogobit lik togon yigeebu wambumunggup lek o.

¹¹Ti eeko logomonggotak kenok, ninagap ndaka ninowe endagembogut Yetut Keritut mondok-mondok minggim nogome, at Ala nen, ”Kit unde eekkola woraanip o,” yinuk, yokkiraagin.

¹²Ti kenok, Ala ari menggerak wone nogo kinaruk konembunuk waganggo nogotik, mondok nu'lek monggotak kwe, kagak, ambinom liippunuk eerit nogo logobagip nduk, an nen kulinik-kalinik yokkiragak mban eeke logogin aret o.

¹³At ninowe endagembogut Yetut Keritut nen an kambuurak paganogo yo'negerak nogo ndak-ndak, ”An kambuurak eyom abu panggo yegerak kagi,” yinuk, neenu me, awo kangga'lek neenik wonage logonet, yi wone ndi wone yokkirage minggirak nogo ti, Ala nen, ”Yorage logot o,” yinuk, yo'nireegerak me, kit aberak logobagip nduk, an yokkirage logogin aret o.

¹⁵An kambiminggirak neegak, kit nen, ”At ninogoba nogo nen wone ndogop yo'niragagerak nogo,” yinuk, kiniki abeko logobagip nduk, an yogondak awo kangga'lek logonet, yi wone ndi wone yokkirage minggirak nogo, mondok nggwiirit-nggwaarit aret yokkirage logogin o.

¹⁶Nit ninowe endagembogut Yetut Keritut, ”Wi,” yinuk, pi wakwi iigak woroorak wone yokkirogo monggoorak nogo ti, it aakumi nen timbayok wone mbininggo logonet, inoone amburu ndik-ndik yogo menggaarak paga niniki panggombunuk yokkirogo logolik. Ata, at Keritut mondok tiyanak lombok menggerak ninigen abe nen kogogurak nogo aret yokkirogo monggoorak.

¹⁷Keritut ninom put ayuk warak minggim nogome niigak, at mondok tiyanak ninogoba Ala nogo nen ninowe Yetut Keritut ayuk wurogo toyappege logonet, ”Kat an naput niniki kunik aret me, niniki ale'nggen eeke keegi o,” yinuk, yereegerak nogo, nit aret ninaruk konembunuk, yokkirogogurak.

¹⁹Ti kenok, o maan it aap Ala nen wone paganogo yorage kagak yorogo nogogwaarak nabi-nabi nogo a'me lik ari kogo nogogurik abet aret mbakwi me, mondok kiniki liippinip. Ndowan ambiret o weerikit nduk, kilim nagake kagak, abinak ndelenak-welenak ari kogo monggoorak nogo, wundi waga'lek kagak, o apit me ndi wuninogo pogootak eya kenok, niniki ale'nggen age minggi kwak, kinikime awo eya eekkinabi waga'lek kagak, wone yo'nirogo nogogwaarak nogo kiniki kunik eekkologo logonet, liippogo logonip o.

²⁰Wone yi mondok iya me, liippinip o. It aap aa'nduk Ala wone yorogo nogogwaarak nabi-nabi nogo nen iniki koombunuk yorogo logolik o. Ata, Aberiniki inikime lik ari mbareegi, Ala nen yorage kagak yorogo nogogwaarak me, aap ambi Aberiniki nen koonogo yoga'lek kagak, ”Ala wone liiru mbanak nogo, niniki koombunuk, ambi yookira o,” yinuk, yuurak ti abu meek o.